Matiu 5
5
NA SOPENA 5.
1Tau moreni ra tajua ra tari ra tari taha huhurahi, mosahe me na vuti: tau mosihe tasivo tau, ra uluo hina tenumai mea: 2tau moaso pipisera, moaso,
3Ra taha malumulurnu me na talumera teejieji: suria ra sanu hi na tailahi tesipilara.
4Ra taha tahi toho teejieji: suria titahimoti pa.
5Ra taha toho tamautu teejieji: suria ra sanu hi na ulu tisipilara.
6Ra taha marohati, ra taha marorou, hi na vei tataholo, teejieji: suria tihani tiasihi pa.
7Ra taha lolo malumu me ra tuara teejieji: suria na lolora timalumu mera.
8Ra taha lolo voevoe teejieji: suria tireni Atua pa.
9Ra taha tarajuri ra tajua tetoho tamautu teejieji: suria tijurira ra matu i Atua.
10Ra taha ra tajua tevei oso mera suri ra pilara vei tataholo teejieji: suria ra sanu hi na tailahi tesipilara.
11Amiu otoejieji me na rani hi ra tajua tiaso oso ta meamiu, tivei oso meamiu, tiaso jihajiha ra sanu oso suriamiu, suriau.
12Motahonae otoejieji tohova: suria na volimiu motahajia me na tailahi: suria palahi tevei oso me ra provet mine.
13Amiu na tasivuso hi na ulu: maa va na tatasiha se na tasivuso mojoa ae, otovei tatasiha ae hi nasava? mosata-honae sura sanu, motahonae sura putuhea, sura laho ae hasa. 14Amiu na rani hi na ulu. Te vanua itea me na vuti mosatoho punu. 15Ra tajua mono tetihe na pula, tesajuria me ria vavana huro, tejuria me na vusuhana sanu, tau motila parara ta mera me na lolona pea. 16Paletuha motahonae ra pulamiu titila parara me ra tajua, suria hire tireni ra pilamiu vei tahonae tiaso tahonae me Tamamiu me na tailahi.
17Moso otojuria tau inau asumai sura vei leelee na leo hi Atua me na leo hi ra provet: asasumai sura vei leelee hire, asumai sura vei taharahu hire. 18Aaso taharahu ta meamiu, Me na rani hi na tailahi me na ulu isori pa, na leo motea hi ra leo hi Atua isasori me na rani hira vunuvunu titaraae. 19Suria te tajua itea va ivei leelee na leo motea na taiti hi ra leo hi Atua naano, va ipisea palahi mono ta me ra tajua, tijuria na taiti hira me na tailahi: maa te tajua itea va ivera, va ipisera mono ta me ra tajua, tijuria na sale jivi hira me na tailahi. 20Suria aaso ta meamiu, va na pilamiu vei tataholo isatahonae jivi hi na vei tataholo hi ra tajua taha uli pepe me ra Varisi, otosaruhusahe me na tailahi.
21Otorohoe tau teaso ta mera mine-mine, Oitena vei mete na tajua; tea va ivei mete na tajua vahatea tivali suria: 22maa inau aaso ta meamiu, tea va ipuripuri tipa tuana vahatea tivali suria; tea mono va iaso ta me tuana, Omure, vahatea tivali suria; maa tea va iaso, Omuha, vahatea ivano me na hapu. 23Suria me na rani oilavi na pilamu rahuvuso ta na avaava me na pea hi na lotu, va oininima tuamu morohoho ooso, 24oijura pilamu rahuvusome naavaava me na pea hi na lotu, oivano, majiha amurua me tuamu orapuri vunu, tau oinumai, oirahu na pilamu rahuvuso. 25Motahonae amurua me satuamu oraasoaso valui vileahi, me na rani orapinisa vea; suria na satuamu isalaviho me na varese, tau na varese ilaviho me na pilana tajua, tau moputuheho ta na ima hi na hajihajiri. 26Aaso taharahu ta meho, Oisaruhusumai ae me na rani oivolia ra sule vunuvunu.
27Otorohoe teaso mine, Oitena veiveileo: 28maa inau aaso ta meamiu, Te tajua itea va iriovano me na hajae sura meje na vano mea moveiveileo mea mine me na lolona. 29Na matuana matamu va iveho ovei vasoosoo, oivutia, oiputuhea: suria na sopena epemu motea va imate, natuha motahonae jivi na epemu vunuvunu ivano me na hapu. 30Na matuana havemu mono va iveho ovei vasoosoo, oijimi tusia, oiputuhea: suria na sopena epemu motea va imate, natuha motahonae jivi na epemu vunu-vunu ivano me na hapu. 31Teaso mine mono, Te tajua itea va ijurutuhei tupuna, motahonae irahu na pepe hina ta mea: 32maa inau aaso ta meamiu, Tea va ijurutuhei tupuna va isasuri na veiveileo hasa, ivei tupuna na hajaetaha veiveileo: tea mono va italahia me na hajae tupuna mojurutuhea mine, inie iveiveileo.
33Vahatea maa, otorohoe teaso ta mera minemine, Oitena jihajiha sura semu aso hauhaua, oisive ra semu aso hauhaua ta me Atua: 34maa inau aaso ta meamiu, Toho na aso hauhaua; toho na aso hauhaua hi na tailahi, suria inie na sihesihe i Atua; 35toho na aso hauhaua hi na ulu, suria inie na atea-tena; toho na aso hauhaua hi Jerusalem, suria inie na vanua hi Na Moli tahajia. 36Toho na aso hauhaua hi na remu inono, suria osapinisa ve na vulumu movoevoe e momaeto. 37Motahonae na semu aso mopale Io, io; Aue, aue: na aso taha hauhaua jivi hi ra aso naa inie moso.
38Otorohoe teaso mine, Otovoli na matana tajua hi na matamu, otovoli na patina tajua hi na patimu: 39maa inau aaso ta meamiu, Oisitoho tamautu me na taha oso: maa tea va ilosiho me na matuana parimu, oitahapereheho ta mea na vala palena parimu mono. 40Tea mono va imeje na laviho ta me ra varese sura lavituhe na visivisimu, motahonae oijuria ta mea na tohohoro hi na visivisimu mono. 41Tea mono va iveho oisivano valuia na jiho motea, motahonae oivano valuia na jiho morua. 42Oirahu ra sanu ta me tea ituhaho, oisatahapereheho ture itea imeje na lavi ua pilamu sanu.
43Otorohoe teaso mine, Na lolomuivano me i tuamu, ihahara na satuamu: 44maa inau aaso ta meamiu, Motahonae na lolomiu tivano me ra satuamiu, otomatapisi suri ra tajua taha vei oso meamiu; 45tau amiu otomatu i Tamamiu me na tailahi: suria inie move na pilana maso momaraha ta ra taha oso, ta ra taha tahonae, mosula na usa ta ra taha lolo-tataholo, ta ra taha lolopahilu. 46Suria va na lolomiu tevano me ra tajua na lolora tevano meamiu, na volimiu nasava? ra tajua taha lava sule hi na mata ra sanu, hire mono tesavei palahi, e mojoa? 47Va amiu otoaso valui ra tuamiu hasa, otove nasava motahonae jivira vunuvunu? Ra tanoho me ra vanua pohipohitupu mono tesavei palahi, e mojoa? 48Suria amiu otositahonae tohova, pala i Tamamiu me na tailahi inie motahonae tohova.
Currently Selected:
Matiu 5: TLM9109
Highlight
Share
Copy
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
