Halloo 14
14
Abraami Looxin Kecoochee Wochoo
1-4Elaamee taatoo Kedorilameri beemmi yemeenooba ebi tunehe: Sodoomi taatoo Beeri, Gomoori taatoo Birishi, Adiimi taatoo Shinaabi, Tseboyimi taatoo Shemebeerinaa Tsoꞌari getteebeeti Belaahi taatoona aaraa gutte naton taatoo Kedorilamerich maddee beeheete. Tunebaani aaraa keejjinnee natooba, hukkoon shuuneheete. Elaamee taatoo Kedorilameri, Shinaaree taatoo Amirafeli, Elasaaree taatoo Ariyookinaa Goyimee taatoo Tidaalina ikkotteꞌi Sidiimi bamboochaa boonoshin kocha qanniꞌi, kechii hammiyeete; ebi xaaꞌoo and Kiikki baharo getteebeeti xaaꞌoone.
5Aaraa awuddinnee natooba, taatoo Kedorilamerinaa biinna tookkii ikkotteti taateenaꞌona hammiibee, Ashiteroot Qarinayimi katemooch beeti Refayeenaꞌon, Kaamee showooch beeti Zuzeenaꞌonaa Shaweeh Qiriyatayimi bakkooch beeti Eemeenaꞌonon kochii wochiyeete. 6Wotta Seyiri guudinaꞌooch beeti Hooreenaꞌon barahee gashooch beeti El Faraan beddaahaa yookkiꞌi, kochii wochiyeete. 7Aroochee guuddii wotteꞌi, Qadeeshi getteebeeti Een Mishifaat shaggiyeete. Amaleeqeenaꞌo bullinaa wotta Hatsatsoon Tamaari katemooch beeti Amooreenaꞌonon kochii wochiyeete.
8Aroyee gubb Sodoomi taatoo, Gomoori taatoo, Adiimi taatoo, Tseboyimi taatoonaa Tsoꞌari getteebeeti Belaahi taatoona ikkotteꞌi, Sidiimi bambooch boonoshi ginechinaꞌon kicii koyoyich qanniyeete. 9Elaamee taatoo Kedorilameri, Goyimee taatoo Tidaali, Shinaaree taatoo Amirafelinaa Elasaaree taatoo Ariyookina, ebi awudde taateenaꞌo, uuche taateenaꞌona koyeheete. 10Tunebaani ebi uuche taateenaꞌo kochii wochoon hakkaaneenaꞌone. Are Sidiimi bambooch reenjoon kichoyich iicheti, meeti oppo beehe. Arooba Sodoominaa Gomoorinochi taateenaꞌo ginoochee murici wodiya ii woccii beetaa, boonoshi asheenaꞌoochee ikkikkeenaꞌo ebi oppooch dihiyeete. Echeti asheenaꞌo geppooch aashee muricciyeete. 11Boonoshi etteenaꞌo tuneti ebi awudde taateenaꞌo Sodoominaa Gomoorinoochee boonoshi daneti mooyo bullin, maayooch beddaahaa amoonolla echiyaanoon, yechii hammiyeete. 12Abraami manoochi bushoo Looxi Sodoomi bi beetoyich, biinoo, biich beeto bullinoo keccii daammiyeete.
13Aroochee muricciti ikke uro waaꞌi, tuneti mooyo bullin Hibiree asho Abraamich gettiye. Arooba Abraami beeto, Amooree asho Mamirichi goree gaꞌoochiye. Mamiri, bi maneenaꞌo Eshikoolinaa Aneerina gino tiyiyooba ikkottee gaacheyoyich, Abraamina tookkii wogoon giyiti asheenaꞌone. 14Abraami bi manoochi bushoo Looxi kecee hamon bi waayehooba, bi kexooch shiijjeꞌi dicciti, koyoon doyiti, keejje ballaa aaraa shimitte asheenaꞌona tookkii kechiye; ebi awudde taateenaꞌon dabbiꞌi, Daani katemooch beddaahaa hammiyeete. 15Abraami xumoona bi asheenaꞌon guuphi guuphona bi qoodaa, boonoshiyoo ebi awudde taateenaꞌon kochiyeete. Kochii wochiꞌi, Damaasiqaa dambi-waan beeti, Hooba beddaahaa yookkiyeete. 16Arooba Abraami are taateenaꞌo keccii daammiti mooyo bullin wochiihe; wotta bi manoochi bushoo Looxinaa biicho tuneti mooyo bullinon, maacheenaꞌonaa bare kecceti asheenaꞌo bullinon wochii deebiye.
Meleekitsedeqi Abraamin Diiroo
17Taatoo Kedorilamerinaa biinna tookkii beeti bare taateenaꞌonon Abraami kochii wochiꞌi bi wottee beetaa, Sodoomi taatoo, Taatee Bamboo getteebeeti Shaweehi bamboochaa, biinna daneya kechiye.
18Saalemi taatoo Meleekitsedeqi Abraamich koshonaa woyinee uyoonon yechiꞌi kechiye. Biyoo Beshe Nuggishoo Yeerich maddeebeeti, qeeshoone. 19Ishichiinoo Abraamin diiriye:
“Shimaayoonaa showoonon halliti,
Beshe Nuggishoo Yeeri Abraamin diiribe.
20Ne etteenaꞌon ne kishooch beshii immiti,
Beshe Nuggishoo Yeeri diireebe” iye.
Abraamiyoo kecoochee bi daneto bulliichee aashiroochee ikke beeroon biich immiye.
21Ebiyee gubb, Sodoomi taatoo Abraamin “Kecoochee ne wochiti gijjoo bullin neech tuniichi, ta asheenaꞌon baach taach imbe” iye.
22Abraami Sodoomi taatoyich ishichiye: “Shimaayoonaa showoonon halliti, Beshe Nuggishoo Doono Yeer waan ta kishoon kaama tiijjaꞌa wogehoye. 23-24‘Abraamin taane gaanniito’ ne getaachemmoyich, ta naayinaꞌo maatonaa taanna tookkii hammitinaꞌochi qoodoonoyee besh, neecho tuneti woshiqoon woyee caammee cuyoon woyee neecho tuneti mooyo amoonolla deꞌaache. Aneeri, Eshikoolinaa Mamirina baach boonoshi qoodoon deꞌeete” iye.
Currently Selected:
Halloo 14: KBRC
Highlight
Share
Copy
Want to have your highlights saved across all your devices? Sign up or sign in
SIM International, 2020.
