Jon 6
6
SOPENA 6.
1Tau ra sanu naa Iesu molaho tusi na tasi hi Kalili, na valuna hisena Tiperias.
2Na vau tahajia molaho me na tahuna suria tereni ra varao uloulo movera me ra tajua taharojo.
3Iesu mosahe mena vuti, mosihe tasivoae valui ra uluo hina.
4Na Hanihani Haulira hira Ju motaroroi.
5Ihisa Iesu moriosahe moreni ra tajua ra tari tehuhurahi mea, moaso me Vilip, Veae tovoli na pret sura ra tajua naa tehani hara?
6Moaso na sanu naa sura tapusia: suria inie mopinisi na sanu movea.
7Vilip moaso liliu mea, Na pene tari vaharua hina pret mosatavere hira, sura hire vunuvunu tehani taiti.
8Motea hi ra uluo hina, Antru, na tuahai Saimon Piter, moaso mea,
9Na uluo naano molavi na pia molima hina pret me na maji morua: mosamea me ra tajua ra tari.
10Iesu moaso, Otovei ra tajua tesihe tasivo. Na pere motavereae. Ra tajua tesihe tasivo na tairau vahalima.
11Iesu molavi na pia hina pret: tau moaso tahonai suria, morahu ta me ra uluo hina, ra uluo hina teraurau me ra tajua tesihe tasivo: tevei palahi me na maji pala momea.
12Tau tehani vua, moaso me ra uluo hina, Vilehuhure ra jajana sura sanu tipa mopelahi.
13Suria tevilehuhurea, tesohoni ra taha havulatea vana morua hina jajana pia molima hina pret itoho tau tehani vua.
14Natuha ra tajua ihisa tereni na varao uloulo Iesu movea, teaso, Motaharahu inie na provet isei momaraha pa me na ulu.
15Ihisa Iesu mopinisi temeje na numai sura lavia ilaho sura vea na Moli, molaho hasena vahatea maa me na vuti.
16Ihisa na maso momajojore ra uluo hina tesivo me na tasi.
17Tesahe me ure, telaho tusi na tasi, tesahetoho me Kaperneum. Naanoi mopohi, Iesu mosamalua mera reji.
18Na tasi motahajia suria na lahi tahajia morovo.
19Tau tesua na kilometer motolu e movate, tereni Iesu molahome na vusuhana tasi, mosumai taroroi me na ure: teine.
20Maa moaso mera, Inau: ototena ine.
21Natuha teejieji, telavia me na ure; vahatea na ure molavi na vonae telahoae.
22Inovi maa ihisa ra tajua teturi vala palena tasi tesareni na valuna ovo maa motea ra uluo hina tesaheae, Iesu mosavano valui ra uluo hina me na ovo, maa ra uluo hina telaho hasera.
23Maa ra valura ovo temalua me Tiperias tenumai taroroi me na vonae veae tehani na pret tau na Varese moaso tahonai suria.
24Inovi maa ihisa ra tajua tesareni Iesuae, ra uluo hina mono, hire tesahe me na ovo, tevano me Kaperneum sura tiroe.
25Ihisa tepasuae vala palena tasi, teaso mea, Varese, oinumai me na hisa?
26Iesu moaso liliu, Motaharahu, aaso me amiu, Oto-tiroau, sa suria otoreni ra varao uloulo, maa suria otohani ra pia, otohani vua.
27Ototena varao suri na hanihani motaujano, maa otovarao suri na hanihani toitoho, na hanihani hina mauri tuitui. Na Matuna Tajua morahu na hauhaua naa ta me amiu: suria Atua Tata motami Iesu.
28Natuha teaso mea, Paleve tovera sanu Atua momejeija tovera?
29Na sanu Atua momeje amiu otovera, Iesu moaso, inie na rohoroho me na Varisula hina.
30Suria teaso mea, Oivei na matamata na sava sura torenia torohoroho meho? Oivei na varao sava?
31Ra tamaja tehani na manna me na Tano-Oru; pala moulia, Morahu na pret hina tailahi sura hara.
32Natuha Iesu moaso mera, Motaharahu, aaso me amiu, Moses mosarahu me amiu na pret me na tailahi; maa Tamau morahu ta me amiu na pret taharahu hina tailahi.
33Na pret hi Atua inie isei mosumai me na tailahi, morahu na mauri me na ulu.
34Tau teaso mea, Moli, oirahu na pret naa ta meja tuitui.
35Iesu moaso mera, Inau na pret hina mauri: isei monumai meau mosamarohati pa; isei morohoroho meau mosamarorou pa.
36Maa aaso mine me amiu, Otoreniau mine, maa otosarohoroho meau.
37Hire vunuvunu Tata morahu ta meau tenumai pa meau: isei monumai meau aisavea molaho.
38Asasumai me na tailahi sura vei ra sanu amejeira maa sura vei ra sanu inie isei mosulau momejeira.
39Momeje na sanu naa—asavei pele motea hire vunuvunu morahu ta meau, maa aivera tetamaraha hina mate me na Tahuna Rani.
40Tamau momejeira vunuvunu tereni Matuna, terohoroho mea, telavi na mauri tuitui, inau aivea motamaraha hina mate me na Tahuna Rani.
41Tau ra Ju tepuruhutu mea suria moaso, Inau na pret mosumai me na tailahi.
42Teaso, Inie Iesu na matui Josev, topinisi na tamana na tinana? motoma moaso, Asumai me na tailahi?
43Suria Iesu moaso liliu mera, Ototena puruhutu.
44Saite tajua monumai meau va Tata isei mosulau mosaraveia: tau aivea motamaraha me na Tahuna Rani.
45Ra Provet teuli, Atua mopipisera vunuvunu pa. Hire vunuvunu teroho, tepinisi na Tata, tenumai meau.
46Saite tajua moreni Tata mine, maa inie isei mosumai me Tata: moreni Tata mine.
47Motaharahu, aaso me amiu, Isei morohoroho meau molavi na mauri tuitui.
48Inau na pret natuha hina mauri.
49Tamamiu tehani na manna me na Tano-Oru, temate mine.
50Naano na pret mosumai me na tailahi, na tajua mohania mosamate.
51Inau na pret tahamauri mosumai me na tailahi. Vai te tajua mohani na pret naa momauri pa tuitui; na pret arahu me amiu inie na visihou, arahu nie suri na mauri hina ulu.
52Suria ra Ju teasoaso, Paleve na tajua naa morahu ta meja na visihona sura hania?
53Natuha Iesu moaso mera, Motaharahu, aaso me amiu, Va otosahani na visihona Matuna Tajua, otosaoomi na jaena, saite mauri me amiu.
54Isei mohani na visihou, mooo na jaeu, molavi na mauri tuitui: inau aivea motamaraha me na Tahuna. Rani.
55Suria na visihou inie na hanihani taharahu, na jaeu na sanu-oo taharahu.
56Isei mohani na visihou, mooomi na jaeu momauri meau, inau mea.
57Pala na Tata tahamauri moveau na Varisula hina, aimauri suria momauri; palahi isei mohaniau, momauri suria aimauri.
58Naano na pret mosumai me na tailahi; mosapala ra tamamiu tehani na manna, temate mine: isei mohani na pret naa momauri tuitui.
59Ra sanu naa moaso me na pea hina Jotu hira Ju me na rani mopisahi me Kaperneum.
60Suria ra tari hira uluo hina ihisa terohoe teaso, Naano na aso hauhaua; isei mopinisi na rohoe?
61Ihisa Iesu mopinisi me na lolona ra uluo hina tepuruhutu, moaso mera, na sanu naa motohohoro amiu?
62Motoma vai amiu otoreni na Matuna Tajua mosahe veae tomotoho mine?
63Na Talume morahu mauri; na visihona tajua mosa-pinisia: ra leo aaso me amiu hire ra talume, hire na mauri.
64Maa valura himiu otosarohorohora. Suria Iesu mopinisi me na majiha isei hire tesarohoroho, mopinisi isei mojiho nie.
65Moaso, Suria aaso me amiu, Saite tajua mopinisi na numai meau, va Tata mosatuiturituae.
66Me na rani natuha ra tari hi ra uluo hina tesori mea, tesalaho maa mea.
67Natuha Iesu moaso me ra tajua havulatea vana morua, Otomeje na laho tureau mono?
68Saimon Piter moaso liliu mea, Moli, tolaho me isei? Iniho oilavi ra leo hina mauri.
69Torohoroho me toninima susuhi Iniho na Kristo, na Matui Atua tahamauri.
70Iesu moaso liliu mera, Alavi amiu na havulatea vana morua maa motea himiu inie na satuau.
71Moaso suri Jutas Iskariot matui Saimon: suria inie mojiho nie pa, motea hi ra havulatea na vana morua.
Currently Selected:
Jon 6: TLM9109
Highlight
Share
Copy
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
