Ioane 21

1Nouri nana dooudo, Iesuro nou himia kitomudio mere nou himiaro naibaha orowaevia neido ata ta’uwa, Taibiria auwoturi mabuwa. Wia nou himia naibaha orowaevia nou aibo. 2Simona, ete paina Pita wia Toma, ete paina Neewa wia Nataniela, Kana dubu Galilaia mabuwa wia Sebedaio mere neewa wia nou kitomudio mere ata neewa, nei auwoha na’u batiwa naibaha emidioumo. 3Simona, ete paina Pita, neido naiba iaowa: Mo na gabo no’u. Nei nouido naiba iaowaumo: Imo naiba romu na’idumo. Nei naibaha o’umo wia pewa naibaha orowutumo ina duo nouri na ata neiio iviamo biahai. 4Ina hiwio kiheheai tariwai, Iesu potoudo naibaha otoa wia kitomudio mere nei umo biahai nou Iesuri. 5Ina Iesuro neido naibaha iaowa: Merebaio, rio kihona aria? Nei nouido naibaha omowameaiwaumo: Oo. 6Wia nou neido naiba iaowa: Rio kamahu pe tuiha baraito taivemo ina rio ariviadaidumo. Nouri nei naibaha aiveumo wia nou ta’uwa nei pupuo biahai kamahui iviodoimoi mabu nouri na godogodori. 7Wia nouri kitomudio mere Iesu nou niroi, nouro Pitaido naiba iaowa: Nouvia Pai‐duburi. Ina nou ta’uwa Pita naibaha orovidio nou Pai‐duburi, nou himia uduuduo nou naibaha orowamiteai (mabu nouri nou turuuhari) wai obowa nou naibaha irohuguai. 8Wia amida kitomudio mere nei peito naibaha aririoumo, mabu nouri hopu auwowa biahai, (100 yards tariwai) wia kamahu na ramu obowa iwaririowaumo. 9Ina nou ta’uwa nei hopuito naibaha aririoumo, kupo huopi neiio naibaha iviaumo wia nara doura naibaha iatowowaumo. 10Iesu neido naiba iaowa: Nouri doihabuo kirobo na’i taividiaumo. 11Nouri Simona Pita naiba orovia wia kamahu hopudo naibaha owodoi, auwo auwo na ramu kapeeri, 153; ata nei godori ina kamahu arahiruti biahai. 12Iesu neido naiba iaowa: Dou opuito taihoumo; wia kitomudio mere auwoha nouido atodoi tore aatiwaumo naiba: Ro botiri? mabu nouri nei umori nouvia Pai‐duburi. 13Ina Iesu naibaha o’uro, dou naibaha emidai, neido naiba imaati wia na ramu. 14Nouri nou neewa na’u ta’ui Iesu nou kitomudio mereido nou himiaro naibaha orowaevia nou kohiaiudo doo naiba waritorai.

15Ina nei daihoumo Iesuro Simona Pitaido naiba iaowa: Simona, Iona mere, ro mo nirora nouri amida oubi aibo biahai? Nouro nouido naiba iaowa: Io pai‐dubu e, ro umori mo auwo niroi ro. Nouro nouido naiba iaowa: Mo mamoe mere dou taimaati. 16Ina nou nouido ata ta’uwa naibaha iaowa: Simona, Iona mere, Ro mo nirora? Nou nouido naiba iaowa: Io, pai‐dubu e, ro umori mo auwo niroi ro. Nouro nouido naiba iaowa: Mo mamoe dou taimaati. 17Ina nou ata ta’uwa neewa na’u nouido naiba iaowa: Simona, Iona mere, Ro mo nirora? Pita giopu miboro naibaha epia, mabu nouri nou neewa na’u ta’uito atodoi, ro mo nirora; wia nou nouido naiba iaowa: Pai‐dubu e, nana auwoha ro umori; ro umori mo auwo niroi ro. Iesu nouido naiba iaowa: Mo mamoe dou taimaati. 18Naiheha, naiheha, mo roido ainaro, Ina ro orio merewa, ro himia bae ro naibaha oro’uti wia tou batito ko’u niroi ro ko’uri; ata doo ro amake aiwaiti ro tu neewa roro aiwai‐tuturoi wia ro dubu ataro aiwawooi wia nouri bati ro niro biahai, noito nouro ro aiwawoi. 19Nou naiba iaowa nouri nou aiemapoi taiba koihiai nana Pitaro Iehova pai‐aiwawai; ina nou ta’uwa nouri wade nou nou aro nou nouido naiba aro: Mo tanobodoro. 20Pita naibaha iremeteai wia nouri Iesu niro kitomudio mere nouro korobodowa naibaha eauri. Nouri dubu Iesu bodorowa nouro odoumai horiomoo ta’ui nouowa wia naiba iaowa: Pai‐dubu e, boti duburo wawahuoi ro piroha? 21Ina Pitaro nou eauri nou Iesuido naiba iaowa: Pai‐dubu e, touna waidodiai nouri dubu? 22Iesu nouido naiba iaowa: Ina mo niro nou kemidio kemidio mo ko’u hiwiowa teiri ro? Ro mo tanobodoro. 23Ina nouri kiao wade nou niamomioido naibaha o’u; Kitomudio mere nouri nou oihiai raihe; ata Iesu nouido naiba aro biahai, nou oihiai raihe, nou naiba aro: Ina mo niro nou kemidio kemidio mo ko’u hiwiowa, teiri ro?

24Nouri dubu nana nouri auwoha naibaha emapoi nou nouri duburi; wia nouri nana nou titi naibaha iati wia imo umori nou kemapoi wade nou naiheheari.

25Wia nouri nana Iesuro tau idodiai nei ata godogodori, ina nei auwoha titi batiatiumo mo ainararomo batibati auwoha nei auwo biahai nouri titi kiati bukanu idiamoi. Amen.

Currently Selected:

Ioane 21: KXW1941

Highlight

Copy