आमोस 3
3
1हे इस्राएली लोकव, इन सज़ाहरू वचन शुना ज़ैन यहोवा तुश्शे बारे मां मतलब तैस कुलेरे बारे मां ज़ोवरूए ज़ैन मीं मिस्र मुल्खे मरां आनोरूए। 2“धेरतरे सैरी कुलन मरां सिर्फ मीं तुसने पुड़ मन लेवरोए, एल्हेरेलेइ अवं तुसन तुश्शे सैरी अधर्मेरे कम्मां केरि सज़ाह देइलो।”
नेबेरां कम्मां
3आमोस फिरी ज़ोते, “अगर दूई मैन्हु एक्की गल्ली पुड़ राज़ी न भोन, त कुन तैना साथी च़ेलि बटेले? 4कुन शेर बगैर शिकार मैल्हने जंगले मां गरज़ेलो? कुन जुवान शेर बगैर किछ ट्लानेरे एपनी कुढी मरां गरज़ेलो? 5कुन च़ुड़ोलोवं फंदो लाने बगैर फसेलू? कुन शिकारे बगैर फंदो फसेइ सकते? 6कुन कोन्ची नगरे मां जंगरे लेई नरशिंगो बज़ाने पुड़ लोक न थरकेले? कुन यहोवारे भेज़ने बगैर कोन्ची नगरे मां कोई मुसीबत पेली? 7एस्से तरीके प्रभु यहोवा अपने दास नेबन पुड़ अपनि योजना बांदी केरनेरे बगैर किछ भी न केरेलो।#प्रका. 10:7;भज. 25:14;यूह. 15:15. 8ज़ैखन शेर गरज़े, तैखन कौन न डरेलो? प्रभु यहोवा ज़ोवं: कौन नबूवत न केरेलो?”
9अश्दोद नगरेरे क़िले ते मिस्र मुल्खेरे क़िलन मां प्रचार केरतां ज़ोथ: “सामरियारे पहाड़न पुड़ अकोट्ठे भोइतां हेरा कि तैस मां केत्री शौर ते तैस मां केत्रां ज़ुलमेरां कम्मां भोइ राहोरेन!” 10यहोवारू एन ज़ोनूए, “ज़ैना मेरे लोक अपने क़िलन मां ज़ुलम ते च़ोरी कियोरू धन अकोट्ठू केरतन, तैना सच़्च़ैई सेइं कम केरनू न ज़ानन।” 11एल्हेरेलेइ प्रभु यहोवा एन ज़ोते: “मुल्खे घेरने बालो अक दुश्मन भोल्हो, ते तैए तेरी ताकत ट्लोड़ेलो, ते तेरे क़िले भी लुट्टे गाले।”
12यहोवा एन ज़ोते: “ज़ैस तरीके सेइं पुहाल शेरेरे ऐशी मरां दूई खुरैड़ू ते कनेरो अक टुक्ड़ो छुटाते, तेन्च़रे इस्राएली लोक, ज़ैना सामरिया मां बिछ़ानेरे एक्की कूने या रेशमेरी गेद्दी पुड़ बिशतन, तैना भी छुटाए गाले।”
13सेना केरो परमेशर, प्रभु यहोवा एन ज़ोते, “हेरा, ते याकूबेरे खानदाने सेइं ऐह गल खबरदार केरतां ज़ोथ: 14ज़ैस मौके अवं इस्राएली लोकन तैन केरे पापां केरि सज़ाह देलो, तैस मौके अवं बेतेल नगरेरे वेदन भी नाश केरेलो, ते वेदरां शिंगां ट्लुटतां ज़मीनी पुड़ बिछ़ड़ी गालां। 15ते अवं ते हिवंतड़ेरे ते रितरे दूईये मेहलन बिछ़ोड़ेलो। ते हाथी दांतां केरे बनोरे मेहल भी नाश भोल्हे, ते बड्डां-बड्डां घरां भी नाश भोल्हां,” यहोवा एन ज़ोते।
Currently Selected:
आमोस 3: BHDNT
Highlight
Share
Compare
Copy
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.