Luqaasi 22
22
Yesuusin Beshiiꞌi Imoyich Yihudi Koceyoo
(Maatiyoosi 26:1-5; Maariqoosi 14:1-2; Yowannisi 11:45-53)
1Ebiyee gubb, Beshee Baaroo#Key. 12:1-14 getteebeeti Shittoo Giyaani Kochi Baaroo katinniye. 2Arooba qeeshee ukkireenaꞌonaa Muusichi Sheeree dojjechinaꞌona dofee asheenaꞌoyich boonoshi shattitoyich, Yesuusin aabichiree boonoshi wuxemmo gaata gommon qaawii beeheete. 3Arooba aaraa gutte Yesuusichi dabbeenaꞌochi daggeexi ikkoo Asqorootechi Yihudichi mullooch Sheexaanoo ceenniye. 4Biyoo hammiꞌi aabichiree Yesuusin boonoshich beshiiree bi immemmo gaata, qeeshee ukkireenaꞌonaa yaafee kechi kellechinaꞌochi ukkireenaꞌona tookkii echeehe. 5Boonoshiyoo emiriibee gijjoon biich imoyich kuxxiyeete. 6Yihudiyoo boonoshich deꞌa iye. Ebich “Yesuusin aabichiree beshii imbote?” iibee meeti asho aalli xaaꞌoochaa beshiiree bi immemmi holloon qaawii beehe.
Gifiroon Yesuusichi Dabbeenaꞌo Qanniyoo
(Maatiyoosi 26:17-25; Maariqoosi 14:12-21; Yowannisi 13:21-30)
7Arooba Beshee Baaree bago guureebeeti Shittoo Giyaani Kochi Baaroo shaggiye. 8Yesuusiyoo Pheexiroosinaa Yowannisinon “Beshee Baaree maayoon no maayemmoyich hamiree nooch qanniibote” iꞌi wochehe.
9Boonoshiyoo “Aabiich hamiree no qanniyoon shunnaa beetine?” iꞌi echeheete.
10Yesuusiyoo ishichiye: “Katemooch hami giyiree, aachi qondoon shaaggiti uroona danemmo ittoshine; hini are uro giyimmi kexooch dabbiree gibote. 11Are kechi doonon ‘Dojjecho “Ta dabbeenaꞌona tookki Beshee Baaree maayoon ta maayemmi iibbee kexo aabichiye?” itone’ getote. 12Biyoo kechi toommeexi kexooch keyiree yaggaa qanniti gamini xaaꞌoon ittoshich bekkiyemmone; aroochaanoo qanniibote” iye.
13Boonoshiyoo hammiꞌi Yesuusi gettitoommon bullin daneꞌi Beshee Baaree maayoon arooch qanniiheete.
Yesuusichi Damoonaa Meenonochi Shalligichoo
(Maatiyoosi 26:26-30; Maariqoosi 14:22-26; 1 Qorontoosi 11:23-25)
14Saato bedaa, Yesuusinaa aaraa gutte mishiraachechinaꞌona madoo giddetaa maayoon maaya koteheete. 15-16Biyoo “Ittoshich gettoye: Yeerichi taatittinee kexooch hini Beshee Baaree maayo manjeyemmi aabo bi ceennimmi wottoon ebiyee damba Beshee Baaree maayoon maataachemmo taane; ebich iritoon beegaan beechi ittoshina tookki hini baaree maayoon ta maayemmoyich oogichaꞌaaniye ta qaatito” iye.
17-18Aroochee woyinee uyoon yechiti xoofoon tiijjii Yeerin galleteꞌi bi dabbeenaꞌoyich “Ittoshich gettoye: Yeerichi taatittine waammi wottoon ebiyee damba hini woyinee uyoochee uyaachemmo taane. Ebich haꞌote; ebin geechebote” iye.
19Wotta koshon tiijjiꞌi Yeerin galletehe; tiichiꞌi boonoshich immiibee, “Ittoshicha iyaꞌa deejjoon tunii ta immaabeeti ta meeno ebine; ebinoo taan shalligeechon tuniibote” iye.
20Ebiyoommon wotta gifiree hillooch woyinee uyoon yechiti xoofoon tiijjiꞌi ishichiye: “Hini woyinee uyo ittoshi naboyich ufemmi ta damoone; ebiyoo Yeeri neechemmi andire wogee malletoone. 21Tunebaani taan beshiiree immemmi asho taanna tookkii madooch and geechee maa beetone.#Shod. 41:9 22Ashi Bushoo shiichiꞌi bi maaccetoommon qitemmone; tunebaani biin beshiiree immemmi are uroyich woowo!” iye. 23Ebich bi dabbeenaꞌo boonoshinaa boonoshina “No daggoochee ebin tuniiya ii beeto konine?” iꞌi echeeheete.
Oogittinee Mooyon Yesuusichi Dabbeenaꞌo Gajjiteyoo
24Wotta Yesuusichi dabbeenaꞌo “No daggoochee oogoo getaa ceekkemmo konine?” iꞌi boonoshinaa boonoshina gajjiteeheete. 25Ebich Yesuusi boonoshich ishichiye: “Aageteenaꞌochi taateenaꞌo showoo bulli toommooch taateꞌi areexi asho bullin hajjii beetinaꞌone; boonoshi toommooch doonjee beetinaꞌo wotta ‘Maac deꞌeenaꞌo’ gettee beetinaꞌone. 26Tunetaa ittoshi daggooch ebiyoommon tunaaye. Ebich ittoshi daggoochee oogoo giishochoommon, doonjeto wotta bi wochee bushoochoommon tunebe. 27Madooch kotee beetonaa wochee beetonoochee konine oogoo? Madooch koteebeeto toone? Tunebaani ta ittoshi daggoochee wochee bushoommo taane. 28Wotta ittoshi ta toommooch shaggiti iritee daggooch taanna tookkii kuppheꞌi beeto ittoshine. 29-30Ebich ta Nihoo taan bi taatiitoommon, ta wotta ta taatittinoochaa ta madoochee ittoshi maayemmonaa ta xoofoochee ittoshi uchemmonoyich, taatee qeenoochoo koteree aaraa gutte Israꞌeelee yoodeenaꞌo toommooch ittoshi nallemmoyich and ittoshin taatiito taane” iye.
Pheexiroosi Biin Nookkemmo Tunoon Yesuusi Geto
(Maatiyoosi 26:31-35; Maariqoosi 14:27-31; Yowannisi 13:36-38)
31Ebichi hillooch Doono Yesuusi “Simoono, Simoono, Sheexaanoo teepphoon woqqoommon ittoshin woqqiya Yeerin qolletone. 32Tunebaani ta toommooch ne mullee tooꞌiyoon ne qayaachemmoyich corootito taane; ta waan ne wottehooba ne maneenaꞌo mulloon kupphiibe” iye.
33Pheexiroosiyoo “Ta Doonocho, neenna tookki cucheyoyichoo, qitoyichoo qannito taane” iye.
34Tunebaani Yesuusi “Pheexirooso, iberoon neech gettoye: ‘Biin ariyaano taane’ getiree keejje wottoon taan nookkeyaan ne beetaa, hanaach baakkoo kuuhaachemmone” iye.
Gijjee Kolloo, Shohee Kojjoonaa Goraadoona
35Wotta Yesuusi bi dabbeenaꞌoyich “ ‘Gijjee kolloonaa shohee kojjoonon, wotta ittoshi baatooch ittoshi gedditoyee damba bare caammoon yeshaanoon shokke kishoon hambote’ iyaꞌa ittoshin ta wochehooba ikkolla ittoshich shappite?” iꞌi echehe.
Boonoshiyoo “Amolla shappaanoone” iyeete.
36-37Biyoo “Ittoshich gettoye: ‘Gondeenaꞌona tookkii haddeehe’#Isi. 53:12 getaa Yaafe Macaafooch kooreeto taanna ceenaanoon echeyaachemmone; ta toommooch tunemmi mooyo ceenn bedditone. Ebich and gijjee kollecho bi kolloon yeshiree hambe; shohee kojjechoo ebiyoommon wotta bi shohee kojjoon yeshiree hambe; goraado biich aallo bi kutoon kemiree kemebe” iye.
38Bi dabbeenaꞌo “Doonocho, hiniyoche; gutte goraado beetone” iyeete.
Yesuusiyoo “Mooyo beddiye illa” iye.
Zayitee Michi Guudoochaa Yesuusi Corootoo
(Maatiyoosi 26:36-46; Maariqoosi 14:32-42)
39Ebiyee gubb, Yesuusi bi doyitoommon katemoyee maach kechiꞌi Zayitee Michi guudooch hammiye; bi dabbeenaꞌoo biin dabbiꞌi hammiyeete. 40Are xaaꞌooch boonoshi shaggimmona bi dabbeenaꞌoyich “Gondoochi nihoo dawushooch ittoshi giyaachemmoyich corootibote” iye. 41Biyoo boonoshiyee xaqqee awur bedoon wokkiꞌi guteneechii, 42“Ta Nihoocho, ne daaggigaata, hini xuuxee xoofoon ta waanee wokkiibe. Tunetaa ne daaggoo tunebaani, ta daaggoo tunaaye” iibee corootiye. 43Areegaata ikke maraakoo shimaayoochee kindii biich bekkeꞌi biin kupphiihe. 44Biyoo oogichii xuuxeebee aafichoyee beshoon corootiye; damoo cotoommon caajjo bi achoochee showooch cottiye.
45Corootoon ciichiꞌi tiyii bi dabbeenaꞌo waan wottee waaꞌi, woddiiꞌi boonoshi ayinitoyich taahiꞌi tokketee beetinaꞌon daneꞌi, 46“Amoyichiye ittoshi tokketeebeeto? Gondoochi nihoo dawushooch ittoshi giyaachemmoyich tiyiree corootibote” iye.
Yesuusi Yecheyoo
(Maatiyoosi 26:47-56; Maariqoosi 14:43-50; Yowannisi 18:3-11)
47Yesuusi ishin gettii bi beetaa bekkech aaraa gutteexi ikkoo Yihudi meeti asheenaꞌon dabbiiꞌi shaggiye; aroochee shumma iꞌi Yesuus waan giddehe. 48Tunebaani Yesuusi “Yihudo, shumona Ashi Bushoon beshii immenne?” iye.
49Arooba bi gaꞌooch beeti bi dabbeenaꞌo ebi tuneebeeti mooyon beeggiꞌi, “Doonocho, goraadoona qeccebona?” iꞌi echeheete. 50Boonoshi daggoochee ikkoo goraadoon daachiiꞌi qeeshee guudoochi guuno qanne waamon karii kindiihe.
51Tunebaani Yesuusi “Qayote, beddiye” iꞌi uroochi waamon yechii wodiihe.
52Yesuusiyoo bi waan waati qeeshee ukkireenaꞌoyich, yaafee kechi kellechinaꞌochi ukkireenaꞌoyich, wotta geeneenaꞌoyichoo “Bokkoon yeshoyich womoommon goraadoonaa yeelloonon#22:52 Yeello qelloochaa qullechi ginee qiicoone; ikkikkoochaa bi cillooch xuuroo woyee shaawusho xogee beetone. yechiꞌi waahote? 53Yaafee kexooch bulli aaboon ittoshina tookkaa ta beehooba taan yeshaano ittoshine; tunebaani and ebi ittoshi aaboonaa manderee taatoochi aaboonane” iye.
Yesuusin Pheexiroosi Nookko
(Maatiyoosi 26:57-58,69-75; Maariqoosi 14:53-54,66-72; Yowannisi 18:12-18,25-27)
54Arooba waatinaꞌo Yesuusin yechiꞌi daammii, qeeshee guudo kexooch giijjiyeete; Pheexiroosiyoo wokkiibee biin dabbii beehe. 55Asheenaꞌo kibbee daggooch qaaqqoon shookkiꞌi ikkooch kotee boonoshi beetaa, Pheexiroosiyoo giyiꞌi boonoshi daggooch kotehe. 56Qaaqqee bekko waan kotee bi beetaa, ikke shaajjetee biin manjii ciinnaꞌa, “Hini uro Yesuusina tookkii beetone” iyan.
57Tunebaani Pheexiroosi tiyiꞌi, “Hini ureene, biin ariyaano taane” iꞌi nookkehe.
58Giishechoon yiccimimmona wotta baroo waa Pheexiroosin beeggiꞌi, “Ne wotta boonoshi magecho neene” iye.
Andoo Pheexiroosi “Hini uroocho, ta toono taane!” iꞌi wochiye.
59Wotta ikke saati bedoon yiccimiꞌi bare ikke uro waa xiishiꞌi, “Hini Galiilee ashoone; iberoon hini uro Yesuusina tookkii beetone!” iye.
60Tunebaani Pheexiroosi “Hini uroocho, ne gettaa beeton ariyaano taane!” iye.
Ebin bi gettimmona, bekkech baakkoo kuukkiye. 61Doono Yesuusiyoo gubb wotteꞌi Pheexiroosin ciinniye; wotta “Hanaach baakkoo kuukkaahaa, keejje wottoon taan nookkemmo neene” iꞌi Doono Yesuusi biich gettiti qaaro bi mullooch tipphimiye. 62Areegaata Pheexiroosi maaxooch kechiꞌi tiittee eeppiye.
Yesuusin Ikkikkeenaꞌo Coono
(Maatiyoosi 26:67-68; Maariqoosi 14:65)
63Arooba Yesuusin yechiti asheenaꞌo biin cooneebee yexxii beeheete. 64Bi aafoon kaappiichii tappeebee, “neen tappeto konine? Eke keemecho ne gaata, gete” iꞌi eche beeheete. 65Naageebee bi toommooch bare meeti mooyon gettiyeete.
Ayihudee Nallechinaꞌo Aafooch Yesuusi Neexo
(Maatiyoosi 26:59-66; Maariqoosi 14:55-64; Yowannisi 18:19-24)
66-67Showoo harimmona, Ayihudee nallechinaꞌo, eboshiyoo showee geeneenaꞌo, qeeshee ukkireenaꞌonaa Muusichi Sheeree dojjechinaꞌona ikkooch kiceeheete. Yesuusi yeshaa bi waammona, “Kiristoosi neene? Eke nooch gete” iꞌi echeheete.
Tunebaani aroo wochiꞌi ishichiye: “Ittoshich ta gettetaa, iberiyaachote; 68ta echeteenoo, amoonolla wochaachote. 69Tunebaani hanaachin ikka getiree Ashi Bushoo Giidechi Yeerichi qannooch kotemmone” iye.
70Bi ishichimmona boonoshi bulli tiyiꞌi, “Ishigaata, ne Yeerichi Bushoo neene?” iꞌi echeheete.
Biyoo “Ta tunoon gettito ittoshine” iye.
71Boonoshiyoo “No bi noonoochee waayeto noone; illa ebiyee damba amee miixoo nooch qaawiihe?” iyeete.
Currently Selected:
Luqaasi 22: KBRC
Highlight
Share
Copy
Want to have your highlights saved across all your devices? Sign up or sign in
SIM International, 2020.
