उत्पत्ति 32
32
एसावेरू याकूबे सेइं मिलनेरे लेई एजनू
1याकूब भी एपनी बत्तां च़लो जेव, ते परमेशरेरे दूत एइतां तैस सेइं मिले। 2तैन हेरतां याकूबे ज़ोवं, “ई त परमेशरेरी सेनाए।” एल्हेरेलेइ तैनी तैस ठारारू नवं महनैम#32:2 महनैम मतलब दूई डेरे। रख्खू।
3तैखन याकूबे सेईर#32:3 सेईर सेईर एदोमेरू दूइयोवं नंव्वे। मुल्खे मां, मतलब एदोम मुल्खे मां, अपने ढ्ला एसावे कां एप्पु करां अग्री-अग्री दूत भेज़ी दित्ते। 4ते तैनी तैन ऐह हुक्म दित्तो, “मेरे मालिक एसावे सेइं इन ज़ोनू; कि तेरो नौकर याकूब तीं सेइं इन ज़ोते, कि अवं लाबाने कां इड़ी परदेशी बेनतां हुन्ना तगर राव। 5ते मीं कां गोरू, गब्बां, गधे, ते नौकर-नौकरैनी भी आन, ते मीं अपने मालिके कां एल्हेरेलेइ समाद भेज़ोरोए कि तेरे अनुग्रहेरी नज़र मीं पुड़ भोए।”
6तैना दूत याकूबे कां वापस एइतां ज़ोने लगे, “अस तेरे ढ्ला एसावे कां जेवरे थिये, ते तै भी तीं सेइं मिलनेरे लेई 400 मड़दन सेइं साथी एज्जी राहोरोए।” 7तैखन याकूब बड़ो डेरि जेव, ते दुखे मां पेव: ते एन सोचतां, अपने सैथी केरे, ते गोरू ते गब्बां, ते ऊँटां केरे भी अलग-अलग दूई-दूई जथे बनाए। 8कि अगर एसाव एइतां पेइले जथे मारेलो, त होरो जथो नेशतां बेंच़ी गालो।
9फिरी याकूबे प्राथना केरतां ज़ोवं, “हे यहोवा, हे मेरे दादा अब्राहमेरे परमेशर, हे मेरे बाजी इसहाकेरे परमेशर, तीं त मीं सेइं ज़ोवरू थियूं, कि तू अपने मुल्खे ते एपनी ज़र्म धेरती जो वापस गा, ते अवं तेरू भलू केरेलो। 10तीं ज़ैन कम एपनी दया ते सच़्च़ाई सेइं अपने नौकरे सेइं कियोरूए, कि अवं ज़ै अपनि सोटी ट्लेइतां इस यरदन दरियारे पार ओस्तां एवरोईं, ते हुन्ना मेरे दूई जथे भेवरेन, ते तेरे एरे-एरे कम्मन मरां अवं एकेरे भी काबल नईं। 11मेरी बिनती शुन्तां मीं मेरे ढ्ला एसावे करां बच़ा, अवं त तैस करां डरताईं, कोन्च एरू न भोए कि तै एइतां मीं सेइं ते अम्मा समेत मट्ठन भी मैरी छ़डे। 12तीं त ज़ोवरू थियूं, कि अवं सच़्च़े तेरू भलू केरेलो, ते अवं तेरे खानदाने समुन्दरेरी रेतरे बराबर बधेइलो, कि तैना हछे जादे भोनेरे वजाई सेइं गेनोले नन्ना।”
13तैनी तैस दिहाड़े तै रात तैट्ठी गुज़ारी; ते ज़ैन किछ तैस कां थियूं, तैस मरां अपने ढ्ला एसावे तोफे देनेरे लेई तैली-तैली कढू। 14मतलब 200 छ़ेल्ली, ते 20 थाव्वे, ते 200 भैड्डां, ते 20 हुड़। 15ते बच्चन सने दुद्ध देने बैली 30 ऊँटनि, ते 40 बेछ़ी, ते 10 दांत, ते 20 गेधी ते तैन केरे 10 बच्चे। 16तैना तैनी अपनु झुण्ड-झुण्ड केरतां अपने नौकरन सौंफतां दित्ते, ते तैन सेइं ज़ोवं, “मीं करां अग्री-अग्री च़ला, ते अक जथो होरि जथे करां दूर-दूर राए।” 17फिरी तैनी अपने एग्री टोलरे पुहाले ऐह हुक्म दित्तो “ज़ैखन मेरो ढ्ला एसाव तीं मैल्हे, ते पुछ़े, ‘तू केसेरो नौकरस, ते कोरहां च़लोरोस, ते ज़ैना तीं अग्री-अग्री च़लोरेन, तैना कैसेरेन?’ 18तैखन तू ज़ोइयां, ‘एना तेरे नौकर याकूबेरेन। हे मेरे मालिक एसाव ई तोफो तेरे लेई भेज़ोरोए, ते तै एप्पु भी असन पत्पती एज्जी राहोरोए।’” 19ते तैनी दूइयोवं ते ट्लेइयोवं पुहाले भी, ते सेब्भन ज़ैना तैन टोली केरे पत्पती थिये, एहे हुक्म दित्तोरो थियो, कि ज़ैखन एसाव तुसन मैल्हे त तैस सेइं एन्ने ज़ोइयथ। 20ते एन भी ज़ोइयथ, “तेरो नौकर याकूब असन पत्पती एज्जी राहोरोए।” किजोकि तैनी इन सोचतां कि ई तोफो ज़ै मीं अग्री-अग्री भेज़ोरोए, एस सेइं अवं तैसेरी सरक ठंडी केरतां तैसेरू दर्शन केरेलो, भोइ सकते कि तै मीं पुड़ खुश भोए। 21एल्हेरेलेइ तै तोफो याकूबे करां पेइलो पार पुज़्ज़ो, ते तै एप्पु तैस राती डेरन मां राव।
याकूबेरो घौल
22तैस राती याकूब उठो ते एपनी दूईये कौन्शां, ते दूईये नौकरैनी, ते यारहे मट्ठां साथी नेइतां यब्बोक दरियारे पार गेइतां पुज़्ज़ो। 23तैनी तैना तैस दरियारे पार पुज़ाए, ते अपनु सब किछ पार पुज़वं। 24ते याकूब एप्पु अकैल्लो रेइ जेव; तैखन कोई मड़द एइतां झ़ेझ़ भोने तगर तैस सेइं घौल केरतो राव। 25ज़ैखन तैनी हेरू कि अवं याकूबे न डोल्ही बेटि, तैखन तै तैसेरी ज़ंघरी नसी सेइं हुरो; ते याकूबेरी ज़ंघरी नस तैस सेइं घौल केरते-केरते च़ेढ़ी जेई। 26तैखन तैनी ज़ोवं, “मीं हथरां छ़ड, किजोकि ट्लेकड़ोने बालूए।” याकूबे ज़ोवं, “ज़ांतगर तू मीं आशिर्वाद न देस, तांतगर अवं तीं हथरां न छ़ेडी।” 27ते तैनी याकूबे पुछ़ू, “तेरू नवं कुने?” तैनी ज़ोवं, “याकूब।” 28तैनी ज़ोवं, “तेरू नवं हुनी याकूब नईं, पन इस्राएल#32:28 इस्राएल मतलब परमेशरे सेइं जंग कियो। भोल्हु, किजोकि तू परमेशरे ते मैन्हन सेइं लड़ाई केरतां ज़ींतो।” 29याकूबे ज़ोवं, “अवं बिनती केरताईं, मीं सेइं अपनु नवं ज़ो।” तैनी ज़ोवं, “तू मेरू नवं किजो पुछ़तस?” तैखन तैनी तैस्से ठारी आशिर्वाद दित्तो। 30तैखन याकूबे तैस ठारारू नवं पनीएल#32:30 पनीएल मतलब परमेशरेरू आशी। रख्खू; किजोकि तैनी ज़ोवं, “परमेशर लेहितां भी मेरी जान बंच़ोरीए।” 31पनूएलेरां च़लते-च़लते दिहाड़ो निस्सी जेवरो थियो, ते तै तैस ज़ंघी सेइं लंघतो थियो। 32एल्हेरेलेइ इस्राएली लोक जानबरां केरे ज़ंघरे जोड़े बाली नस अज़ तगर भी न खान, एसेरी वजा ईए कि तै मैन्हु याकूबेरी ज़ंघरे जोड़े बैली नसी सेइं हुरोरो थियो।
Currently Selected:
उत्पत्ति 32: BHDNT
Highlight
Share
Compare
Copy
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
