Matiu 15
15
NA SOPENA 15.
1Tau ra Varisi me ra tajua hi na uli pepe temajuri me Jerusalem tenumai me lesu, teaso, 2Surasava ra uluo himu tesave ra vue ra varie tepisepisei ta meamamu? suria tesarasi na havera me na rani tehani hara. 3Tau motami, moaso ta mera, Surasava amiu mono otosave ra sanu Atua moaso, sura vue-miu? 4Suria Atua moaso, Oininima tahonae tamamu me tinamu: moasomono, Itea va ietieti suri tamana e tinana, motahonae imate. 5Maa amiu otoaso, Itea va iaso me tamana e tinana, Te sanu itea motahonae inau arahu ta meho, tomotapu me Atua; 6isaninima tahonae tamana. Amiu otove na leo hi Atua na sanu tipa suri ra vuemiu. 7Amiu, ra taha jihajiha, Aisaia na provet moaso taharahu mine suriamiu, moaso,
8Ra tajua naa teniriima tahonae inau hi na vavara;
Maa na lolora tomotoho neeva jujua tureau.
9Maa telotu tipa meau,
Tepisapisahi ra leo hi ra tajua pala leo hi Atua.
10Tau moorera tajua taha huhurahi tenumai mea, moaso ta mera, Otorohoe, otopinisia: 11Nasanu momajojore me na vavana tajua natuha mosavei oso nie; maa na sanu momalua me na vavana, natuha movei oso nie. 12Tau ra uluo hina tenumai, teaso ta mea, Osapinisira Varisi, teroho na aso himu naano tau, temamahanu suria? 13Maa motami, moaso, Ra sanu vunuvunu Tamau me na tailahi mosalavora, tivutira pa. 14Otoloo hire: hire ra taha tuli taha pisi. Va ra taha pisi tetuli ra tajua taha pisi, hirerua tirajovi tasivo me na moru motea. 15Tau Piter motami, moaso ta mea, Oipise na aso liholiho ta meamamu. 16Moaso, Amiu mono otolihelihei reji? 17Otosapinisia, na sanu momajojore me na vavana tajua toinosivo me na tiana, tau molaho tuahi me na vona na tena? 18Maa ra sanu taha malua me na vavana teruhusumai me na lolona; ihire tevei oso na tajua. 19Suria na ninima oso, ra ape, ra veiveileo, ra papaliho, ra lope, ra etieti teruhusumai mena lolona tajua: 20ihire ra sanu taha vei oso na tajua: maa va na tajua isarasi na havena me na rani ihani hana, natuha mosavei oso nie.
21Tau Iesu molaho ture na vanua nee, movano me ra vanua i Tair me Saiton. 22Tau te hajae hi Kenan itea majuri me ra vanua nee monumai, moore, moaso, Motahonae na lolomu imalumu meau, O Moli, matu i Tevit; matuu hajae momamahanu tohova hi na tamate motea. 23Maa mosatami mea. Tau ra uluo hina tenumai, teusia, teaso, Oisulae ilaho, suria moore me na tahuja. 24Maa motami, inoaso, Atua mosulau suri ra sip taha peli hi Israel hasa. 25Maa na hajae monumai, molotu mea, moaso, Moli, oituiturituau. 26Motami, moaso, Moso na lavi na hara paule sura putuhea me ra pesi. 27Maa inie moaso, Io, Moli: maa ra sipesi mono tehani ra taha vaevae tejovi tasivo ture na avaava hi na varese hira. 28Tau Iesu motami, moaso ta mea, O hajae, na semu rohoroho mohauhaua: motahonae na sanu omejeia inumai meho. Tau matuna hajae momauri me na sirani hina.
29Tau Iesu molaho ture na vanua nee, monumai taroroi me na tasi hi Kalili; mosahe me na vuti, mosihe nee. 30Tau ra tajua ra tariratari tesahamai mea, terahu valuita ra taha laho taviriahi, ra taha pisi, ra taha moto, ra taha hovi, mera taha rojo ra tari maa, tejurira tasivo me na e i Iesu; tau movei mauri hire: 31tau ra tajua vunuvunu tereni ra taha moto tevavaha, ra taha hovi temauri, ra taha laho taviriahi telaho tataholo, ra taha pisi terioriova, teuloulo suria: tau teaso tahonae suri na Atua hi Israel. 32Tau Iesu moorera uluo hina ta mea, moaso, Inau ajomi ra tajua, suria tetetoho valuiau na pohi tolu, na hara mojoa iae: asameje na sulara telaho temarohati, suria na epera tisamalumulumu me na rio. 33Tau ra uluo hina teaso ta mea, Amamalavi na pret veae me na vanua mosaite sanu ae, motavere suri ra tajua ra tari palea i? 34Tau Iesu moaso ta mera, Ra hamiu pret ae movisa? Teaso, Molimaraverua, morua hasa na maji mono. 35Tau movarai ra tajua tesihe tasivo me na tano; 36taumolavi ra pret inolimaraverua me ra maji; tau momatapisi, motope tusira, morahu ta me ra uluo hina, hire terahu ta me ra tajua. 37Tau hire vunuvunu tehanihani, tehani tiasihi: tau terahurahara turehe hi na hara, ra taha molimaraverua tetavere. 38Hire ra tajua taha hanihani ra tajua ra taripoe vati, ra hajae mono, ra paule taiti mono. 39Tau mosulara tajua telaho, tau moate me na ovo, monumai me na vanua i Makatan.
Currently Selected:
Matiu 15: TLM9109
Highlight
Share
Copy
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
