Luka 23
23
1Ina nouri oubi auwoha neiio naibaha otoaumo wia Pilatoido neiio nou naibaha owaboiiaumo. 2Wia neiio nou omohuodiomoi naibaha iaiwaumo, nei naiba iaowaumo: Imoo dubunu tau noweaumo, imo oubi gooa nouro imowaituti wia moni Kaisaido emaati tore nouro nimadohiomai. Nou naiba iaowa Nouvia, nou himia Kerisori, na’u Pai‐duburi. 3Wia Pilato nouido naibaha atodoi, Rovia Iudea Pai‐dubura? Wia nouro nouido naibaha omowameaiwa naiba iaowa, Mo nouri. 4Ina Pilatoro auwo‐kohena oubido wia oubi auwohaido naibaha iaowa: Uba na nouri dubunu nouowa moro omowea raihe. 5Wia nei auwo heauwori wia naiba iaowaumo: Oubi auwoha, Iudea batibatiwa kemidio oubii, nouro heauwo naibaha iwaituti wia Galilaia batii noudo batii noito nou naibaha imatomudiotuti. 6Ina Pilatoro Galilaia paina naibaha orowai nou naibaha atodoi, Dubunu Galilaia merera? 7Ina nou umori Iesu Heroda hapuo duburi, nouro nou Herodaido naibaha otiodoi, nouri nou ta’uwa Heroda nou himia Ierusalemawa emidio.
8Ina Herodaro Iesu eauri nou auwo geii emahebidio, mabu nouri hiwio godogodo nouro nou niro eauri wia nou himia kidodiai nana godogodo’i nouro naibaha irovidiotuti, wia ata tiaha kidodiai na’i nou niro eauri Iesuro ododiaiwa. 9Ina nouro godogodo wadeito nouido naibaha ematorodiowa wia na’u wade Iesuro nouido omowameai biahai. 10Ina auwo‐kohena oubira, titi‐oubira, neiio naibaha otoaumo wia heauwo wadeito neiio nou naibaha omohuwodiowaumo. 11Wia Heroda nou himia korowoto oubimu, neiio nouido ematiowaumo naiba emesiowaumo wia tiaha sovio hipura nouido naibaha owamitiaumo naibaha otiodoumo Pilatoido araiwai. 12Wia hiwio nouri Pilatora Herodara mabu dubu naibaha oitiudo, nouri opuito neiti ori ereauritutiudo.
13Ina Pilatoro auwo‐kohena oubira, pai oubira wia oubi auwoha, nouido naibaha itua. 14Nou neido naiba iaowa: Nouri dubu rioo moido tau owoumo, ina rioo naibaha aroumo, tumutumu kidia oubido nouro imatomudiotuti; wia ta’aurimo, moro nouido, rio hohowa, tau nemahebai wia nouri rioo komohuodio uba nana’i moro nou mabuwa ivia biahai. 15Wia Heroda naibari, nouri nouro nou imoido nou rotiodoiro naibaha araiwairo, mabu nouri koroihi wiha kidia Iesuro idodiaiwa biahai. 16Mabu nouri moro nou ainepiadai ina moro nou ainotiodoidai. 17Mabu nouri horiomoo hiwiowa, nouro durii daimowa kemidio dubu na’u neido nou kowateaiha owateai. 18Ina nei auwoha naibaha imakakaiwadiowaumo: Dubu nouri tahoiuti, Baraba imoido tatiodoiro. 19Baraba durii daimowa emidiotuti, mabu nouri nouro oopo oubi aiwaemai, wia dubu ata nouro kirimiha aiida. 20Wia Pilatoro neido wade ata naiba iaowa, nouri Iesu nou rotiodoiro nou auwo niroi. 21Wia nei aiimakakaiwadiowaumo naiba iaowaumo: Nou sataurowa tatomaimo, nou sataurowa tatomaimo. 22Ina wade ataro nou neido naiba iaowa: Teiri, touna uba nana idodiaiwa nouro. Koroihi wiha kidia noumu moro owea raihe, nouri moro nouido ainepiadai wia ainotiodoidai. 23Wia neiio pupuito auwo wadeito naibaha atodoumo, nou sataurowa tatomai, wia nei himia wadei naiba auwo‐kohena oubi wadei opuito oawa. 24Wia Pilato kiwotoi wade naibaha emapoiwa, nei karo wade aibo. 25Wia nouri dubu gavana oubio durii daimowa tau edeaumo, mabu nouri kiwaemai kidiari wia korowoto kidiari, dubui nouri neiio nouido atodoumo nouro neido imetiodoi wia Iesu nouro neido naibaha imaai touna niroi nei.
26Ina nou ta’uwa neiio nou naibaha owaboiiaumo neiio na’u Kurene dubu naibaha ohodiowaumo. Nou buiudo ohuodidio. Satauro nou benawa neiio naibaha owaotaumo, Iesu dooudo aotidio.
27Wia oubi gema nou dooudo orobodowaumo wia upibaio naiba, ina neiio nei bodoro naibaha aradowaumo wia nouido idebi naibaha emetutiwaumo. 28Wia Iesuro neido naibaha imeteai naiba iaowa: Ierusalema buhebaio, rio moido idebi irotutiumo aue. Rio himiaido wia rio mereido idebi taimetutimo. 29Mabu nouri, hiwio’i aiwauro’ui ina neiio aiwaimo‐iaoi, Teri upii wia niro tato upii wia amo ihitato upii, nei geiigeiihari. 30Nou ta’uwa tutu akabuito neiio aroi naibaha iaiumo, Imo ohuwa taromooutiumo wia komu akabuido neiio aromoi, Imo taniwatimairo. 31Ina kidia nouri neiio naibaha idodiaiwaumo nouri hiwio nua paha omobodiaiwawa, touna na idodiaumo nei, nouri hiwio’i nua hohowa?
32Wia dubu ata neewa, ubauba mere neewari, neiio neiti noumu iwaboiiawaumo iaiidamoi.
33Ina nou ta’uwa batii paina naibaha idodoumo, Opu horo batiri, nei naibaha o’uwaumo neiio nou sataurowa nouowa otomaumo wia ubauba dubu neewa, na’u nou tuiha hapuoudo, ata nou pere hapuoudo. 34Ina Iesu naiba iaowa: Aba e, nei himia uba kidia roro iraromo raihe, mabu nouri nei umo biahai touna ridodiaidumo, Wia nou hipura nei himia naibaha eremaatiwaumo ina keremehee neiio naiba idodiaumo. 35Wia oubi naibaha otoaumo emeaurimoi, wia pai‐oubi neimu nouido naibaha ematiowaumo naiba iaowaumo: Nouro amida oubiha kiitoutiri, nou himia moritorai ina nou Kerisori, Iehova Pai‐duburi. 36Wia korowoto oubio nouido naibaha ematiowaumo naibaha o’umo, karakara obo nouido emaaimoi. 37Nei naiba iaowa: Ina rovia Iudaia pai‐duburi, ro himiaro taroitorairo. 38Wia nou opu ohudo titi naiba owateaumo, NOURI IUDEA PAI‐DUBURI.
39Ina ubauba dubu na’u sataurowa otomai, nouro nouido naibaha emamautiwa, nou naiba iaowa: Ina ro Kerisori ro himiaro taroitorai wia imeiti tanitoraimama. 40Wia ubauba dubu ataro naibaha imowameai, nouido naiba emadohiomai naiba iaowa: Ro Iehovaido tore emahebidio tatora, mabu nouri na’u wiha nou aibo roro tau rowea? 41Ina nou meaha imeiti orohiaitoi mabu nouri imeiti himia ubauba kidia wiha noweadudo, wia dubu nouri na’u uba na nouro ododiai biahai. 42Wia nouro Iesuido naiba iaowa: Pai‐dubu e, ina ro bububatito odorowa, mo tanararomoro. 43Wia Iesu nouido naiba iaowa: Naiheha mo roido ainaro, Hiwio nouri ro momu aiwamidioi Paradaisowa.
44Nou ta’uwa hiwio guriwa kotoa tariwai, ina durii oopo oopowa naibaha imodoiia doho tariwai. 45Ina hiwio durii naibaha oito wia Tana‐moto pirihuo hipura, turihaito naibaha arakekea. 46Ina Iesu auwo wade gema naibaha imotua, nou naiba iaowa: Aba e, Mo urio ro tuito moro ainamaai; ina nou wadei idaro nou naibaha oihiai. 47Wia nou ta’uwa gavana kekero nouri kidodiai nana’i naibaha iauriwa nou Iehovaido naibaha emabitiwa naiba iaowa: Naiheha, dubui nouri nou auwo mea duburi. 48Wia oubi gema, nouri nei naibaha idabuaumo nana iaurimoi, ina nouri kidodiai nana neiio naibaha iauriwaumo nei himia bodoro neiio naibaha eremamadouwaumo naiba araiwutumo. 49Wia nou himia oubi auwoha wia nou dooudo korobodo upibaio’i Galilaiaudo, auudo omotoiwaumo, nouri na’i nou eauriwaumo.
50Ina dubu na’u paina Iosepa, nouvia wade kidodiai dubu na’uri, ina nou dubu meari wia naihehari. 51Wia nouri nana neiio nou idodiaiwaumo nou aioroboritidiowa. Nou Arimataio duburi, nouri Iudaia oubi oopo hapuo kereri, wia Iehova bububati nourovia naibaha omotoituti. 52Nouri dubu Pilatoido naibaha o’uwaro wia Iesu goho emaai naibaha atodoi. 53Wia nouro nou satauroudo naibaha oworuorou ina tamatama hipuraito naibaha oomutiwaro wia gabidi batiwa naibaha edeawa, batii nouri akabu uu otoro, dubu ata nouowa opuhe biahai. 54Wia hiwio nouri nei nana kidodiaii hiwiori, wia Sabati hiwio tariwai. 55Wia nou dooudo korobodo upibaio amida’i Galilaiaudo, neiio dooudo naibaha orobodowaumo wia nou goho kowouwa neiio naibaha eauriwaumo. 56Wia nei naibaha araiwaumo wia nibo mea nanara diomora neiio meaha naibaha idodiaiwaumo.
Wia Sabati hiwio nei hera naibaha emidiowaumo, bubui naibari.
Currently Selected:
Luka 23: KXW1941
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1941.
