Matiu 22
22
NA SOPENA 22.
1Iesu motami, motalalaa ta mera me na aso liholiho, moaso, 2Ra sanu hi na tailahi tepala moli motea, move na hanihani hi na talahia hi matuna lamane, 3mosulara pilana tajua sura ore ra tajua movaraira mine tenumai me na hanihani hi na talahia: maa tevotoa na numai. 4Vahatea maamosulana valura pilana tajua, moaso, Otovaraira tajua avaraira mine, otoaso, Inau avei vavanao mine na pilau hanihani: ra pilau pulok me ra pilau sip taha posi teape mine, ra sanu tevavanao mine: otonumai me na hanihani hi na talahia. 5Maa teuru suria, tevano me ra sipilara varao, motea movano me na umana, motea movano me na pilana volivoli: 6na valura maa tehijitohoa ra pilana tajua, telosira, telosu meteira. 7Maa na moli mopuripuri; tau mosula ra pilana tajua hi na jumu, telosi ra tajua taha vei metei ra pilana tajua, tesuli na vanuara. 8Tau moaso ta me ra pilana tajua, moaso, Natalahia movavanao mine, maa hire avaraira mine tenumai mea, tesatahonae suria. 9Otovano me ra rio suria, tau ra tajua vunuvunu otopasuara, otovaraira tinumai me na hanihani hi na talahia. 10Tau ra pilana tajua naa tevano me na rio, telavi huhurera vunuvunu tepasuara, ra taha oso me ra taha tahonae: tau ra tajua ra tari tenumai me na talahia. 11Maa na moli moruhusahamai tau sura leleo ra tajua tenumai mea, morena tajua motea mosaite visivisina hi na talahia; 12tau moaso ta mea, Tuau, surasava oruhusa-hamai nai osaite visivisimu hi na talahia? Inie mosapinisa aso. 13Tau na moli moaso ta me ra pilana tajua, moaso, Otohajiri na havena, otohajiri na ena, otorahutuhea me na pohipohitupu; na tahi ae, na mamahanu ae. 14Suria avarai ra tari tinumai, maa alavira mosatavere.
15Tau ra Varisi tevano, tesitapura lalaa mera tilavia hi na aso hina paleve. 16Tau tesulara uluo hira me ra uluo hi Herot ta mea, teaso, Varese, amamapinisiho otaharahu, opise taharahu ra sanu hi Atua, osaine na tajua: suria osaleleo na epena tajua. 17Oivaraiamamu suria, oninima nasava? Amamarahu ta me Sisar na sule hi na moli, natuha motataholo, e mojoa? 18Maa Iesu mopinisi na pilara jihajiha, moaso, Surasava otovei tapusiau, amiu ra taha jihajiha? 19Otopiseau na sule hi na moli. Tau terahu na pene motea ta mea. 20Moaso ta mera, Na popora isei naa? na uliuli hisei naa? 21Teaso ta mea, Pila i Sisar. Tau moaso ta mera, Otorahu ta me Sisar ra sanu pila i Sisar; otorahu ta me Atua ra sanu pila i Atua. 22Tau terohoe tau, teuloulo, telaho turea, temule.
23Me na pohi hina na valura Satiusi tenumai mea, hire teaso na tamaraha hi na mate mojoa: tetuhae, 24teaso, Varese, Moses moaso mine, Te tajua itea va imate, mosaite matuna ae, tasina isitalahia me tupuna sura rahurahu ra matuna me tuahana. 25Ra tajua moli-maraverua tetoho meamamu mine, hire ra matuna hajae motea: na majihana motalahia tau, momate, mosaite matuna ae, momate ture i tupuna ta me tasina; 26na vaharuana mono mopalahi, na vaha-toluna mono, me na vahalimaraveruana. 27Tau me na tahu hira na hajae inie momate. 28Me na rani hi na tamaraha hi na mate itupu isei mera? suria hire vunuvunu tetalahia mea. 29Maa Iesu motami, moaso ta mera, Otoninima oso, suria otosapinisa pepe hi Atua, otosapinisi na hauhaua sei Atua. 30Suriame na rani hi na tamaraha hi na mate tisatalahia, tipala ra enjel me na tailahi. 31Maa, sura tamaraha hi ra taha mate, otosaevievi na leo hi Atua moaso mine ta meamiu, moaso, 32Inau na Atua hi Epraham, na Atua hi Aisak, na Atua hi Jekop? Atua mosa Atua hi ra taha mate, inie na Atua hi ra taha mauri. 33Tau ra tajua taha huhurahi terohoe tau, teuloulo sura sena lalaa.
34Maa ra Varisi, terohoe movei sori na aso hi ra Satiusi, tenumai huhurahi. 35Tau motea hira, na tijere motea, motuhae na sanu motea, sura vei tapusia, moaso, 36Varese, ive hi ra leo hi Atua mohauhaua jivi hira? 37Moaso ta mea, Oisimeje Iehova Atua himu hi na lolomu, hi na talumemu, hi na semu ninima. 38Iano na leo hauhaua hi Atua, na majiha hira. 39Navaharuana mopalahi, Oisimeje tuamu palaiho omejeiho. 40Na leo vunuvunu hi Moses, na aso hi ra provet vunuvunu mono, teaso pala i ra leo morua naa.
41Ra Varisi tetoho huhurahi reji Iesu motuhara na sanu motea, 42moaso, Otoninima nasava suri Na Kristo? inie matu isei? Teaso ta mea, Matu i Tevit. 43Moaso ta mera, Surasava Tevit, hi Na Talume Tapu, mojuria Na Moli hina, moaso, 44Iehova moaso ta me Na Mpli hiu,
Oisihe me na matuana haveu,
Me ua rani aijuri ra satuamu me
na vavara emu?
45Va i Tevit mojuria Na Moli hina, momatuna paleve? 46Tau saitea mopinisa tami mea, saitea mono motuhae ra sanu majuri me na pohi hina.
Currently Selected:
Matiu 22: TLM9109
Highlight
Share
Copy
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
