Luka 1

1Nouri nana imoo naibaha niraromo‐diodumo, nana nouri oubi amidao titi gamooiha iatimoi, oroa aibo, neiio tau emahebaumo. 2Naiba opuito kiauri oubio wia wade kiatomuai oubio oroa nouri imoido naibaha nimowaduutiumo. 3Ina nouri, Tiopiro e, ro mea dubu, mainararomo nou meaha oroa nouri mo roido titi modoboha iati, mabu nouri nana auwoha moro ainimohouti opuito kowahorowa wia dooudo. 4Ina nou aibo nouri nana oubio roido tau ematomudioumo, ro naiheha umo aiwaiti.

5Nou tauwa Heroda nou Iudea pai‐duburi, na’u kohena‐dubu, paina Sakario naibaha emidio, nouvia Abia gu mereri. Nou himia o’bo Arona gu beheri, nou paina Elisabeta. 6Wia neiti meahari Iehova hohowa, Iehova bubui wia kiao wade’i neitio meamea idodiaiwatutiudo. 7Wia neiti himia mere tatori, nouri Elisabeta teriri ina doihabuo neiti amakera aberera tau oitiudo.

8Ina nou ta’uwa Sakario kohena kowaati nouro Iehova hohowa naibaha idodiai nou himia oubii nei ta’uwa. 9Kemapoi na’i nouido ko’uri, nibo mea nana ipihamutimoi, ina nouro Iehova Tana‐moto naibaha odoruti, kohena‐oubi kidia aibo. 10Wia oubi gemao, nibo mea nana kipihamuti ta’uwa, wade kirodumeaito naiba iaowaumo wegewa. 11Wia Iehova gururu‐mere na’u nouido omowaetai, nibo mea nana kipihamuti dodoo, nou tuiha hapuoudo naibaha otoa. 12Ina nou ta’uwa Sakario nou naibaha eauri nou imini godo‐godoha iraromodiowa wia nou tore emahebidiowa. 13Wia gururu‐mere nouido naiba iaowa, Sakario tore moa nouri ro katoduti wade’i nouro airovidiotutiro ina ro o’boaro Elisabeta, roido mere aiwaroto wia nou paina Ioane roro aiwai‐dodoi. 14Wia rovia pai‐paiha wia geiigeiiha wamahebidioi wia nou koroto hiwio’i oubi godogodo geii aiwai‐moiti. 15Nouri nou auwoitiwa Iehova hohowa wia vine obo naiba karakara obo nouro idio raihe wia Tana‐urio nou goho aiwapee, nou koroto hiwio’i nouowa. 16Wia Isaraela oubi godogodo, Iehova nei Urio‐abeaido nouro nei aiwai‐waorai. 17Wia nou hohowa nouro opuito aiwau‐ro’ui, Elia iminii wia pupuo’i nou ramu; Abea giopu nei mereido nouro aiwai‐waorai naiba tumutumu‐oubi naiheha‐oubi meamea iminito nouro aiwai‐waorai naiba oubi nouro nei gamooiha aiwaiwai wia Iehovaido nouro nei meaha aiwai‐dodiai. 18Wia Sakario gururu‐mereido naiba iaowa, Teiri mo naibaha umoiti, nouri mo amake duburi wia mo o’boa nou konobo godogodori. 19Wia gururu‐merero omowameai, nouido naibaha iaowa, Movia Gaberielari, Iehova mabuwa ainotoi wia nouro mo tau notiodoiro roido iao’i wia nouri pai mea roido oworuoi. 20Ta’auri, roro mubaruo aiwaveai wia ro wade iao raihe hiwio’i nouowa nouri nana auwoha aiwaimo‐o’ui, mabu nouri mo karo wade’i roro irovidio biahai, nouri wadenei himia ta’uwa naiheha aiwaimo‐idodiai. 21Wia oubio Sakario omotoiwaumo ina nei aiemaeawaumo mabu nouri Tana‐motowa nou tutu emidio. 22Ina nou tauwa nou naibaha ohuowa nou neido wade orowahuoi maataha abooatutiwa, nouri nei umori urio nana Tana‐motowa nou tau eauri, mabu nouri nouro neido tuito erematioutituti wia mubaha naibaha emidiotuti. 23Wia nou ta’uwa nou himia kiwaati hiwio’i oboiri nou himia motoito nou naibaha araiwairo.

24Wia nouri hiwio’i dooudo, nou o’boa Elisabeta naibaha aihiouti wia bara 5 nou himia piroha emidio. Nou naiba iaowa: 25Nou aibo Iehova moido tau ododiai nouri hiwiowa nou moido naibaha eauri mo hipo nana oubi mabudo iahihiti.

26Bara 6 ina oropoiiomo, na’u gururu mere, paina Gaberiela, Iehovaro naibaha otiodoiro, Galilaia hapuo’i noito, oopo paina Nasareta. 27Na’u beheido, nou uramo paina Iosepa, Davida gu mereri. Behe nou paina Maria. 28Wia gururu‐mere beheido naibaha odoro nou naiba iaowa; Niainiai ro. Rovia tiaha behe mea, Iehova ro mabuwa remidio. 29Ina nou ta’uwa nouro naibaha eauri, Maria tiaha tore emahebidio nou karo wadei wia nou iminiwa naibaha araromo touna wade raro nou. 30Ina gururu‐mere nouido naiba iaowa, Maria tore moa, Iehova tiaha niainiai roido. 31Taauri, rovia niroro aiwahioti wia na’u ohio roro aiwarotoi wia nou paina roro aiwai‐dodoi, IESU. 32Nouwia auwoitiwa, wia nou paina auwo waimo‐emahooi Pai Urio Mere wia nou agei dubu Davida nou himia pai‐kemidio‐batii Iehovaro nouido aiwamaai. 33Wia Iakabo gu mere’i nouro nei ohuwa pai aiwaiti kemidio kemidio tuturi wia nou himia bububati oropoiioumo raihe. 34Ina Maria gururu‐mereido naiba iaowa: Teiri wauro’ui mabu nouri dubu mo umo biahai? 35Gururu‐mere naibaha omowameaiwa wia nouido naiba iaowa: Tana‐urio roido aiwau‐ro’ui wia Pai‐urio pupuo’i ro aiwateemai mabu nouri Tana na roro aiwarotoi Iehova Mere nou aiwa‐idodoi. 36Wia ta’auri ro mabira Elisabeta, nouro na’u ohio nou niroro tau ahioti ina nou abereri wia nouri bara 6 nouowa nouri o’bo oubio terito ahootutiumo. 37Mabu nouri nana auwoha Iehovawia umori kidodiai. 38Wia Maria naiba iaowa; Ta’auri Iehova Hiwaa‐behe. Ro kiao wade moido naiba mo’umo. Wia gururu‐mere nou mabudo naibaha araiwai.

39Wia Maria naibaha oto’a wia nouri hiwio’i akabu batito hago‐hagoha naibaha o’uwa, Iuda oopo na’uito. 40Wia nouro Sakario motoito naibaha odoro, Elisabeta naiba omohoiio. 41Ina nou ta’uwa Elisabetaro, Maria komohoiio wade naibaha orovidio, bamu nou mere daimowa naibaha imovio wia Elisabeta giopu aiapee Tana‐urioro. 42Nouro wade niimoito naibaha omohoiio naiba iaowa; Rovia geiigeiihari ata upi aibo biahai ina nouri mere daimowa kemidio na’i nouvia geiigeiihari. 43Wia touna nidodiai mo, nouri mo pai‐dubu mamu moido nou o’uro? 44Nouri nou ta’uwa ro komohoiioi mo gareito norovidio, bamu mo mere daimowa naibaha imovio geii ramu. 45Wia nouri o’bo nouvia geiigeiihari mabu nouri nou naibaha iraromodio Iehova kiao wade nouido aiwauro‐idodiai. 46Ina Maria naiba iaowa:

Mo urio Iehovaido ainemabitidio:

47Mo imini tiaha geii neremahebidio Iehovaido, mo kitoruti‐urio.

48Nou hiwaa‐behe hipohipoha nouro tau eauri:

Wia ta’aurimo, nou ta’uwa wia ata ta’uwa oubi auwoha neiio mo geiigeiiha naimo emahooi.

49Ina nouri Urio’i nouvia auwoihari, nouro moido auwo mea nana tau idodiai.

Wia nou paina tanari.

50Oubio nouido tore emahebidiomoi nou niainiai neimu emidio,

Aramio amidamu wia aramio amidamu.

51Tiaha pupuo na nou tuito nouro ododiaiwa.

Kiparo‐oubi, nei imini ramu, nouro tau iatuuti.

52Pai‐oubi, nei himia kemidio batiudo nouro iahouiuti

Wia muni‐oubi nouro nei pai aiwaiwai.

53Oubi dou niroro naibaha iai nei niro nouro tau iapeuti mea nana ramu

Wia oubi, nei nana horohorori nouro buru aibo tau itiodoi.

54Isaraela, nou hiwaa mere nouro tau owabai,

Nouri nou himia niainiai nou dodo‐koiti biahai.

55(Nou aibo nou wade imo abeamioido nou tau aro),

Aberahamoido wia nou himia aramioido idaa idaa.

56Wia Maria noumu emidio bara neewa na’u tariwai, ina nou himia motoito naibaha araiwai.

57Ina Elisabeta merero kaai hiwio’i naibaha owea wia ohio nouro naibaha oroto. 58Nou himia oopo oubi naiba nou gu oubi umo naibaha oitiumo Iehova nouido auwo niainiairi wia nei noumu geiigeiiha naibaha imahebidiowaumo. 59Ina hiwio 8 oropoiioumo nei naibaha o’umo nouri mere tama ahiaimoi wia nou paina Sakario neiio naibaha idodoumo nou abea painaito. 60Wia nou mamuro naibaha imowameai naiba iaowa: O’o, nou paina Ioane taiidodoumo. 61Wia nei nouido naibaha iaowaumo: Ata dubu ro himia oubimu paina naiba iroro biahai. 62Nou ta’uwa nei nou himia abeaido tuito naibaha atodoumo boti paina idodo niroi. 63Wia titi kiati nana nouro naibaha atodoi wia nou titi naibaha iatiwa naiba iaowa; Ioane nou painari; ina nei auwoha aiemaeawaumo. 64Ina nou ta’uwa nou maata naibaha araerai, nou mototobe naibaha omopiwo wia nou naibaha iaowa wia Iehova nouro naibaha emabitidiotuti. 65Wia nei mabuwa kemidio oubi auwoha neiio tore imahebidiowaumo wia nouri kiao wade auwoha neiio Iudea akabu batibati auwohawa naibaha iwaduutiwaumo. 66Wia nouri kirovidio oubii wade nouri nei giopuwa neiio naibaha idiamowaumo naiba iaowaumo, Tou aiboi mere’i nouro wauro’u’i, nouri Iehova tu noumu emidio.

67Nou abea Sakario, Tana‐urioro nou imini naibaha apee wia nou wade totomuito aro, nou naiba iaowa:

68Iehova, Isaraela Urio‐abeari,

Geiigeiiha taitiro, nouri nou himia oubido nou naibaha o’uwaro wia nouro nei tau itouti.

69Wia pupuo Kiitouti‐dubu imoido nouro tau ahomai,

Nou himia hiwaa‐mere Davida motowa.

70(Naiba tauo tauo nou wade naibaha owateai nou peroveta tana oubi nei maataito.)

71Imo korowaematuti‐oubi nei mabudo itoutimoi wia imo oriha kiauri oubi auwoha imoo nei tuudo itoutimoi.

72Niainiai nana’i imo abeaido idodiaimoi Wia nou himia tana‐kowateai wade iraromomoi.

73Nouri kowateai‐wade imo abea Aberahamo nouro nouido wade naibaha owateai.

74Imo tore kimaati nana nouro aiwai‐tateai,

Wia imo korowai‐ematuti oubi nei tuudo imo nouro ainaitouti.

75Mabu nouri imo nouido ainaimo‐emabitidioi, tana kidia ramu wia meamea kidia ramu nou hohowa, imo kiiro hiwio’i auwoha.

76Wia rovia mo ohiori, peroveta dubu auwoauwo Pai‐dubuido oubio ro aiwaimo idodoi:

Nouri Pai‐dubu hohowa roro aiwau‐ro’ui, nou himia nave meamea idodiaimoi.

77Kiitouti nana nou himia oubi umoitimoi

Nouri neiri ubauba kidia’i kiaho’iuti.

78Kiheeai hiwio imoido toboroudo tau o’uro

Mabu nouri imo Urio‐abea nou niainiairi.

79Duriiwa kemidio oubido wia koroihi gudibowa kemidio oubido Pida imaatimoi:

Imo kono amea‐amea naveito iwaboiiatutimoi.

80Wia nouri mere nou noro aiwaiti, nou urio pupuo naibaha waiti wia nou buru batiwa naibaha wamidiotuti hiwio’i noito Isaraela oubido nouro nou himiaro naibaha obodoi.

Currently Selected:

Luka 1: KXW1941

Highlight

Copy