Jon 12
12
Ra Tahuna Rani Hina.
SOPENA 12.
1Ra pohi limarave mine na Hanihani hina Salehauli, Iesu momalua me Petani veae Lasarusi momate mine isei movea motamaraha hina mate.
2Natuha tevei na hanihani mea; Mata motahaseahi hara, maa Lasarusi motea hire tesihe me na pilipili valuia.
3Natuha Mere molavi na huro hi na vurai spaiknart, na sule hina motavere, mojore ra ei Iesu, momosi ra ena hina vuluna: na poniponi hina vurai mosohoni na pea vunuvunu.
4Natuha motea hira uluo hina, Jutas Iskariot, matui Saimon, isei momahui nie, moaso,
5Sura sava tesavolivoliahi na vurai naa suri ra sule tahamaeto tari vahatolu sura rahu me ra tajuatipa?
6Mosaaso paleano suria momeje ra tajua tipa, maa suria inie na tahapapaliho, momata ra sule hira, mopalae.
7Natuha Iesu moaso, Juria tana vea, suri na rani hina japoviau movei na sanu naa.
8Ra tajua tipa tetitoho valui amiu tuitui; maa asatoho valui amiu tuitui.
9Ra tajua ra tari hira Ju tepinisi monieae: tesamalua suri Iesu hasena maa sura reni Lasarusi mono, isei movea motamaraha hina mate.
10Maa ra varese-prist tevali sura veimete Lasarusi mono;
11Suria Lasarusi ra tari hira telaho, terohoroho me Iesu.
12Inovi maa ra tajua ra tari tehuhurahi suri na Hanihani, ihisa teroho Iesu momalua me Jerusalem,
13Telavi na pahana hau, telaho sura pasuae, teaso pati, Hosana, motahonai na Varese hi Israel isei momalua me na hisei Moli.
14Iesu ihisa mopasu na ass taiti moati saheae; pala tiulia
15Oitena ine, Matuna hajae hi Sion, oirenia, na Moli himu momalua mosihe me na matuna ass.
16Ra sanu naa ra uluo hina tesapinisira me na majiha: maa ihisa Iesu motasahe me na majamajana, natuha teninima ra sanu naa tiulia suria, tevera sanu naa mea.
17Ra tajua tetoho valuia me na rani moore Lasarusi, me na moru hina, movea motamaraha hina mate, tevetivetia.
18Suri ra sanu naa mono ra tajua tepasuae, suria teroho movea ra varao uloulo naa.
19Suria ra Varisi tetapura aso, Otoroho otolavi sanu tipa. Ra tanoho vunuvunu telaho tahuna.
20Hire ra tajua tahahuhurahi suri na Hanihani ra valura ra tajua hi Kris.
21Hire tenumai me Vilip, na vanuana Petseta hi Kalili, tetuhae, teaso, Varese, tomeje na reni Iesu.
22Vilip molaho, movarai Antru; Antru me Vilip teravarai Iesu.
23Iesu moaso liliu mera, moaso, Na rani imalua ihisa tehale na Matui tajua.
24Motaharahu, aaso me amiu, Va na maena oni mosajovi me na tano mosamate, tomotoho hasena; maa va momate, tau movae tavere.
25Isei momeje na sena mauri, movei pelea; isei mosameje na sena mauri me na ulu naa, molavia me na mauri tuitui.
26Va te tajua movarao suriau, motahonai molaho tahuu: veae aitoho na pilau tahavarao motoho mono; va te tajua movarao suriau Tamau mohalea pa.
27Naano na talumeu momalumu, aaso na sava? Tamau, oiveau ajolo me na rani naa; maa suri na sanu naa amalua me na rani naa.
28Tamau, oihale na hisemu. Natuha na rorona tailahi imalua, moaso, Ahalea mine, ahalea vahatea maa.
29Suria ra tajua teturitohoae, terohoe, teaso mopirihi: valura teaso, Na enjel moaso mea,
30Iesu moaso liliu, moaso, Na roro naa mo sasumai Suriau, maa suri amiu.
31Naano na ilailahi hina ulu: naano na varese hina ulu naa morahutuhea.
32Inau, va tirahurahau me na ulu, arave pa ra tajua vunuvunu meau.
33Moaso palea sura pisera momate paleve.
34Ra tanoho teaso liliu mea, Toroho me na Leo Hauhaua na Kristo tomotoho tuitui: motoma oiaso, Tisirahuraha na Matuna tajua? na Matuna tajua isei?
35Natuha Iesu moaso mera, Na rani tohotoho reji me amiu. Otolaho ihisa na rani itoho, va na pohi momalua me amiu, suria isei molaho me pohitupu mosapinisi molaho veae.
36Ihisa na rani itoho otorohoroho me na rani sura amiu ra matuna rani. Iesu moaso ra sanu naa, molaho, motapuna punia mera.
37Maa movera varao uloulo ra tari me na pahora maa tesarohoroho mea.
38Sura na aso hina provet Isaia motaraae, moaso, Moli, isei morohoroho me ra seja vetiveti? Me isei mopise na hauhaua hina Moli?
39Tesarohoroho suria, pala Isaia motaaso,
40Movera matara tepisi, movei hauhaua ra lolora: sura tesarioriova hira matara, tesapinisi hira lolora, tetaha-perehera, tau avei mauri hire.
41Isaia na provet moaso na sanu naa me na rani moreni na majamajana, moaso suria.
42Maa ra tari hira malisa terohoroho mea; maa suria ra Varisi tesavetiveti suria va teputuhera me na pea hina lotu hira Ju.
43Suria temeje ra tajua teaso tahonai surira jivi temeje na aso tahonai sei Atua.
44Iesu moaso pati, moaso, Isei morohoroho meau, mosarohoroho meau maa me na tahasulau.
45Isei moreniau, moreni na tahasulau.
46Amalua inau na rani hina ulu sura isei tomorohoroho meau mosatoho me na pohitupu.
47Va te tajua moroho ne loeu maa mosarohoroho meau, asailailahi nie: suria asasumai sura ilailahi na ulu maa sura veijolo na ulu.
48Isei movotoa nau, mosalavi na loeu, motea moilailahi nie: na loeu moilailahi nie me na tahuna rani.
49Suria asaaso suriau; maa Tata tahasulau morahu ta meau na leo hauhaua, suri ra sanu aaso, suri ra sanu alalaa.
50Apinisi na sena Leo hauhaua inie na mauri tuitui: suria ra sanu vunuvunu alalaa, palahi Tata movaraiau, alalaa hire.
Currently Selected:
Jon 12: TLM9109
Highlight
Share
Copy
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
