Jon 14
14
SOPENA 14.
1Ototena mamahanu me ra lolomiu. Otorohoroho me Atua, otorohoroho meau mono.
2Me na vanuai Tamau ra pea ra tari. Va mosapaletuha avarai amiu mine. Alaho sura vei vavanao ra vonae suri amiu.
3Va alaho avei vavanao ra vonae suri amiu, atanumai pa, alavi amiu meau; sura inau veae, ototohoae mono.
4Veae alaho otopinisia, na rio hina otopinisia mono.
5Tomas moaso mea, Moli, tosapinisi oiiaho veae; paleve topinisi na rio hina?
6Iesu moaso mea, Inau na rio, na taharahu, na mauri; saitea monumai me Tata maa suriau.
7Va otopinisiau mine, otopinisi Tamau mono: otopinisia me otorenia mine.
8Vilip moaso mea, Moli oipise na Tata ta meja me momea meja.
9Iesu moaso mea, Aitoho minemine valui amiu maa oisapinisiau reji Vilip? inie moreniau moreni Tata; suria paleve oiaso, Oipise na Tata ta meja?
10Oisarohoroho inau aitoho me Tata, Tata meau? Ra leo aaso me amiu, asatapuu aso: maa Tata tomotoho meau movera varao.
11Oisirohoroho meau, Inau aitoho me Tata, Tata tomotoho meau; e oisirohoroho suria ra varao.
12Motaharahu aaso me amiu, Isei morohoroho meau, movei pa ra varao aivera mono; movera varao tahajia jivira naa; suria alaho me Tamau.
13Ra sanu vunuvunu ototuhara me na hiseu, aivera pa sura tehale na Tata me na Matuna.
14Va ototuha te sanu me na hiseu, aivea pa.
15Va otomejeau, otosiroho ra leo hauhaua hiu.
16Amatapisi pa me Tata morahu me amiu na Tahauma motatea sura tomotoho me amiu tuitui.
17Inie na Talume hina Taharahu: na ulu mosapinisi na lavia suria mosarenia, mosapinisia: maa otopinisia: suria tomotoho valui amiu, momauri pa me amiu.
18Asajuri amiu ra pora: anumai pa me amiu.
19Tohotohoreji na ulu mosatareniau; maa otoreniau: suria aimauri, otomauri pa.
20Me na rani natuha otopinisi pa aitoho me Tata, amiu ototoho meau, inau aitoho me amiu.
21Isei molavi ra leo hauhaua hiu, morohora, inie monejeau: isei momejeau Tamau momejeia pa, amejeia pa, atapuu piseau ta mea.
22Jutas moaso mea, mo-sa-Iskariot, Moli sura sava oipi-seho meja maa oisapiseho me na ulu?
23Iesu moaso liliu, moaso mea, Va te tajua momejeau, moroho na loeu: Tamau momejeia pa, amamurua ara-numai mea, aratoho valuia.
24Isei mosamejeau mosaroho na loeu: na loeu otorohoe mosapilau maa mopilai Tata tahasulau.
25Ra sanu naa aaso me amiu ihisa aitoho valui amiu.
26Maa na Tahauma, na Talume Tapu, isei Tata mosulae me na hiseu, mopise pa ra sanu vunuvunu me amiu, movei amiu otoninima ra sanu vunuvunu avarai amiu mine.
27Ajuri na lolo-tamautu me amiu: na seu lolotamautu ajuri me amiu; asarahu palahi na ulu morahu ta me amiu. Ototena mamahanu me ra lolomiu, ototena ine.
28Otoroho paleve aaso me amiu, Alaho, ataliliu me amiu. Va otomejeau otoejieji pa suria aaso. Alaho me Tata: suria Tamau mosale jiviau.
29Naano avarai amiu, mine imalua, sura me na rani imalua, otorohoroho meau.
30Taupa asalalaa vahatari me amiu: suria na varese hina ulu naa monumai, molavi sanu tipa meau.
31Maa sura na ulu mopinisi ameje Tata; pala Tata moaso meau, aivea. Otomaraha, motahonai tolaho.
Currently Selected:
Jon 14: TLM9109
Highlight
Share
Copy
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
