Epeso 2
2
1Wia nouro rio kiiro taiwai nou ta’uwa rio koihiai oubi aibori, mabu nouri rio himia bubu kemada’uri kidia’i wia ubauba kidia’i. 2Tauo tauo rio naibaha orohotutiumo batibati oubi aibo wia huramapai‐urio nou rio himia pai‐uriori. Nouri urio doihabuo nou kowaatiri irovidio tato oubimu. 3Wia hiwio ata imo auwoha neimu naibaha nemidiotutiumo nou ta’uwa imo himia goho ubauba niro nana’i imoo nidodiaiwatutiumo wia nouri nana gohoro pupuito aro naiba eremahebidio imoo naibaha nidodiaiwatutiumo wia nou ta’uwa, Iehova hohowa, imo ubauba mereri amida oubi aibo, mabu nouri imo kidia’i. 4Ata Iehova nou himia niainiai nou auwori, wia nou auwo niro imo nou himia auwo niro kimabebidio na’i nou ramu. 5Wia nou ta’uwa imo oroihimowa, imo himia ubauba kidia’i nouri, nourovia imo kiiro niwai Kerisomu (Niainiai‐kiwabatuti noito imo tau nitouti). 6Nouro imo Iesumu tau nitorai wia toboro bububatiwa imo nouro tau niwomiwa Iesu Kerisomu. 7Nou himia auwo niainiai kiwabatuti wia niainiai na’i imoido Iesu Kerisomu nou niro aiwai‐waeviai, ageio goho’i nouwa tau oatu‐ti. 8Mabu nouri rio tau nitoutiro niainiai kiwabatuti noito, kiraromodio na’i noudo, wia nouri nou imo himia kowaati nana biahai, nouvia Iehovaro kimaati nanari. 9Nou imo himia kowaati wiha biahai ina dubu ata nou oparo tore. 10Imovia Iehova kidodiai nanari. Nouro imo Iesu Kerisomu naibaha nidodiai, meamea kidia idodiaiwamoi, nouri nana Iehovaro opuito idodiai nouri imoo nei idodiaiwamoi.
11Nouri tararomomo, opuito rio douboi goho oubiri. Tama kiahio oubio rio paina naibaha idutiumo, tama‐iahio‐tato oubi; ata nei himia kidia gohowa tuito idodiaiwaumo. 12Tararomomo rio nou ta’uwa rio Iesu wegeudo emidioumo: Rio douboi oubiri Isaraela batibatiwa, wia nouri kowateai wade bubu ramu rio nouido douboi oubi aibori, wia nou ta’uwa rio niro kemahebidio na’i iworohomo biahai wia rio batibatiwa nou emidiotutiumo, Iehova tatori. 13Ata doihabuo rio opuito auwowa kemidio oubi rioo tarihaito tau niwariiairo, Iesu Keriso sawi noito. 14Mabu nouri nouvia imo ameari, Nouro imo na’u aibo nidodiai wia nouri turiwa kimahiai oru nouro tau ihebuti. 15Bubu heauwo nana’i wia wade modobo nana’i nou ramu nouro tau ipoiio nou himia gohowa, bubu‐oubi wia bubu‐tato‐oubi nei aueudo na’u orio dubu nou niro ododiai, nou himia gohowa wia nou aibo amea meaha nouro iwai. 16Nou himiaro nouri heauwo nana nou tau iwoto, nouri nou niro neiti mabu oubi oititoi Iehovamu, na’u goho ramu sataurowa. 17Wia nou naibaha o’uro amea erebai totomoito naibaha iaowa rioido; rio auwowa kemidio oubii wia tariwa kemidio oubinu neido naiba. 18Ina nouri nou himia pupuo’i noito imeiti na’u ko’u nave Abeaido naibaha niworohoudo, na’u iminito. 19Mabu nouri rio douboi oubi biahai doihabuo wia bati ata oubi aibo biahai. O’o doihabuo rio na’u oubiri tana oubimu wia rio Iehova moto oubiri. 20Wia rio na’u moto aibori, kotiodoi‐oubi wia peroveta‐oubi nei kotoi bati ohuwa ididi; Iesu Keriso, nou himia, nouvia opuito kididi akabuwa. 21Wia nou himiamu, kididi nana auwoha pupuito idabuai wia nei ioro na’u Tana‐moto aibo Iehovaido. 22Wia rio auwoha neimu naibaha idabuaimoi ididi. Iehova kemidio bati idodiaimoi Tana‐uriomu.
Currently Selected:
Epeso 2: KXW1941
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1941.