Matta 22
22
Davatbışde hək'eena misaala
1I'see manbışik'le meed misaalabı ts'ıts'a'a-ts'ıts'a'a eyhe ıxha:
2– Xəybışda Paççahiyvalla nişikne akar? Haane, paççahee dixes davatbı ha'a. 3Mang'vee davatbışeeqa insanar qoot'alasva cun nukarar g'ıxoole. Qopt'uluynbışismee ables vukkiykan deş. 4Manke paççahee cun mebın nukarar g'axuvu eyhen: «Qopt'uluynbışik'le eyhe, sufranılqa otxhun-ulyodğuy gixhxhı vod, congariy medın koki'iyn həyvanarıd gyatt'uynbı, gırgın hı'iyn, davatbışeeqa able». 5Qopt'uluynbı mançil bacit deepxha avayk'ananbı cone işbışqab qihna. Manbışin sassabı avayk'ananbı cone çolbışeeqa, mansanbı avayk'ananbı kar alişşu massa heles. 6Avxuynbışemee qəlas xhinne mang'un nukarar k'ap'ik'ıle avqa qav'u, gyabat'anbı. 7Paççahıs mançike qəl vuxha cuna g'oşun g'axuvu, cun nukarar gyapt'ıynbı gyapt'as, manbışda şaharıb gyooxhan ha'as ulyookka.
8Mançile qiyğa paççahee cune nukaraaşik'le eyhen: «Sufranılqa otxhun-ulyodğuy gixhxhı vod, zı maqa qopt'uluynbımee mançis avak'ıynbı devxhaynbı. 9Həşde şu yəq'bı ilekkane cigabışeeqa havak'ne, maa şosqa vuşuyiy qızaxxı davatbışeeqa qoot'le». 10Nukararıb havayk'ananbı. Manbışisqa yəq'ı'l-q'ı't'ıl vuşuyiy qızaxxı, yugna-pisda gırgına qoyt'alna. Məxüd davatbı ılğeeç'esın ciga mihmanaaşe gyayts'en. 11Paççah mihmanaaşiqa ilyakkamee, mang'uk'le davatbışis sik'ıyn tanalinbı ılydyı'ına sa insan g'ece. 12Paççahee mang'uk'le eyhen: «Hambaz, ğu nəxürne inyaqa davatbışin karbı ılydyı'ı iç'u?» Mana insan hucoome eyhesva axvana. 13Paççahee cune nukaraaşik'le eyhen: «Mang'un g'elybıyiy xıleppı ayt'ıl, yizde xaançe miç'axne cigeeqa dağerçe. Mançe geşşuybıyiy ık'arıke silibı sana-sançil qadaxan ses qöö ixhes».
14Mançil-allab qopt'uluynbı geebbı vuxhes, g'əvxüynbıme k'ılbabı.
«Allahın Allahısqa qele»
15Mançile qiyğa fariseyar#22:15 fariseyar Manbı I'sayne gahılin dindarar vuxha. avayk'ananbı mı'sləhətbı ha'as, nəxürne I'sa cuvabıl aqqasva. 16Manbışe irodianaaşika#22:16 İrodianar: Mane cühüt'yaaşe İrod Antipayka Roma imperiyeyn sura aqqaqqa ıxha. sacigee I'saysqa con telebabı g'axuvu eyhen:
– Mə'əllim, şak'le ats'an Ğu qorkuna, Allahna yəq qopkuba haagvana, şavuncad sura ıqdyaqqana, Ğu gırgıng'uqacar akarara eyxhe. 17Həşde Ğu şak'le eyhelan, Vasqa nəxüdiy qöö, şi imperatorus nalok' qeles ıkkanee, deşxhee dişee?
18I'sayk'le manbışiqa karaı'dəən fıkırbı ıxhay ats'axhxha eyhen:
– Q'öbvalla haa'anbı, nya'a şu Zı siliys ı'xiyxə? 19Zak'le hagvelan, şu nene k'apik'ıkayiy nalok' qele.
Manbışed Mang'usqa sa nuk'rayn pıl adayle. 20I'see manbışike qiyghanan:
– Vuşuyiy çil ts'ıts'ı'ı, şavuniy mançil do otk'un?
21Manbışe «İmperatorunva» eyhe. Manke I'see manbışik'le eyhen:
– İmperatorun imperatorusqa, Allahınıd Allahısqa qele.
22I'see uvhiynçile manbı mattebaxha, Vucur g'alerçu avayk'ananbı.
Hapt'ı üç'üb qeepxhayne hək'ee qiyghan
23Manecab yiğıl I'saysqa saddukeyar#22:23 saddukeyar: Saddukeyar I'sayne gahılin dindarar vuxha. Manbı baba-dideeşine ədatbışiqa gyuv'ur-oza qeebaxhe vuxha deş. Manbışe con işbı Mısee abıyne Q'aanunuqa g'ece ıxha. Saddukeyaaşe malaaikariy cinar vodva inyam ha'a ıxha deş. Manbışe Q'iyaamatne yiğıl gırgın hapt'ıynbı üç'üb qeepxhesva inyam ha'a ıxha deş. abayle. Manbışe insan qik'umee üç'ür qeexhe deşvaniy eyhe. Saddukeyaaşe I'sayke qiyghanan:
24– Mə'əllim, Mısee inəxüdniy uvhu: «Vuşumecar uşax dexha qik'veene, qik'uyng'une çocee mang'una xhunaşşe hey'ı, çocus nasıl haa'as vukkan»#22:24 İnəxüd Mısa peyğambarne xhod'esde kitabee otk'un (Q'.q'. 25:5-6). 25Yighıyre çocniy vob. Ts'erriyng'vee xhunaşşe hey'ı uşax ixhessecar qik'una. Mang'una xhunaşşe çocee hey'ı. 26Man kar mang'une q'öd'esded, xhebıd'esded gırgınecad çocaaşine vuk'lelqa qaylen. 27Gırgıng'ule qiyğa mana zəiyfar qeek'ana. 28Hapt'ıynbı üç'üb qeebaxhemee mana yighne çocuna neng'unane xhunaşşe yixhes? Man gırgın çocar məng'ı'n adamer vuxha.
29I'see manbışis inəxdun alidghıniy qele:
– Şok'le Muq'addasın Otk'uniybıyiy Allahna guc dyaats'ançil-alla şu qopkuba yuşan haa'a deş. 30İnsanar üç'üb qeepxhayng'a xhunaşşer haa'asıb, adamiysıb vüqqəs vuxhes deş. Gırgınbı Xəybışeen malaaikar xhinne vuxhes. 31Allahee hapt'ıynbı üç'üb qeepxhesva uvhiynçine hək'ee şu qətqı' dişde: 32«Zı İbrıhımna, I'saq'na, Yaaq'ubna Allah vorna?»#22:32 İnəxüd Mısa peyğambarne q'öd'esde kitabee otk'un (Qığ. 3:6) Mana hapt'ıynbışda deş, üç'übınbışda Allah vorna.
33Mang'vee xət qa'ançile cəmə'ət mattexhen.
Allahna nekke xəbna əmr
34Fariseyaaşik'le I'see saddukeyar ghalybı sa'as alivkuva g'ayxhımee, Mang'une hiqiy-alla savayle. 35Mane Q'aanunne mə'əllimaaşine sang'vee I'sa siliys ı'xəsva Mang'uke inəxdun kar qiyghan:
36– Mə'əllim, Q'aanuneena nekke xəbna əmr nenane?
37I'see mang'uk'le eyhen:
– «Yiğna Rəbb Allah yik'eençe, rıhı'kacar, gırgıne ək'elika ıkkıykne.»#22:37 İnəxüd Mısa peyğambarne xhod'esde kitabee otk'un (Q'.q'. 6:5) 38Mana nekke xəbna ts'eppiyna əmr vob. 39Mançik akarna q'öb'esda ina vob: «Vas k'anena, vas ğu nəxüriy ıkkan həməxür ıkkiykne»#22:39 İnəxüd Mısa peyğambarne xhebıd'esde kitabee otk'un (Lev. 19:18). 40Gırgına Q'aanuniy#22:40 Q'aanun: Allahee Mısa peyğambarıle ğana huvu (Tavrat). peyğambaraaşin uvhiybı mane q'öne əmreke giyğal.
Masih Şavna Dixne?
41Fariseyar sacigeeqa sabıyng'a I'see manbışike qiyghanan:
42– Şosqa nəxüdiy qöö Masih#22:42 Masih: man cuvab «q'ış qadğuna» eyhen vodun. Avaala İzrailil məxdın ədat ıxha, kaahinaaşine, paççahaaşineyiy peyğambaraaşine vuk'lelqa q'ış qadağva ıxha. Man q'öd'esın I'sayn do Allahee Mana g'əyxı'nava eyhen vod. İzrailybışik'le peyğambaraaşe uvhuynbı ats'a ıxhal-alla, manbışe Masih qarı cun millet duşmanaaşike g'attixhan hı'ı, dyunyeys xəbvalla hav'uy gozet ha'a ıxha. vuşune vor? Mana Şavna Dixne?
Manbışe «Mana Davudna Dixva#22:42 Davudna Dix: Masih Davudaanbışda ixhes, məxüd peyğambaraaşe oyk'an ıxha. Mançil-allad Mang'uk'le Davudna Dixva eyhe ıxha.» eyhe. 43I'see manbışik'le eyhen:
– Nya'a, manke Allahne Rı'hı'n hoyt'alne Davudee Masihık'le «Yizda Xərnava» eyhe:
44«Rəbbee yizde Xəring'uk'le eyhen:
Yizde sağıl gyu're,
Zı duşmanar Yiğne g'elik avqa qaa'asmee»#22:44 Manva Zaburee otk'un (109:1).?
45Davudee Mang'uk'le «Yizda Xərnava» eyhexhee, Mana nəxürna Davudna Dix eyxhe?
46Mançin alidghıniy I'says şavussecad qeles əxə deş. Mane yiğıled neng'veecad yik' hı'ı, Mang'uke sa kar qiyghan deş.
Currently Selected:
Matta 22: YIQSUM
Highlight
Share
Copy
Want to have your highlights saved across all your devices? Sign up or sign in
