Luka 5

1Wia nou ta’uwa oubi gema nouido naibaha orotatewaumo, Iehova kiao wade irovidiomoi; nouro Genesareta auwo‐turi barawa naibaha otoa. 2Wia pe neewatoi auwo‐turi barawa iwodaudiomama nouro naibaha iaurimama wia na kirobo oubi neitiudo naibaha ira’iwutiwaumo nei himia kamahu naibaha iduutiwaumo. 3Wia pe ata’i nouowa nouro naibaha orovia, Simona pe nouri, wia nouro nou naibaha atodoi kekebo hopudo owahoiodi‐dioi wia nou naibaha emi, oubi gema pe turudo nouro naibaha iatomuaiwa. 4Ina nou kiao wade naibaha opoiio, Simonaido nouro naiba aro: Damoito tawaho’iodidio wia ro kamahu obowa tadobia, na midoutimo. 5Wia Simonaro naibaha omowameai nouido naiba iaowa; Auwo dubu e, imo duo nouri kiwaati kiwaati ina imoo na iroboumo biahai ata ro wadeito nou waho’io‐didiodaidumo mo kamahu ainodobiadai. 6Ina neiio naibaha odobiaumo, na godogodo neiio naibaha imowaobeaumo wia nei kamahu naibaha arahiruti. 7Wia nei himia pe ata oubi nei naibaha iama’uotiumo neiio nei iwabaimoi; wia nei naibaha o’umo wia pe neewa naibaha iapeemama kiruruo tariwai. 8Ina Simona, paina ata Pita, naibaha eauri, nouro naibaha omoa, Iesu popudo naibaha iohiai wia nou naiba iaowa: Pai‐dubu e, mo tanebeede ro, nouri mo tiaha uba duburi; 9mabu nouri nou wia neiio noumu auwoha tiaha imaeawaumo nouri na horohoro neiio tau iroboumo. 10Wia Ioanera Iakobora, Sebedaio mere neewari, neiti Simona sipuri nei aibo neitio naibaha emaeawaudo. Wia Iesu Simonaido naibaha iaowa: Tore mo’a, ina doo roro oubi aiwai‐roboi. 11Wia nou ta’uwa neiio pe neewa auwo‐turi barawa naibaha iaririumo, nana auwoha neiio naibaha ibeede’umo wia nou dooudo naibaha orobodowaumo.

12Ina hiwio ata, na’u oopowa nou naibaha emidiowa, dubu ataro lepera temeteme ramu, Iesu naibaha eauri wia nou hopowa naibaha omoa naiba imohorai, nou naiba iaowa: Auwa‐dubu e, Ina ro nirowa mo sovio taiba nododiaidai ro umori. 13Wia Iesu nou himia tu naibaha ototuro, nouido naibaha atibodoi, nou naibaha iaowa: Mo niro, ro sovio taiti. Ina nou ta’uwa hagohagoha lepera temeteme noudo naibaha ebeede. 14Wia Iesu nouido wade modoboito arowa: Ro oubido wade ia’o aue wia ta’u ro himia ko’u naveito, hoho tawaevia kohena‐dubuido, niainiai nana, irio katoai wiha, tamaai naiba Mose wade modoboito oubido iwaeviamoi. 15Ata ina nouri nou pai oopo gemawa naibaha oboowa wia oubi gema naibaha idabuaiwaumo, nouido orovidiomoi wia nei himia temeteme nana meaha iwaidioi. 16Wia nou noudo burubatito naibaha o’uro wia wade kirodumeaito naiba aro.

17Wia hiwio ata, nou ta’uwa nouro naibaha iatomuaiwa, Parisea oubi wia bubu pai oubi nouowa naibaha emidiowaumo, Galilaia wia Iudea oopo‐oopo auwoha nei mabudo wia Ierusalemaudo neiio noito naibaha idoutiwaumo. Wia Iehova pupuo na’i noumu airia nei meaha iwaidioi. 18Oubi amida’o muo ramu dubu, hobo ohuwa nouido naibaha owoumo; nei Iesuido ko’u nave naibaha omohowaumo muo ramu dubu nou hohowa edeamoi. 19Ina nou ta’uwa owodo bati neiio oweaumo biahai mabu nouri oubi godogodori, nei moto ohuito naibaha ovioumo wia neiio evia pituu naibaha emaeraumo wia nou moto goroito naibaha oworuoumo tetepe ramu oubi turiwa, Iesu kotoi bati gamoo. 20Ina Iesuro nei himia kiraromodio na’i naibaha iauriwa, nou nouido naiba iaowa: Dubu ro himia ubauba kidia auwoha tau ripiti. 21Wia titi‐oubira, Parisea‐oubira neiio atodoimoi naibaha iaiiumo, nei naibaha iaowaumo: Boti nouri? Ubauba kiao wadei nou airiao. Boti dubu nou pupuo ramu ubauba kidia airipitidai? Iehova nou gauwoha. 22Ina Iesu nei himia kiraromo na’i naibaha eauriwa nouro neido naibaha imowameai naiba iaowa: Tounai rio himia niro gorowa naibaha riraromodiodumo? 23Touwai pauwoito kiao wade, naiba aroi, Ro himia ubauba kidia tau ripiti wia naiba aroi, Taibua, ta’u. 24Ina nouri rio umo aroitidumo Oubiha‐mere nou pupuo ramuri oopo‐oopo auwoha, oubi ubauba kidia airipitidiodai, nouro muo ramu dubuido naiba iaowa: Roido mainaro, taibua, hobo taumai, ro motoito ta’u. 25Ina nou ta’uwa nei hohowa nou naibaha o’iboa, nou himia korou bati naibaha oviai, nou himia motoito naibaha o’uro. Iehovaido nou naibaha emabitidiotuti. 26Wia nei auwoha aiemaeawaumo, Iehovaido naibaha emabitidiowaumo; nei tore imahebidiowaumo wia naibaha iaowaumo: Timaha na’i hiwio nouri imoo tau neauridumo.

27Nouri nana dooudo nou naibaha oworoho wia gavana wiha keauri dubu, paina Levi, nou naibaha eauri, nou gavana wiha motowa emidio. Wia nouro nouido naibaha iaowa: Mo tanabodoro. 28Wia nana auwoha nou naibaha imeheai naiba otoa nou dooudo naibaha orobodowa. 29Wia Levi nou himia motowa auwo horiomoo nouido naibaha ododiai wia gavana wiha keauri oubi godogodo wia oubi amida neimu emiwaumo. 30Wia titi‐oubira, Parisea‐oubira nou kitomudio mereido naibaha imama’utiwaumo naiba iaowaumo: Gavana wiha keauri oubimu wia ubauba oubimu rioo teiri rihodumo wia teiri ridiodumo? 31Wia Iesu imowameai naiba iaowa: Pupupupuo oubi doketa niro imahebidioumo biahai, temeteme oubi nei himia gauwoha. 32Mea oubido ituai mo ko’u biahai, ubauba oubi gauwoha nei ituai maino’uro, nei imini imowaimoi. 33Wia nei nouido naibaha iaowaumo: Ioane kitomudio merei dou iho tato remidiodiodumo hiwio godogodo wia wade kirodumeaito naiba riaodiodumo, Parisea kitomudio mere nei naibari, ata ro kitomudio mere airihodiodumo wia airimediodumo. Teiri? 34Iesu neido naiba iaowa: Teiri o’bora dubura oititoiwa, mabu oubi dou iho tato remidiodumo nouri hiwio’i orio dubu neimu emidiowa? 35Doo tauu aiwau‐ro’ui ina orio dubu nei aueudo aubuai‐mowa, hiwio nouri neiio dou iho tato aiwaimo‐emidioi. 36Wia oro‐aibo wade neido nou ina iaowa: Dubu ata orio hipura kere, mea uduuduoudo kikekea biahai, pamu uduuduo owateai, mabu nouri orio uduuduo nouro aiwakekeai wia orio hipura kere nou modobo biahai pamu hipurawa. 37Wia dubu ata orio wine tauo koko tama wauraubuwa karate biahai mabu nouri doo orio winero wauraubu aiwapoiiai wia wine naibaha waruodoi wia wauraubu uba naibaha waiti. 38Nouri orio wine orio wauraubuwa karateha tarate ina neiti meahari. 39Ina dubu ata tauo wine tau idio, orio wine nou niro biahai nouri nou naibaha iaowa, Tauo nou meahari, orio nou mea biahai.

Currently Selected:

Luka 5: KXW1941

Highlight

Copy