Yowannisi 18
18
Yesuusichi Yecheyoo
(Maatiyoosi 26:47-56; Maariqoosi 14:43-50; Luqaasi 22:47-53)
1Yesuusi ishichiꞌi bi corootitoyee gubb, bi dabbeenaꞌona tookkii tiyiꞌi becheeti mixinaꞌo beeti xaaꞌooch, Qedirooni bamboyee beqach hammiye; biyoo, bi dabbeenaꞌoo are becheeti michi daggooch giyiyeete.
2Yesuusinaa bi dabbeenaꞌona meeti areddoon arooch kicee beeheete; ebich biin beshiiree immemmi Yihudi are xaaꞌoon arii beetone. 3Ebina Yihudi, faanusoonaa ceechoonon, ginoonaa gaachoonon yechiti ginee naayinaꞌon, wotta qeeshee ukkireenaꞌonaa Fariseenaꞌona wocheti yaafee kechi kellechinaꞌon dabbiiꞌi waahe.
4Arooba Yesuusi bi toommooch woyemmi mooyo bullin ariiꞌi kechii, “Koniniye ittoshi qaawiibeeto?” iꞌi echehe.
5Boonoshiyoo “Naazireetechi Yesuusiniye” iꞌi wochiyeete.
“Aroo taane” iye. Beshiiꞌi immiti Yihudi wotta boonoshina tookkii arooch neexee beetone. 6Yesuusi boonoshich “Aroo taane” bi immona, gubb kisheꞌi showooch dihiyeete.
7Wochinnoon Yesuusi “Koniniye ittoshi qaawiibeeto?” iꞌi echehe.
Boonoshiyoo “Naazireetechi Yesuusiniye” iyeete.
8Yesuusi wochiꞌi, “Aroo taane iyaꞌa ittoshich getaachote? Illa taan ittoshi qaawiibeeto gaata, hinoshin qayote, hambeete” iye. 9Ishichii bi ito, “Hini taach ne immetinaꞌo daggoochee ikkoonolla aalliyaano taane” bi iti qaaro bi ceennemmoyichiye.
10Simoon Pheexiroosi bi cuyeti goraadoon kaaccii daachiiꞌi qeeshee guudoochi guuno qanne waamon karii kindiihe; uroochi shigoo Malikoosine.
11Yesuusi Pheexiroosin “Ne goraadoon bi gonenooch wochibe; Nihoo Yeeri taach bi immiti xuuxee xoofoochee uchaayote?” iye.
Yesuusin Haanni Aafooch Boonoshi Neechoo
12Arooba hume ginee iraashoonaa bi ginee naayinaꞌona Ayihudee yaafee kechi kellechinaꞌona tookkii Yesuusin yechii cuchiyeete; 13shiichiꞌi Haanni waan daammiyeete; Haanni aroobee natooba qeeshee guudo tuneti Qeyaafichi abboone. 14Qeyaafiyoo “Ikke uro asheenaꞌochi keroyich bi qitoo gaawiye” iꞌi Ayihudee ukkireenaꞌoyich kocciti uroone.#Yowa. 11:49-50
Yesuusin Pheexiroosi Nookko
(Maatiyoosi 26:69-70; Maariqoosi 14:66-68; Luqaasi 22:55-57)
15Simoon Pheexiroosinaa bare dabboona Yesuusin dabbiyeete. Are Yesuusichi dabboo qeeshee guudoona arichee beetone; ebich Yesuusina tookkii qeeshee guudoochi kibbooch giyiye. 16Tunetaa Pheexiroosi kellee maach neexee beehe. Arooba qeeshee guudoona aricheebeeti bare Yesuusichi dabboo kechi kellechich gettiꞌi Pheexiroosin giijjiye.
17Are kelloon quyaabeeti shaajjetee Pheexiroosin “Ne wotta hini uroochi dabbeenaꞌo daggoochee ikkoo ne toone?” iyan.
“Ta toono taane” iye.
18Arooba showoo aqqoo bi tunetoyich wocheyechinaꞌonaa kellechinaꞌona qaaqqoon shookkii gechiiꞌi neexee kachii beeheete; Pheexiroosiyoo wotta boonoshina tookkii neexeꞌi kachii beehe.
Yesuusin Qeeshee Guudo Echo
(Maatiyoosi 26:59-66; Maariqoosi 14:55-64; Luqaasi 22:66-71)
19Qeeshee guudo Yesuusin bi dojjeechonaa bi dabbeenaꞌochonon echehe.
20Yesuusiyoo wochiꞌi, “Asheenaꞌo bullich kaacha getteto taane; Ayihudeenaꞌo kiceebeeti kexonaa boonoshi bulli ikkooch kiceebeeti yaafee kexonoochaa bulli aaboon dojjito taane; aashoona gettaa ariyaano taane. 21Illa amoyichiye taan ne echaabeeto? Boonoshich ta gettaa beetaa waayeti asheenaꞌon echebe; boonoshich ta getteton arii beetinaꞌone” iye.
22Yesuusi bi ishichimmona, arooch neexeebeeti yaafee kechi kellechinaꞌo daggoochee ikkoo “Qeeshee guudoyich ishichaꞌa wochinne?” iꞌi Yesuusin tappehe.
23Yesuusiyoo wochiꞌi, “Gondoon ta getteto gaata, ta gondoon miixebe; ta getteto tato gaata, amoyich taan tappenne?” iye. 24Aroochee Haanni Yesuusin bi cucheetona qeeshee guudo Qeyaaf waan daachiihe.
Yesuusin Wochinnoon Pheexiroosi Nookko
(Maatiyoosi 26:71-75; Maariqoosi 14:69-72; Luqaasi 22:58-62)
25Simoon Pheexiroosi andoo neexeꞌi qaaqqoon kachii beehe. Arooch neexee beetinaꞌo daggoochee ikkikkeenaꞌo “Ne wotta Yesuusi dabbeexi ikkoo toono neene?” iyeete.
Biyoo “Ta toono taane” iꞌi nookkehe.
26Bi waamon Pheexiroosi kuxxiti uroochi xiboo, qeeshee guudoochi guuninaꞌo daggoochee ikkoo, Pheexiroosin “Becheeti michi daggoochaa Yesuusina tookkaa ne beetaa beegaachote?” iye. 27Pheexiroosi wochinnoon nookkehe; areegaata bekkech baakkoo kuukkiye.
Yesuusin Phelaaxoosi Aafooch Boonoshi Neechoo
(Maatiyoosi 27:1-2,11-14; Maariqoosi 15:1-5; Luqaasi 23:1-5)
28Yesuusin Qeyaaf waanee Yihudee iraashoo kibbooch daammiyeete. Showoo batt maaddoone; Ayihudeenaꞌo “Iraashoo kibbooch giyaꞌa no eeꞌegaata Beshee Baaree maayoon mamon hakkaachemmo noone” iꞌi boonoshi shattitoyich, iraashoo kibbooch giyaaneenaꞌone. 29Ebich Phelaaxoosi boonoshi beeti maaxooch kechiꞌi, “Hini uro toommooch ittoshi yaaqqiibeeti taggoo amoone?” iꞌi echehe.
30Boonoshiyoo wochiꞌi, “Hini uro gondoon bi shuunetaan gaata, ne waan deebaachesho noone” iyeete.
31Phelaaxoosiyoo “Wochi daamiree ittoshi sheeroona nallibote” iye.
Ayihudee ukkireenaꞌo “No koninolla no wuxemmoyich, ittoshi sheeroo daaggaanoone” iyeete. 32Ebi bi tuneto, Yesuusi amoommi qitoon bi qitemmo gaata bekkiyoyich bi gettiti qaaro ceennemmoyichiye.#Yowa. 3:14; 12:32-33
33Phelaaxoosi wochinnoon kibbooch giyii Yesuusin ceeggiꞌi, “Ne Ayihudeenaꞌo taatoo neene?” iꞌi echehe.
34Yesuusi wochiꞌi, “Ishichaa ne taan echaabeeto, ne qelloonanee asho neech getenane?” iye.
35Phelaaxoosiyoo wochiꞌi, “Ta Ayihudo taane? Ne asheenaꞌonaa qeeshee ukkireenaꞌonane neen taach beshiiꞌi immitinaꞌo. Halla amooniye ne hallito?” iye.
36Yesuusi wochiꞌi, “Ta taatittine hini alemeexi tooneene. Ta taatittine hini alemeexi bi tuneto gaata, Ayihudee ukkireenaꞌoyich beshiitaa ta icheyaachemmoyich ta dabbeenaꞌo koyeshinaꞌone; tunebaani ta taatittine hini alemeexi tooneene” iye.
37Phelaaxoosi “Ishigaata, taatoo neene?” iye. Yesuusi wochiꞌi, “Taatoo ta tunoon newolla gettaa beetine. Ta, ibereechon miixeya ebich shiijjeto taane, alemoochoo waato taane. Iberoochee tuneto bulli ta qaaroon waayemmone” iye.
38Phelaaxoosiyoo “Iberoo amoone?” iye.
Qitee Nalloo Yesuusi Toommooch Nalleyoo
(Maatiyoosi 27:15-31; Maariqoosi 15:6-20; Luqaasi 23:13-15)
Phelaaxoosi ishichiichii, wochinnoon Ayihudee ukkireenaꞌo waan maach kechiꞌi, “Ta bi toommoochee gondoon daneyaano taane. 39Tunebaani Beshee Baarooba taan echeꞌi cuchetinaꞌo daggoochee ikkoon biichiyoo ittoshich doyoone. Ishigaata, Ayihudeenaꞌo taatoon ta biishon shunnehote?” iꞌi echehe.
40Boonoshiyoo wochiꞌi, “Barbaani biicheballi, hini uro biichaaye” iibee cookeeheete; ebi Barbaani bokkoone.
Currently Selected:
Yowannisi 18: KBRC
Highlight
Share
Copy
Want to have your highlights saved across all your devices? Sign up or sign in
SIM International, 2020.
