Yowannisi 7

Bashee Baaroon Baariya Yesuusi Hamo

1Ebiyee gubb, Yesuusi Ayihudee ukkireenaꞌo biin wuxiya boonoshi qaawii beetoyich, Yihudee showoona shaꞌoon shunaanoone; ebich Galiilee showoona shaꞌee beehe. 2Ayihudeenaꞌochi Bashee (Yambaaree) Baaroo katinnii giisheche aabo echehe.#Lew. 23:34; Yibba. 16:13-15 3Ebich Yesuusichi maneenaꞌo biich “Ne tuniibeeti mooyon neen dabbii beetinaꞌo boonoshi beeggemmoyich, hiniichee tiyiree Yihudee showooch hambe. 4Bi qelloon arichiyoo qaawiibeeti asho aashoona shuuneyaanoone. Hini mooyinaꞌo bullin ne tunii beetoyee, ne qelloon showee toommooch beetinaꞌo bullich arichiyoo qaawiihe” iyeete. 5Bi maneenaꞌo boonoshi ishichito, bi toommooch mulloon tooꞌiyoo boonoshi qajjitoyichiye.

6Yesuusi boonoshich ishichiye: “Ta aabo batti shagaanoone; tunebaani amee aabolla bi tunetaa, ittoshich kaamoone. 7Alemo ittoshin bi shixxemmi naboo aalloone; tunetaa bi shuunoo gondo bi tunoon ta miixaa beetoyich, taan shixxiye. 8Ittoshi hini baarooch hambote; ta aabo batt shagaanoone. Ebich hini baarooch hamaache” iye. 9Ishichiꞌi boonoshich gettiichii Galiilee showooch echehe.

10Tunebaani bi maneenaꞌo baarooch boonoshi hammitoyee gubb, Yesuusi wotta xalla bekkeyaanoon aashoona are baarooch hammiye. 11Ayihudee ukkireenaꞌo “Aroo aaye?” iibee are baaree xaaꞌoochaa qaawii beeheete.

12Dofee asheenaꞌo daggoochee ikkikkeenaꞌo bi toommooch oogichii guruuxii beeheete. Ikkikkeenaꞌo “Gaawe uroone” iyeete; tunebaani bareenaꞌo wotta “Gaaweyaanoone; asheenaꞌon muricii beetone” ii beeheete. 13Tunetaa Ayihudee ukkireenaꞌon boonoshi shattitoyich, koniyoona biichon xalla kichii yibbaateyaanoone.

Baarooch Kiceeti Asheenaꞌoyich Yesuusi Dojjoo

14Baaree shabaattee daggooch Yesuusi yaafee kexooch hammiꞌi asheenaꞌoyich dojjooch giyiye. 15Ayihudee ukkireenaꞌo “Asho biich dojjaanoon, hini uro eboshi bullin aabichiꞌi ariihe?” iꞌi worganee beeheete.

16Ebich Yesuusi tiyiꞌi boonoshich ishichiye: “Ta dojjaabeeti doyoo taan wocheto waaneenalli ta waanee toonoone. 17Koniyoona Yeeri shunniton tuniyoyich bi qaawigaata, aroo hini ta doyoo Yeer waanee bi tunoon woyee ta, ta qelloona ta geton ariyemmone. 18Bi qellee gaboona gettiibeeto, ashi waanee oogoon qaawiibeeti ashoone; tunetaa biin wocheton oogiiya qaawiibeeto, aroo ibere moochechone; xummittino bi mullooch aalloone. 19Muusi Yeerichi sheeroon ittoshich imaache? Tunebaani ittoshi daggoochee are sheeroon quyeebeeto ikkolla aalloone. Taan wuxoyich aakkiya qaawii beetote?” iye.

20Asheenaꞌo wochiꞌi, “Yinno ne toommooch beetone. Konine neen wuxoyich qaawiibeeto?” iyeete.

21Yesuusi wochiꞌi boonoshich ishichiye: “Ikke shuunoon shuunehoye; ittoshi bulli aroon worganehote. 22Ittoshich, shambetooba bushiishoon dokiriibeeto ittoshine. Ebiyoo Muusi dokiriyee doyoon ittoshich bi immitoyichiye; tunetaa hini doyoon ittoshich immitinaꞌo, ittoshi qaabbechinaꞌoani Muusi toonoone. 23Muusichi Sheeroon quyoyich ittoshi bushiishoon shambetooba dokiriibeeto ittoshi tunegaata, ashoon ceeni bi ashittinoon shambetooba ta wodiitoyich, amoyich taan kaarehote? 24Kaachiree nallibotalli ashi aafoon ciiniree nalliyaahote” iye.

“Hini Kiristoosine?” Iꞌi Asheenaꞌo Echo

25Arooba Yerusaalemee asheenaꞌo daggoochee ikkikkeenaꞌo ishichiyeete: “No ukkireenaꞌo wuxiya boonoshi qaawiibeeto, hini uroon toone? 26Ebiyoche, kaacha gettii beehe amoone! Boonoshiyoo amoonolla getaacheete. Iberoon ukkireenaꞌo hini uro Kiristoosi bi tunoon ariiꞌi tunehe? 27Tunebaani hini amoochee gaata ariito noone; tunetaa Kiristoosi waahooba, bi woyemmo amoochee gaata koniyoona ariyaachemmone” iyeete.

28Ebich Yesuusi yaafee kexoochaa dojjiibee bi qaaroon oogichiꞌi ishichiye: “Taanoo ariibeeto ittoshine; amoochee ta waato gaata ariibeeto ittoshine. Ta, ta qelloona waataano taane; tunebaani taan wocheto gibeneetone; ittoshi biin ariyaano ittoshine. 29Tunetaa ta bi waanee waato taane; biyoo taan wochetone; ebich biin ariibeeto taane” iye.

30Ebich asheenaꞌo daggoochee ikkikkeenaꞌo biin yecha qaawii beeheete; tunetaa bi aabo batt shagaano bi tunetoyich koniyoona biin yeshaanoone. 31Tunetaa asheenaꞌo daggoochee meetinaꞌo boonoshi mulloon bi toommooch tooꞌiiꞌi, “Kiristoosi waahooba, hini uro bekkiiti malleteenaꞌoyee beshoon bekkiyehe?” iyeete.

Yesuusin Yechiyoyich Ayihudee Ukkireenaꞌo Wocho

32Asheenaꞌo ebi mooyon tiijjiꞌi Yesuusichon guruuxeebee boonoshi yibbaatee beetaa, Fariseenaꞌo waayeheete. Ebich qeeshee ukkireenaꞌo, Fariseenaꞌoo biin yechiya yaafee kechi kellechinaꞌon wocheheete.

33Yesuusiyoo “Batt giisheche aaboon ittoshina tookki kotemmo taane; aroochee taan wocheto waan hammemmo taane. 34Ittoshiyoo taan qaawemmo ittoshine; tunebaani daneyaachemmo ittoshine; ta beetoochoo womon hakkaachote” iye.

35Ebich Ayihudee ukkireenaꞌo boonoshinaa boonoshina “No biin daneyaachemmoyich, hini uro amooch hammane bi ii beeto? No macceenaꞌo shaceꞌi beeti Giriikeenaꞌochi katemeenaꞌooch hamiree Giriikee asheenaꞌoyich dojjoyich tunehe? 36Biyoo ‘Taan qaawemmo ittoshine; tunebaani daneyaachemmo ittoshine; ta beetoochoo womon hakkaachemmo ittoshine’ bi ii beeti hini bi yibbaatoo amoone?” iꞌi yibbaateheete.

Kashee Aachi Xuupho

37Baaree ciiroochee qaabbe aabooba Yesuusi neexee bi qaaroon oogichiꞌi, “Koniyoona shacheweto bi beegaata, ta waan waaree uye. 38Bi mulloon ta toommooch tooꞌiibeeto, Yaafe Macaafoochaa bi getteetoommon, ‘Kashee aachi xuupho bi maacoochee xuupphemmone’ ” iye. 39Ishin bi gettito, boonoshi mulloon bi toommooch tooꞌiitinaꞌo boonoshi danemmi Yaafe Ayaaneechoniye; Yaafe Ayaano batt kindaan beetone; ebiyoo Yesuusi oogoyich batt shimaajj keyaan beeto bi tunetoyichiye.

Asheenaꞌochi Daggooch Shaco Gimo

40Ebich dofee asheenaꞌo daggoochee ikkikkeenaꞌo hini bi yibbaatoon waayeꞌi, “Iberoon hini uro quyaa no beeti Keemechone” iyeete.

41Bareenaꞌo “Hini uro Kiristoosine” iyeete.

Tunetaa bareenaꞌo “Kiristoosi Galiilee showoochee waataachemmone. 42Yaafe Macaafoochaa ‘Kiristoosi taatoo Daawiti yaroochee, Daawiti beebee echeti katemoo Beetilehemee kechemmone’#2 Saam. 7:12; Mik. 5:2 getteyaache?” iyeete. 43Ebich Yesuusichi naboona asheenaꞌo daggooch shaco tunehe. 44Boonoshi daggoochee ikkikkeenaꞌo biin yecha qaawiyeete; tunebaani koniyoona yeshon hakkaanoone.

Yesuusi Yeer Waanee Bi Womon Ayihudee Ukkireenaꞌo Iberiyee Qayo

45Yaafee kechi kellechinaꞌo, qeeshee ukkireenaꞌonaa Fariseenaꞌona waan wottee boonoshi waammona “Amoyich yechiꞌi deebaachote?” iyeete.

46Kellechinaꞌoo “Hini uroochoommon koniyoona yibbaatee ariyaanoone” iꞌi wochiyeete.

47Ebich Fariseenaꞌo “Ittoshi wotta dacheetote? 48Ayihudee nallechinaꞌo woyee Fariseenaꞌo daggoochee ikkolla bi waan wotteto beete? 49Tunebaani Muusichi Sheeroon ariyaani hini maccoo Yeerina uppetone” iꞌi wochiyeete.

50Aroyee aaf Yesuus waan waati, Fariseenaꞌo daggoochee ikkoo tuneti Niqoodimoosi 51“Nallecho shiichiꞌi taggeetochi noonoochee waayeyaanoon, amoon bi shuuneto gaata ariyaanoon, ashi toommooch bi nallemmoyich no sheeroo daaggite?” iꞌi echehe.

52Boonoshiyoo wochiꞌi, “Newoo wotta Galiilecho neene? Keemecho Galiilee showoochee keyaachemmone. Yaafe Macaafoochee qaawiree beege” iyeete. 53[Ebiyee gubb, boonoshi kexi kexooch hammiyeete.

Currently Selected:

Yowannisi 7: KBRC

Highlight

Copy