Mareko 6

1Wia Iesuro nouri bati naibaha emeheai wia nou himia oopo hapuoito naibaha araiwai wia nou himia kitomudio mere nou dooudo naibaha orobodowaumo. 2Ina Sabati hiwio da’u, sunagowa nouro iatomuai naiba ia’i, ina nou ta’uwa oubi godogodo nei nou orovidiowaumo neiio aemaeawaumo naiba iaowaumo: Dubunu nana nouri godogodo tou batiudo riviatuti wia touna imini meari nouri dubuido nou remaatiro wia tounai nouri pupuito kiwaati na’i nou tuito nou rimododiaiwa? 3Nouvia ive dubura? Maria merera? Iakobora Iosera Iudara Simonara nei namura? Nou himia nirabomio imomu badi emidio tatora? Wia nei nouido gunuuni iatiwaumo. 4Ina Iesu neido naiba iaowa: Peroveta dubu nou pai biahai nou himia batibatiwa wia nou himia oubimu wia nou himia motowa. 5Nou oopo’i nouowa pupuito kiwaati na’i nouro taiba idodiai, na’u amida uba kirouti oubi, godo biahai, nou tuhaito iatibo wia meaha naibaha oitiumo. 6Nouro naibaha emaeawa, mabu nouri nei araromodioumo biahai

Wia nou oopo oopowa naibaha orohotuti naiba iatomuaituti.

7Nouri 12 oubi nouro naibaha itua nei nouido o’umoi wia nei neewa neewaha itiodutiwa. Nouro neido pupuo naibaha imaatiwa, uba urio iheemoi. 8Wia nouro neido wade modoboito iaowa: Navewa rio na ata imemo aue, na’u gomuhuha; dou biahai, kosopu biahai, moni ba’ewa biahai. 9Douboi konoha tarovioruriomo; neewatoi uduuduo orovioruriomo aue. 10Wia nou neido naiba iaowa: Tou motoito rio idoutimowa nouowa tamidioumo rio noudo oropoiiowa. 11Oubi amidao rio iobumo tatowa wia oubi rioido irovidioumo tatowa nou ta’uwa rioo nei emeheaiwa, tuotuo taimomidimo rio himia konoudo, nei himia ubauba kidia nei hohowa imapoiwamoi. Naiheha mo rioido ainaro; kemeiwotai hiwiowa, Sodomora Gomorara keke uba kidia wiha aiwaidooweai, ina nei himia oopo auwo uba wiha aiwaimo‐oweai. 12Wia nei naibaha o’umo, naibaha itomututiumo, oubi nei himia ubauba kidiaudo imini kimowaiha imowaimoi. 13Wia godogodo uba urio neiio naibaha iahoiutitutiumo, wia temeteme oubi neiio diomoito naibaha imadititutiumo meaha naibaha oitutiumo.

14Wia Heroda pai duburo, Iesu paii naibaha idarovidioro, nouri nou paina oopo oopo naibaha oboowa; nou naiba iaowa: Ioane Babatiso nou koihiaudo tau oritorai, mabu nouri pupuo nana noumu naibaha iwaeviatutiumo. 15Amida naiba iaowaumo: Elia nouri, amida naiba iaowaumo: Peroveta dubu nouri e peroveta dubu na’u nou aibo. 16Ina nou ta’uwa Herodaro idaorovidio nou naiba aro: Ioane nouri, nouri moro opu kahiai mereri nou koihiaudo tau oritorai. 17Nouri Herodaro nou himia, oubi naibaha itiodoi Ioane ohiaimoi; wia durii daimowa nouro nou naibaha otohiai, nouri Herodia mabu, nou himia namu o’boa, Herodaro nou naibaha emidai. 18Nouri Ioane Herodaido naiba iaowa: Bubu naiba o’a biahai ro namu o’boamu idabuai. 19Nouri Herodiaro Ioane gunuunito owaiwa, nou niro nou epiai wia nave nouro owea biahai. 20Nouri Herodaro, Ioaneido tore aatiwa, nou umo naibaha oiti Ioane auwo mea duburi wia tana‐duburi, nouro nou meaha naibaha eauri, ina nou wade nouro naibaha irovidio, nou imini godogodoha iraromodio, ina nou geii ramu orovidiowa. 21Ina nou ta’uwa mea hiwio ida o’uro wia Herodaro nou himia koroto hiwiowa, horiomoo naibaha ododiaiwa nou himia pai oubido wia opuito keauri oubido wia auwoauwo oubido Galilaiaudo. 22Ina Herodia behe naibaha odoro naiba amawa wia Heroda nou himia mabu oubimu nouro nei geii iwai wia pai‐duburo beheido naibaha iaowa: Tanatodoi tounai ro niro wia moro roido ainemaaidai. 23Nouro nouido wade pupuito iaowa: Nouri na mo roro atodoiwa noupa hapuo kere mo nana’i, moro roido ainemaaidai. 24Nou naibaha ohuo wia nou mamuido aroro: Touna natodoidai? Mamuro naibaha omowameai: Ioane Babatiso opu. 25Wia behe pai‐dubuido hagohagoha naibaha odoidioro, naiba atodoi naiba aro: Doihabuo mo niro Ioane Babatiso opu kepuriwa, roro moido emaai. 26Nouri pai‐dubu nou duriduriha emahebidiowa: ata nou niro biahai wade omowaiwai, mabu nouri nou pupuito kiao wade’i, wia noumu kemidio oubi’i. 27Ina pai‐dubu na’u korowoto mere naibaha otiodoi ina wade modoboito nouido naibaha iaowa, nou opu owoi. Nou naiba o’uro wia Ioane opu ma’oaito ahiaiwa durii daimowa. 28Nou opu kepuriwa naibaha owouro, beheido naibaha emaai, wia behe nou himia mamuido naiba owateai. 29Nou ta’uwa Ioane kitomudio mere, neiio idarovidioumo, nei naibaha o’umo, nou goho neiio naibaha emidaumo wia gabidiwa naibaha omoboumo.

30Wia kitioduti oubi Iesuido naibaha idabuaiwaumo wia nei kidodiai na’i wia kitomudio na’i, nouido naibaha iwaduutiwaumo. 31Wia nou neido naiba iaowa: Taiimo imo himia gauwoha batito, hera keke noua emidiomoi; mabu nouri oubi godogodo nei korohomoi wia karaiwutimoi, kiho ta’u nei oweamo raihe. 32Nei peito piroha naibaha abumo buru batito. 33Oubi amidao nei ko’uwa naibaha iauriumo, wia godogodo oubi amidao nou umo naibaha oitiumo wia nei noito konoito imaiowaumo auwoha oopo oopudo wia bati nouri neiio opuito oweaumo. 34Ina Iesu peudo naiba o’idimai nouro nei naibaha iauriwa, nou neido niainiai naibaha imahebidiowa, nouri nei mamoe aibori, dabi dubu tatori. Ina nou ta’uwa nana godogodo nouro neido naibaha imatomudiowa. 35Ina hiwio kahoiia tariwai, nou himia kitomudio mere nouido naibaha o’umo naiba iaowaumo: Nouri buru batiri wia hiwio kahoiia tariwai. 36Oubi taitiodoi oopo oopoito o’umoi, nei himia dou imemoi, nouri nei kihona biahai. 37Nou neido naibaha imowameai, naiba iaowa: Rio dou amida neido ta’imaatimo. Nei nouido naiba iaowaumo: Imo o’uira, 200 moni ramu, wia dou wiha ina neido ihoi imaatimoira? 38Nou neido naiba iaowa: Rio dou kopi taibari? Ta’umo iviai. Ina nei umo naibaha oitiumo nei nouido naiba aroumo: Dou 5 wia na neewa. 39Nou neido wade modoboito iaowa: Taroumo neido pohono ohuwa tanoba emiwamoi. 40Wia nei naibaha emiwaumo tutu tutu tanoba, tanoba amida 100, tanoba amida 50. 41Nouro dou kopi naibaha imidai wia na neewa. Nou toboroito naibaha iarowia, dou naiba imabiti, wia dou kopi naibaha ehebutiwa wia kitomudio mereido naibaha imaatiwa, neiio nei hoho mabuwa idiamomoi. Wia na neewa nouro naibaha imideamowa nei modoboha. 42Wia neiio naibaha ihowaumo wia niro naibaha iapeutiwaumo. 43Neiio naibaha iibiwaumo kiaho dou niae, 12 hao kiapeutiri, naiba na badi. 44Nouri dou kiho oubi nei himia modobo tariwai 5,000.

45Ina nou ta’uwa Iesuro nou himia kitomudio mere wade naibaha imowaduutiwa, peito orowutimoi Betesaida ata hapuoito opuito abumoi, ina nou himia gauwoha, oubi amida nouro naibaha itiodoi. 46Ina nouro nei daitiodoi, Iesu akabu barito naibaha ioro kirodumeaito wade aroi. 47Ina hiwio dahoiia, padaro pe auwo‐turiwa o’umo wia nou himia gauwoha hopuwa emidio. 48Kitomudio mere auwo daariha aibi abidiowaumo nouro nei idaiauri nouri hurama nei hohoudo. Wia duo gohowa nou neido naibaha o’uwaro; nou goiio ohuwa o’uwaro wia nouro nei bati ohodai. 49Wia nou ta’uwa neiio nou naibaha eauriumo obo ohuwa koroho’i, neiio naibaha iraromodiowaumo noupa uriori wia nei naibaha imakakaiwaumo. 50Nouri nei auwoha nou eauriwaumo wia nei imini godogodoha iraromodiowaumo. Wia nou hagohagoha wade neido naibaha iaowa: Geii taitimo; mo nouri; tore moa. 51Wia nou peito neimu naibaha orovia wia hurama naibaha arahiai wia neiio auwo niimo naibaha emaeaumo. 52Mabu nouri dou pupuito kiwaatii neiio araromomo biahai wia nei imini kokori.

53Ina ata hapuoito nei idabumo, nei Genesareta oopu oopoito naibaha aririoumo wia pe auwo turi barawa naibaha otohitiumo. 54Wia nou ta’uwa nei peudo naibaha ira’iwutiumo oubi auwoha Iesu umo naibaha oitiumo. 55Nei oopo oopowa hioito naibaha imaiiodiowaumo, uba kiro’uti oubi nei himia tetepe ramu neiio naibaha iworohowaumo, Iesu kemidio batii noito, ina nei umo aioitiumo nou nouowari. 56Nouri oopo oopowa nou kodorutiri, auwo oopowa wia keke oopowa wia komo batiwa; temeteme oubi neiio nave barawa iwoumiwawaumo. Neiio nou naibaha atodoumo nou hipura bara ematibodoimoi; wia katibodoi oubi auwoha nei meaha naibaha oitiumo.

Currently Selected:

Mareko 6: KXW1941

Highlight

Copy