Yowannisi 3

Niqoodimoosina Tookkii Yesuusi Yibbaato

1 Fariseenaꞌochi guuphi daggooch Ayihudeenaꞌochi nallecho tuneti Niqoodimoosi getteebeeti ikke uro beehe. 2Biyoo xumoona Yesuus waan waaꞌi, “Dojjechocho, Yeeri biinna tookkii tunetoyee damba, ne tuniibeeti hini worganikkiti malleteenaꞌon tuniyoon koniyoona hakkaache. Ebich dojjecho tunaꞌa Yeer waanee ne womon ariibeeto noone” iye.

3Yesuusiyoo wochiꞌi, “Iberoon neech gettoye: Koniyoona bi tunetaa, guttinnoon bi shiijjo qayigaata, Yeerichi taatittineen beegon hakkaachemmone” iye.

4Niqoodimoosiyoo “Asho bi geenetoyee gubb, aabichiree shiijjoon hakkehe? Guttinnoon bi indee maacooch giyiree shiijjoon hakkehe?” iye.

5Yesuusiyoo wochiꞌi ishichiye: “Iberoon neech gettoye: Koniyoona bi tunetaa, aaconaa Ayaanoonoochee shiijjo bi qayigaata, Yeerichi taatittineech gimon hakkaachemmone. 6Meenona shiijjeto meenone; Ayaanoona shiijjeto ayaanoone. 7‘Guttinnoon shiijjo ittoshich qaawiihe’ ta itoyich, worganeyaahine. 8Yongo biich kaamemmoochiye bi yongeebeeto; bi qaaroonoo waayehine; tunebaani amoochee bi waabeeto gaata, amooch bi hammiibeeto gaatoo ariyaachine. Yeerichi Ayaanoochee shiijjeto bulli ebiyoommone” iye.

9Niqoodimoosiyoo wochiꞌi, “Ebi aabichiree tunehe?” iꞌi echehe.

10Yesuusi wochiꞌi ishichiye: “Ne, Israꞌeeleenaꞌo daggooch ooge dojjecho tunaa beechaa, ebin ariyaachine? 11Iberoon neech gettoye: No arii beeton gettehone; no beeggeton miixehone; tunebaani no miixeton iberiyaachote. 12Showeexi mooyon ta getaa, ittoshi iberiyaan gaata, shimaayeexi mooyon ta getaa, aabichiree iberiyehote? 13Shimaayoochee kinditoyee damba shimaayooch kechito koniyoona aalloone; ebiyoo Ashi Bushoone. 14Muusi barahoochaa dingeroon michi toommooch bi yoodoommon,#Had. 21:8-9 Ashi Bushoo yooddeyoo biich qaawiihe. 15Ebi tunemmo, bi mulloon bi toommooch tooꞌiibeeto bulli, bulli yemeenee kashoon bi danemmoyichiye.

16“Mulloon bi Bushoo toommooch tooꞌiibeeto bulli, bulli yemeenee kashoon bi danemmonaa bi aalleyaachemmonoyich, Yeeri ikke bi Bushoon bi immimmi wottoon alemoon oogichii shunniye. 17Yeeri bi Bushoon alemooch bi deejjito, arooch beeti asheenaꞌon bi wodiyemmoyichalli, boonoshi toommooch bi nallemmoyich toonoone. 18Bi mulloon bi Bushoo toommooch tooꞌiibeeto toommooch nallaachemmone; tunetaa bi Bushoo toommooch mulloon tooꞌiyaano, ikke mixxe bi Bushoo toommooch mulloon tooꞌiyoo bi qajjitoyich, wond bi toommooch Yeeri nallitone. 19Bekko showee toommooch waahe; tunebaani asheenaꞌo boonoshi shuunoo gondo bi tunetoyich, bekkoyee manderoon shunniyeete; bi nallito ebichiye. 20Gonde mooyon shuuneebeeto bulli bekkoon shixxii beetone; bi gonde shuunoo bi bekkeyaachemmoyich, bekko beetooch keyaache. 21Tunetaa iberoo tuneti mooyon shuuneebeeto, Yeeri gettiton bi shuuno bekkemmoyich, bekko beetooch kechii beetone” iye.

Yesuusichon Yowannisi Miixo

22Ebiyee gubb, Yesuusinaa bi dabbeenaꞌona Yihudee showooch hammiyeete; boonoshina tookkii giisheche shabaattoon arooch koteꞌi asheenaꞌon aacona afaallii beehe. 23Arooba Yowannisi wotta Saliimee showee katinooch Heenooni getteebeeti xaaꞌooch gamini aaco beetoyich, aroochaa asheenaꞌon aacona afaallii beehe; asheenaꞌoo bi waan waa aacona afaallee beeheete. 24Arooba Yowannisi batt cuyee kexooch giyaan beetone. 25Yowannisi dabbeenaꞌonaa ikke Ayihudoonochi daggooch xalliyee doyee gajjiteyoo tiyiye. 26Hini bi dabbeenaꞌo Yowannis waan waaꞌi, “Dojjechocho, Yoordaanoosi aachee beqach neenna tookkii beebee echeto, newoo biichon ne miixeto, ebiyoche, asheenaꞌon aacona afaallii beetone; asho bulli bi waan hammii beetone” iyeete.

27Yowannisi ishichiꞌi wochiye: “Asho koniyoona Yeeri daaggaanoon amoonolla tuniyoon hakkaache. 28‘Kiristoosi toono taane; tunebaani biyee shiichii wocheeto taane’ iyaꞌa ta getoyich ta miixoo ittoshine.#Yowa. 1:20 29Woꞌee bi kenoochine; neexeꞌi waayeebeeti miyaatoo woꞌee kenoochi qaaroona oogichii emirii beetone. Illa ebina ta emiroo ceennitone. 30Bi oogo beshibe; ta oogo giishebe; ebi tunibede mooyone” iye.

Shimaayoochee Waabeeto Bulliyee Besho Bi Tuno

31“Damba shimaayoochee waabeeto bulliyee beshoone; dechi showoochee tuneebeeto showeexone; showee toommeexi mooyoniye bi gettiibeeto. Shimaayoochee waabeeto bulliyee beshoone. 32Bi beeggitonaa bi waayetonon miixee beetone; tunebaani bi miixee beeton iberiibeeto koniyoona aalloone. 33Bi miixee beeton iberiito, Yeeri iberoo bi tunoon miixetone. 34Yeeri bi Ayaanoon bi immiibeeto qeelleꞌi tuno bi qajjitoyich, Yeeri wocheto, Yeerichi wochoon gettii beetone. 35Nihoo Yeeri bi Bushoon shunnii beetone; bullin biich hajjiitone. 36Bi mulloon bi Bushoo toommooch tooꞌiibeeto, bulli yemeenee kashechone; bi Bushoo toommooch tooꞌiyaano, Yeerichi kaaree shiixxoo bi toommooch tunehalli, bulli yemeenee kashoon daneyaachemmone” iye.

Currently Selected:

Yowannisi 3: KBRC

Highlight

Copy