Luka 15
15
1Ina gavana wiha keauri oubi wia ubauba oubi nei nou tarito naibaha o’uwaumo, nou orovidiomoi. 2Wia Parisea oubira, titi oubirao nou naibaha emamautiwaumo naiba iaowaumo: Nouri dubu ubauba oubi naibaha iaubuai wia neimu ihoi.
3Wia nouri oro‐aibo wade nou neido naiba iaowa: 4Nouri dubu rio mabuwa, ina nou 100 mamoe airotoidumo wia na’u nou naibaha atoai taiba iai? Nou 99 mamoe burubatiwa emeheai wia katoai mamoe dooudo orobodoro; nouro idamoho idamoho ina nouro naibaha owea. 5Wia nou ta’uwa nou naibaha owea, nouro nou benaito naibaha aotai geii ramu. 6Ina nou motoito nouro naibaha araiwai, nou himia mabu oubira oopo oubira nouro neido naibaha imorou, Momu geii taitimo mabu nouri mo katoai mamoe moro tau nowea. 7Mo rioido ainaro, nou aibo auwo geii nana toborowa aiwaimo‐emidioi, ina na’u ubauba mere nou imini aiimowai; wia nou auwo aibo biahai nouri 99 mea oubido nei imini imowa’imo tatoi.
8Wia na’u o’bo, 10 bohoboho moni aiworoho ina na’u nou aiatoai taiba iai? Nou lamepa naibaha adia wia moto nouro naibaha otobirowa wia nouro idamoho, idamoho, nouro naibaha owea. 9Ina nou ta’uwa nouro idawea, nou himia mabu oubira oopo oubira nouro neido naibaha imorou wia naiba iaowa, Momu geii taitimo, mo katoai moni moro tau nowea. 10Nou aibo mo rioido ainiao, Auwo geii nana Iehova gururu oubi nei hohowa aiwaimo‐emidioi nou ta’uwa na’u ubauba mere nou imini aiimowai.
11Wia nou naiba iaowa: Na’u dubu nou mere neewari, 12wia wapudo mere nou abeaido naiba iaowa, Aba, taiba nana waumo’ui, moro irahoo na, moido tanemaati ro. Wia nou himia nana nouro neitido naibaha imaatiwamama. 13Wia hiwio godo biahai, wapudo mere nana auwoha naibaha iomutiwa wia nou navewa naibaha o’uwa bati auwoito; wia batii nouowa nou nana nouro gooa aibo imiodiotuti uba kidia wiha, dawodawo aiboiti. 14Ina nou ta’uwa nana auwoha nouro idaipoiiou, batii nouowa auwo due ta’u naibaha o’u, wia nou duero naibaha aai. 15Wia dubu ataido batii nouowa nou naibaha odabuai wia nouro nou naibaha otiodoi boomo kihona imaati neido. 16Wia nou auwo niro nou himia niro apee boomo kiho horohoro’i neiio, wia oubi’i neiio nouido ata kiho na emamaatimo biahai. 17Ina nou ta’uwa nou imini daiwaiwai; nou himiaro naibaha iaowa, Taiba kowaati‐mere godo mo abea batiwa, nei dou godogodori ina mo dou niro tariwai koihiai. 18Mainatoai, Abeaido mai‐na’ui, Nouido mai‐narodai, Aba e, ubauba kidia mo tau nidodiaiwa toboro hohowa wia ro himia hohowa. 19Doihabuo mo mea biahai ro mereito ahooi. Roro mo ro himia kowaati‐oubii, nei aibo, tanatidiai. 20Wia nou naibaha otua wia abeaido naibaha o’u. Ina nou ta’uwa nou auwowai, nou abearo nou naibaha eauri ina nou auwo niainiai emahebidiowa wia naibaha imaiiowa wia nou hokoudo naibaha aeruai wia nou naibaha ohomeaiwa. 21Ina mere nouido naiba iaowa, Aba e, ubauba kidia mo tau nidodiaiwa, toboro hohowa wia ro himia hohowa, ina doihabuo mo mea biahai ro mereito ahooi. 22Ina nou abearo kowaati‐oubido naiba iaowa, Nouri tiaha mea uduuduo tawoumo wia nouido tawamiteaimo, wia tu modobo nou tuwa taviomo, naiba douboi kono nou himia konowa tavioruriomo. 23Wia nouri noro‐noro orio bulamakau nou tawoumo wia tapiamo, ina ta’umo, imo ihoimoi naiba geii taitimo. 24Mabu nouri, mo mere nouowa nou aioihiai wia doihabuo nou kiirori, opuito nou aiaratoai wia doihabuo nou tau nowea, ina nei geii naibaha oitiumo. 25Wia nou opu mere batima‐buwa emidiowa ina nou naibaha o’uro wia moto tarito naibaha o’u, gidoro gamara diamoi nouro naibaha irovidiowa. 26Wia na’u kowaati mere nouro nou mabuito naibaha otua naiba atodoi, Touna na ridodiaidumo diamo’i. 27Wia kowaati mereo nouido naiba iaowa, Ro niama tau raraiwairo ina ro abearo nouri noro‐noro orio bulamakau tau repia, mabu nouri nouro nou meaha rowea, temeteme biahai. 28Wia nou heauwo naibaha oiti ina odoro niro biahai, mabu nouri nou abea naibaha ohuo nouido hobo atoro. 29Wia nou naibaha omowameai ina abeaido nouro naiba iaowa, Ta’auri, nouri konobo godogodo roido mo naibaha nomotoituti, wia hiwio auwoha ro wade modobo mo emadauriai biahai, ina na’u orio mamoe, na’u gauwoha, roro moido emaai biahai, mo himia mabu oubimu geii oitimoi. 30Ina nou ta’uwa nouri ohio, ro mere, nou naibaha o’u, nouri ohio nouvia ro himia nana iwo upibaio neido gooa aibo tau imiodiotuti, noro‐noro orio bulamakau ro tau epia nouido. 31Wia abea nouido naiba iaowa, Mo mere, rovia momuri hiwio auwoha wia mo nananu auwoha nei ro nanari; 32nou meaha imoo gama ododiaimo ina geii emahebidioumo mabu nouri ro niama nouri opuito nou aioihiai ina doihabuo nou kiirori, opuito nou aiaratoai ina doihabuo nou tau nowea.
Currently Selected:
Luka 15: KXW1941
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1941.
