Mareko 3
3
1Nou sunagoito ina naibaha odoro wia dubu nouowa kemidio, karawo karawo tu ramu. 2Wia neiio Iesu aireauriwaumo noupa nou tui meaha arowaidai Sabati hiwiowa. Neiio nou ema’utimo niroi. 3Wia nou tu karawo karawo dubuido naiba aro: Tatoa, ta’uro. 4Wia nou neido naiba iaowa: Tonai meamea kidia Sabati hiwiowa, mea na ododiaira e uba na ododiaira; kiiro kowoaira e epiaira? Wia nei mubaha naibaha oitiumo. 5Ina Iesu opuito naibaha iremete’utiwa, duriduri ramu; nou imini mibo emahebidiowa, nouri nei giopu karakarari, ina nou dubuido naiba aro: Tu tatuturo. Nou tu aiotuturo wia nou tu meaha naibaha oiti ata tu aibo. 6Ina nou ta’uwa Parisea oubi naibaha orowohuomo wia Heroda oubimu naibaha idabuaiwaumo, neiio naibaha oromododiaiwaumo, Iesu taiba epiamoi.
7Wia Iesu, nou kitomudio meremu, auwoturito naibaha o’umo wia auwo oubi gema nou dooudo naibaha orobodowaumo, wia Iudaiaudo, 8Ierusalemaudo, Idumeaudo, Ioridana hapudo wia Taironara Sidonara mabuwa oubi, auwo oubi gema nouido o’uwaumo, nou ta’uwa timaha auwo nana nouro idodiaiwa, nei naibaha orovidiowaumo. 9Wia Iesu nou himia kitomudio mereido naiba aro, pe na’u nou omotoimoi nouri oubi gema nouido arateuti tore. 10Nouri oubi gema nouro meaha tau iwai mabu nouri temeteme oubi auwoha nouido naibaha oroho’iutiwaumo, nouri neiio nou atibomoi. 11Wia uba urio ramu oubi ina neiio nou naibaha eauriumo, nei nou hobo mabuwa naibaha oromooutiwaumo naiba imakakaiwadiowaumo: Rovia Iehova Mereri. 12Wia nouro neido wade modoboito iaowa: Rioo mo owaduutimo aue.
13Nou ta’uwa akabuito nou naibaha ioro, oubi nou niroi nouro nei naibaha itua ina nei nouido naibaha o’umo. 14Nouro 12 oubi naibaha imapoiwa, nei noumu emidiomoi nou niroi. Nou niro nei itiodoi totumu iaomoi. 15Wia nou niro nei pupuoito temeteme na iwahiitimoi wia uba urio’i iheemoi. 16Simona paina ata Pita, nouro idodo. 17Wia Iakobo, Sebedaio mere, wia Ioane, Iakobo niamari, neiti ete paina nouro imidomama, Boanereito, paina nouri Gururu‐mere. 18Wia Anederea wia Pilipo wia Batolomaio wia Mataio wia Toma wia Iakobo, Alepaia mere wia Tadio wia Simona Kanenia dubu. 19Wia Iuda Isakariota, nou Iesu piroha kowahuo dubu.
Ina nei motoito idaidoutiwaumo. 20Wia oubi gema ina idabuaiwaumo, ina nouri nei dou iho raihe. 21Nou ta’uwa nou himia oubi naibaha orovidiowaumo nei naibaha o’umo nou ohiaimoi nouri neiio aiaromo nou aiwahomio. 22Wia nouri Ierusalemaudo koroworuo titi‐oubii, neiio naibaha iaowaumo: Nou Belesebulo airiworoho, wia uba urio nouro naibaha riahoiuti Uba‐urio pai‐mere pupuito. 23Iesuro nei nouido naibaha itua. Nou neido oroaibo wadeito naibaha iaowa: Teiri Satanaro Satana riahoiuti? 24Ina na’u bububati nei erema’iaiwa nou tutu o’a raihe. 25Ina na’u moto oubi nei erema’iaiwa nei tutu o’a raihe. 26Ina Satana nou himia otoawa nou himia kihi orowai emaiwa nou tutu o’a raihe, nou aiwaropoiioi. 27Pupuo mere motoito, dubu ata odoro raihe nou himia nana piroito owamei, opuito nouro nou tura konora kotohitiha otohiti wia nou ta’uwa nou himia moto nana’i nouro piroito aiwawamei. 28Naiheha mo rioido ainaro: oubi auwoha nei himia ubauba kidia auwoha aiwai‐ipiti wia nouri ubauba kiao wade nei naibaha iaowaumo, nouri nouro aiwai‐ipiti. 29Ata nouri duburo, ubauba kiao wade Tana urioido naibaha iao, nou himia ubauba kidia ipiti raihe, nouro tau idodiai karae karae uba nana’i. 30Mabu nouri nei naiba aroumo: Nou uba urio ramuri.
31Nou ta’uwa nou himia mamu wia niamamio naibaha o’umo; nei kahitowa otoaumo, mere ata neiio nouido otiodoumo nou otuai. 32Wia oubi gemao nou mabuwa aiowahohoraiwaumo neiio nouido naibaha aroumo: Taiauri ro mamura niamamiora nei ro romohodumo, kahitowa. 33Wia nou neido naibaha imowameai naiba iaowa: Botiri mo mamu wia mo niamamio? 34Nou itoito iremeteutiwa nou kowahohoraiwa oubii: nou naiba iaowa: Taiaurimo mo mamu wia niamamio. 35Nouri oubio airidodiaidaidumo Iehova niro na’i, nouri mo niamamiora nirabomiora mamura.
Currently Selected:
Mareko 3: KXW1941
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1941.
