لوقا 16
16
مَثِل مباشر زیرک
1بعد عیسی این مِثل رِشه شاگِردونسته بیارده: «اتا سرمایه دار اتا مباشر داشته. وقتی شکایت هاکاردنه وِنه پَلی که ته مباشر ته سرمایه رِه بر باد دِنه 2وِ رِه بخاسّه، بَپِرسیه: ‹اینا چیشیه که ته خوری گاننه؟ شه حساب رِه پَس هاده که دیگه مه مباشر نتوندی بوشی.›
3«مباشر شه پَلی فکر هاکارده: ‹چیکار هاکانِم؟ ارباب خانه از کار مه رِه برکنار هاکانه. زمین که نَتومبه بَکِنم و از گدایی هِم عار دارِمبه. 4دومبه چیکار هاکانِم تا وقتی شه کار رِه از دست هادامه کسانی دَووشِن که مه رِه شه سِره دِله راه هاده.› 5پس شه ارباب بدهکارون رِه اِتّا اِتّا بخاسّه. از اولی بَپِرسیه: ‹چَنده مه سرور رِه بدهکاری؟› 6جِواب هادا: ‹صد تا خمره روغن زیتون.› بائوته، ‹بَیر اینتا ته حساب. هِنیش و رقم اون رِه عوض هاکان و بنویس پنجاه خمره!› 7بعد از دومی بَپِرسیه: ‹ته چَنده بدهکاری؟› جِواب هادا: ‹صد تا خِروار گندم.› بائوته: ‹بَیر اینتا ته حساب. رقم اون رِه عوض هاکان و بنویس هشتاد خروار!›
8«ارباب وقتی ایناره بِشناسته، شه مباشر متقلب رِه تحسین هاکارده اینِسّه که عاقلانه عمل هاکارده؛ اینسته که مردمِ این دنیا دررابطه با شه هِم نوعون باهوش ترنه و آیِنده رِ در نظِر گِرننه تا خداشناسون شه آخرِتِ. 9پس شما رِه گامبه که مال این دنیای خراب رِه برای خِدمِت به دیگرون صرف هاکانین تا وقتیکه بَمِردینی و به اون مال دَسرِسی ندارِننی، شِما رِه در سِره هایِ ابدی قبول هاکانند.
10«اون که در کارهایِ کوچک امین بُوئه در کارهایِ گَت هِم امین هَسّه و اون که در کارهایه کوچک امین نَووشه در کارهایِ گَت هِم امین نییه. 11پس اگه در به‌کار بَوِردِنِه مالِ این دِنیایِ خراب امین نووشین کی هستِه که مال حقیقی رِ به شما بسپاره 12پس اگه در به‌کار بَوِردِنِه مالی که خِدا به شِما هِدا امین نَووشین چیتی خِدا نجاتی که وعده هِدارِ به شِما هاده؟ 13هیچ غلامی دِتا ارباب رِه خدمِت نَتونده هاکانه اینِسّه که یا از اَتّا نِفرت پدا کانده و به دیگری علاقه مند وونه و یا سَرسپرده اَتّا از اونا وونه و اتا نَفر دیگه رِه خوار خوندِنه. نَتوننی هِم بندۀ خِدا بوشین هِم بندۀ پول.»
14فَریسیونِ پول‌دوست با بشناستِن این حرفها عیسی رِه خنده بَزونه. 15عیسی ویشونه بائوته: شما اونایی هَستینی که مردِم پَلی شه رِ خار آدِم نشون دِننی اما خِدا شِمه دِلجه آگاه هَسّه. اونچه مردِم پَلی با ارزشِ خِدا پَلی بی ارزشِ!
16«تا قبل از موعظه یحیی، تورات وکتابهایِ انبیا راهنمایِ شِما بینه اما اِسا که یحیی مژده بیمونه ملکوتِ خِدارِ هِدا مردِم تلاش کانه بِزور وارد ملکوت خِدا بووشِن. 17امّا این رِ بدونین با این همه آسونتر هَسّه آسمون و زمین از میونه بوره تا اینکه اتا نقطه از تورات از جا دَکِفه!
18«مثلاً: هر کی شه زِنا رِه طلاق هاده و اتا زِنا دیگه بَیرِه زِنا هاکارده و هِم هر کی با اون زنی که طلاق بَییته ازدواج هاکانه مرتکب زِنا بَییه.»
مرد سرمایه دار و ایلعازر
19بعد عیسی ادامه هِدا و بائوته: «اتا مردی سرمایه دار بی‌یِه که لباسی از کتون لطیف ارغوانی شه تن کارده و همه‌روز به خوشگذرانی مشغول بی‌یِه. 20وِنه سِره دم اتا گدا نیشبییه وِنه نوم ایلعازر بی‌یِه که وِنه تن همه جا زخم و زیلی بی‌یِه. 21ایلعازر آرزو داشته با خورده‌های غذایی که اون مرد سرمایه‌دار سِفره جه موندِسه شه رِه سِر هاکانه. حتی سگها هِم اِمونه و وِنه زخمها رِه لیس زونه. 22بعد اون گدا بَمِرده وفرشته ها وِ رِه بَوِردِنِه ابراهیم پَلی. سرمایه دار هِم بَمِرده و وِ رِه دفن هاکاردِنه. 23اما وقتی شه چِشا رِه واز هاکارده شه رِه جهنمِ دِله در عذاب بَدییه. از دور، ابراهیم رِه بَدییه و ایلعازر رِه هِم وِنه کنار. 24پس با صدای بِلِند بائوته: ‹ای اَمه پی‌یِر، ابراهیم، بر مِن ترحم هاکان و ایلعازر رِه بَرِسِند تا شه انگوس رِه اوو دِله خیس هاکانه و بَزِنه مه زِبون رِه تا خنک بَووهه اینِسّه که در این تَش عذاب کَشِمبه.› 25اما ابراهیم جِواب هادا: ‹ای وَچه به‌یاد بیار که ته در زندگی، تموم چیزهایه خوب رِه داشتی در حالیکه چیزهای بد قسمت ایلعازر بِیِه. الان وِ اینجه در آسایش دَره و ته در عذاب. 26تازه ایناجه بَگذِریم میون اما و شِما درّۀ عمیقی دَره، اونا که بخان از اینجه ته پَلی بیهِند نَتونه و اونایی هِم که اونجه دَرِنه نتونه اَمه پیش بیهِند.› 27بائوته: ‹پس، ای پی‌یِر خواهش کامبه ایلعازر رِه مه پی‌یِر سِره بَرِسند 28اینِسّه که مِن پنج تا برار دارِمبه. وِ رِه بَرِسِند تا مه برارها رِه هشدار هاده نَکانه اونا هِم دَکِفِند این مکان عذاب آور دِله.› 29ابراهیم جِواب هادا: ‹اونا توراتِ موسی و کتابهایِ انبیا رِه دارِننه پس به حرفهای ویشون گوش هاکانند.› 30بائوته: ‹ای اَمه پی‌یِر ابراهیم اگه اتا نفر از مرده ها بوره اونا پَلی اونا توبه کاننه.› 31ابراهیم وِ رِه بائوته: ‹اگر به موسی و انبیا گوش نَکاننه حتی اگه اتا نفر از مرده ها زنده بَووهه باز هِم ویشون باور نَکاننه.› »
Currently Selected:
لوقا 16: Maz
Highlight
Share
Copy
Want to have your highlights saved across all your devices? Sign up or sign in
© Mazanmedia
