Luqaasi 24

Qitoochee Yesuusi Timo

(Maatiyoosi 28:1-10; Maariqoosi 16:1-8; Yowannisi 20:1-10)

1Shabaattee batti batti aaboobee#24:1 Shabaattee batti batti aabo Oogishambetoone. maaddee yaaꞌooch genneenaꞌo boonoshi qanniiti qimaamoon yechiꞌi Yesuusi duukketi maashooch hammiyeete. 2Hammii shaggiꞌi, oppee kellooch keppheeti xaqqee qeroo oppee kellee noonoochee ikke badd gedireꞌi bi wottoon beeggiyeete. 3Tunebaani maac giyii ciinniꞌi, Doono Yesuusichi cahoon daneyaaneenaꞌone. 4Ebichi naboyich boonoshi shaammii beetaa, diqqich gutte asheenaꞌo phaqqiibeeti tahoon taheꞌi boonoshi gaꞌooch neexeheete. 5Hini are genneenaꞌo keqqoona shateꞌi showooch boonoshi ciinnii beetaa, are asheenaꞌo boonoshich ishichiyeete: “Kashechon qititinaꞌo daggoochee amoyichiye ittoshi qaawiibeeto? 6-7Aroo hiniich aalloone; tiyitone! Aaf Galiilee showooch beebee, ittoshich ‘Ashi Bushoo axaaxechi asheenaꞌo kishooch beshiitaa imaa, yoodderee keejje qemooba qitoochee bi timo echeyaani mooyone’ iꞌi bi gettiton shalligibote” iyeete. 8Ishin boonoshi gettimmona, hini are genneenaꞌo Yesuusi gettiton shalligiyeete.

9Are maashoochee wottee hammiꞌi, ebi boonoshi beeggitonaa boonoshi waayeto bullinon aaraa ikke Yesuusichi dabbeenaꞌonaa biin dabbiibeeti bareenaꞌo bullinoyich gettiyeete. 10Ebin mishiraachechinaꞌoyich hammiꞌi gettitinaꞌo, Magidalechi Maariyami, Yowani, Yaaqobichi indee Maariyaminaa boonoshina tookkii beeti bare genneenaꞌonane. 11Hini mooyo boonoshich daayino bi shaahitoyich, are genneenaꞌochi yibbaatoon iberiyaaneenaꞌone. 12Tunebaani Pheexiroosi tiyiꞌi maashooch wocciye; hammii shaggiꞌi yittii bi ciinnimmona, kaafeno baach beehe. Hini tuneti mooyoyich shaammiibee kexooch wottee hammiye.

Yesuusi Emahuus Baatoona Hamo

(Maariqoosi 16:12-13)

13Arooba Yesuusin dabbii beetinaꞌoochee gutteenaꞌo Yerusaalemee, aaraa ikke kiilo meetiroon wokkiꞌi beeti, Emahuusi getteebeeti gafooch hammii beeheete. 14Hammiibee ebi tuneti mooyo bullin tiijjiꞌi boonoshinaa boonoshina yibbaatee beeheete. 15Yibbaateebee echee boonoshi beetaa, Yesuusi bi qelloona boonoshi waan katinniꞌi boonoshina tookkii gommon hammii beehe. 16Tunebaani boonoshich bi tuusheetoyich, koni bi gaata ariyaaneenaꞌone.

17Yesuusi tiyiꞌi “Gommon hammiibee hini ittoshi yibbaateebeeti mooyo amoone?” iꞌi echehe.

Ishichiꞌi bi echemmona, ayinoona boonoshi aafo maggee beetaa, neexeheete. 18Boonoshi daggoochee Qaleyoophi getteebeeti ikkoo “Yerusaalem waabeeti iibbeenaꞌoochee katinoon arooch tuneti mooyoyich dallaawoo ne ikkeeto baachiye?” iye.

19Yesuusiyoo “Arochi amoone?” iꞌi echehe.

Boonoshiyoo wochiꞌi ishichiyeete: “Yeerinaa asho bullinochi aafooch qaaroonaa shuunoona giidechi keemechi Naazireetechi Yesuusichi mooyone. 20Qeesheenaꞌonaa bare no nallechinaꞌona qitee nalloo bi toommooch bi nalleyemmoyich, beshii immiꞌi yooddiiheete. 21Tunebaani ‘Israꞌeeleenaꞌon biisheree wodiiya wocheetone’ iyaꞌaniye no gibeneto. Wotta ebi mooyo bulli tuneto hanaachi keejje qemoobane. 22Wotta no daggooch beeti ikkikke genneenaꞌo gettiti mooyo noon worganikkiye; boonoshiyoo maaddee kafee qaadooch are maashooch hammiꞌi 23bi cahoon mucceheete. Aroochee wottee waaꞌi, ‘ “Yesuusi wochinnoon kashecho tunetone” iꞌi gettiti maraakeenaꞌo yaaꞌoona beeggeto noone’ iyeete. 24Wotta noonna tookkii beetinaꞌo daggoochee ikkikkeenaꞌo maashooch hammiꞌi, genneenaꞌo gettito iberoo bi tunoon beeggitinaꞌone; tunebaani Yesuusin daneyaaneenaꞌone” iyeete.

25Yesuusiyoo “Hini mullaalleenaꞌote, keemechinaꞌo gettito bullin iberiyaanoon amoyichiye ittoshi yagii beeto? 26Kiristoosich hini xuuxoon beego, oogee yiiree xaaꞌoochoo gimo qaawiyaache?” iye. 27Aroyee gubb Muusichi macaafoo bulliichee tiijjiꞌi keemechinaꞌochi macaafoo bulliich beddaahaa kooreeti bi hajjee mooyon biichiꞌi boonoshich gettiye.

28Hini gutte asheenaꞌo boonoshi hammiibeeti gafooch katinniyeete; Yesuusi are gafoon besheree hammemmo boonoshich bi shaahaa, 29“Noonna tookkiree qebe; showoo beshee, xumetone” iꞌi manjii ataalliyeete. Ebich boonoshina tookkii qeya giyiye.

30Boonoshina tookkii maayoon maaya madooch koteebee, koshon tiijjiꞌi Yeerin galletehe; tiichiꞌinoo boonoshich immiye. 31Areegaata boonoshi aafo qecheetaa, Yesuusi bi tunoon ariiheete; biyoo bekkech boonoshi aafoochee shiwirimiye. 32Boonoshinaa boonoshina ishichiyeete: “Gommona tookkaꞌa no waa beetaa, Yaafe Macaafooch kooreeton biichii nooch bi gettimmona, no mullo oogichiꞌi qeeccito toone!” iyeete.

33Bekkech areegaata hini are gutte asheenaꞌo tiyii Yerusaalem wotteꞌi, ikkooch kiceeꞌi beeti aaraa ikke Yesuusichi dabbeenaꞌonaa boonoshina tookkii beetinaꞌonon ikkooch daneheete. 34Hini kiceeti asheenaꞌo “Iberoon Doono qitoochee tiyitone! Simoonich bekketone” iyeete. 35Wotta ohe gutteenaꞌoo gommona hammii boonoshi beetaa tuneti mooyon, wotta koshon tiichii bi immimmona, bekkech biin boonoshi ariyoon gettiyeete.

Bi Dabbeenaꞌoyich Yesuusi Bekko

(Maatiyoosi 28:16-20; Maariqoosi 16:14-18; Yowannisi 20:19-23; Mishiraachechinaꞌo 1:6-8)

36Ebin yibbaatee boonoshi beetaa, diqqoona Yesuusi boonoshi daggooch neexehe. Boonoshich “Diggoo ittoshich tunebe” iye.

37Tunebaani yoogo boonoshich bekketon shaahaa keqqoona shattiyeete. 38Biyoo “Ittoshi keqqiibeeto amoyichiye? Ittoshi mullo axiraacheebeeto amoyichiye? 39Ta kishoonaa ta baatoonon beegote; taalli baroo toonoone; taan yeshi beegote; taach meenonaa shaawushoona beetone; tunebaani yoogoyich meenonaa shaawushoona aalloone” iye.

40Ishin boonoshich gettiichii bi kishoonaa bi baatoonon bekkiihe. 41Boonoshiyoo emiroochee tiyitona bi gettiti mooyon iberiyoon hakkaaneenaꞌone. Ebich worganee boonoshi beetaa, “Manjeyemmi maayo ittoshi waan aalle?” iꞌi echehe. 42Boonoshiyoo micheeti haashee qaton immiyeete. 43Aroon yechiꞌi boonoshi aafoochaa maahe.

44Boonoshichoo “Ittoshina tookkaa beebee, ‘Muusichi Sheeroonaa keemechinaꞌochi macaafoonooch, Shoddee macaafoochoo kooreeti ta mooyo bulli ceeno echeyaachemmi mooyone’ ta ito ebiniye” iye.

45Areegaata Yaafe Macaafooch kooreeton boonoshi xiishemmoyich, boonoshi mulloon qechiye. 46Boonoshich ishichiye: “ ‘Kiristoosi xuuxoon beeggemmone; bi keejje qemooba qitoochee tiyemmone. 47Yerusaalemee tiijjiree aageteenaꞌo bulliich beddaahaa axaaxoochee Yeer waan wottoonaa maaroon danoonochi wochoo bi shigoona getteyemmone’ getaa kooreetone. 48Ittoshiyoo ebi mooyo bullich miixoo ittoshine. 49Illa ebiyoche, ta Nihoo Yeeri gibenikkiti gibenoon ta ittoshich deejjemmo taane; ebich damba Yeer waanee giidoo ittoshi toommooch bi kindimmi wottoon Yerusaalem quyebote” iye.

Shimaajj Yesuusi Hamo

(Maariqoosi 16:19-20; Mishiraachechinaꞌo 1:9-11)

50Ebiyee gubb, Yerusaalemee Bitaaniyi katinooch beddaahaa boonoshin dabbiiꞌi daammiye; aroochaanoo bi kishoon tiijjiꞌi boonoshin diiriibee, 51boonoshiyee bariꞌi shimaajj hammiye. 52Boonoshiyoo aroochaa biich goyinneechii, woddoon emiriibee Yerusaalem wotteheete. 53Kuxaanoon Yeerin galleteebee, yaafee kexooch heechii beeheete.

Currently Selected:

Luqaasi 24: KBRC

Highlight

Copy