उत्पत्ति 34
34
दीना सेइं कुकर्म
1किछ सालना बाद एक्सां लिआरी कुई दीना, ज़ै याकूबेरे ज़िरिये पैदा भोवरी थी, तैस कनान मुल्खेरी कुइयन सेइं मिलनेरे लेई निस्सी। 2तेइस तैस मुल्खेरे प्रधान हिब्बी हमोरेरू मट्ठू शेकेमे तै लाही, ते तैनी तैस सेइं कुकर्म केरतां तै बदनाम की। 3ते फिरी तैसेरो मन याकूबेरी कुई दीना सेइं लेगि जेव, ते तैनी तैस कुइये सेइं प्यारेरी गल्लां की, ते तैस सेइं प्यार केरने लगो। 4आखरकार शेकेमे अपने बाजी हमोरे सेइं ज़ोवं, “इस कुइये सेइं मेरो ड्लाह बना।” 5ते याकूबे एन शुनू कि शेकेमे मेरी कुई दीना सेइं कुकर्म केरतां अशुद्ध कियोरीए, पन तैसेरां मट्ठां तैस मौके जानबरन सेइं मैइदाने मां थियां, एल्हेरेलेइ तै तैन केरे एजने तगर च़ुप राव। 6तैस वक्ते मां शेकेमेरो बाजी हमोर याकूबे सेइं गलबात केरनेरे लेई तैस कां अव। 7याकूबेरां मट्ठां ई गल शुन्तां मैइदाने मरां बड़े सेरकोइतां आं; किजोकि शेकेमे याकूबेरी कुइये सेइं कुकर्म केरतां इस्राएलेरे घराने सेइं बेवकूफी कियोरी थी, ज़ैन नाजाइज़ थियूं। 8हमोरे तैन सेब्भन सेइं ज़ोवं, “मेरे मट्ठे शेकेमेरो मन तुश्शी कुइये दीना सेइं लगोरोए, एल्हेरेलेइ तैस मेरे मट्ठे जो देथ। 9ते असन सेइं रिशते दारी केरा; एपनी कुइयां इश्शी खानदाने मां देथ, ते इश्शी कुइयां तुसां मग्गा। 10ते असन सेइं साथी बस्सोरे राथ; ते ई मुल्ख तुश्शे सामने पेवरोए; इस मां रेइतां लेन-देन केरा, ते ई ज़मीन अपने लेई रखा।” 11ते शेकेमे भी दीनारे बाजी ते ढ्लान सेइं ज़ोवं, “अगर मीं पुड़ तुश्शे अनुग्रहेरी नज़र भोए, त ज़ैन किछ तुस मीं सेइं ज़ोथ, अवं तैन्ने देइलो। 12तुस मीं करां चाए ज़ेत्री कीमत या बदले मां ज़ैन कि न मगथ, फिरी अवं तुश्शे ज़ोनेरे मुताबिक देइलो; पन तैस कुइये सेइं मेरो ड्लाह बनाथ।”
13पन याकूबेरे मट्ठेईं एन सोचतां कि शेकेमे इश्शी बेइन दीना अशुद्ध कियोरीए, त तैनेईं शेकेमे त तैसेरे बाजी हमोरे सेइं धोखो केरतां ई जुवाब दित्तो, 14“अस एरू कम न केरि सखम, कि ज़ैस मैन्हेरो खतनो न भोए भोवरो तैस जेई अपनि बेइन देम, किजोकि एस सेइं इश्शी बदनामी भोनीए। 15फिर भी अस एक्की शर्ते पुड़ तुश्शी गल मनमेले कि इश्शो ज़ेरो तुश्शे हर एक्की मड़देरो खतनो कियो गाए। 16तैखन अस एपनी कुइयां तुसन जेई ड्लांमेले, ते तुश्शी कुइयां असां ड्लांमेले, तुसन सेइं साथी बस्सोरे रहमेले, ते अस एक्की भाईच़ारेरे लोक भोमेले। 17पन अगर तुस इश्शी गल न मन्नथ ते अपनो खतनो न कराले, त असां अपनि कुई नेइतां च़ले गामेले।”
18तैसेरी ई गल शुन्तां हमोर ते तैसेरू मट्ठू शेकेम खुश भोए। 19ते तै जुवान ज़ै याकूबेरी कुइये बड़ो चातो थियो, इन कम केरने मां तैनी च़िर न लवं, तै त अपने बाजी केरे सारे घराने मां बड़ो इज़्ज़तदार थियो। 20एल्हेरेलेइ हमोर ते तैसेरू मट्ठू शेकेम अपने नगरेरे फाटके पुड़ गेइतां नगरेरे लोकन समझ़ाने लगे, 21“तैना मैन्हु त असन सेइं साथी मेल मिलापे सेइं रानू चातन; आखर तैन इस मुल्खे मां लेन देन केरने देथ; ते हेरा, ई मुल्ख भी तैन केरे लेई बड़ोए, फिरी असां तैन केरि कुइयां ड्लांमेले, ते एपनी कुइयां तैन जेई देमेले 22तैना लोक त सिर्फ एक्की गल्ली पुड़ असन सेइं साथी राने ते अक भाइच़ारो भोनेरे लेई तियारन, कि तैन केरे ज़ेरे इश्शे सेब्भी मड़दां केरो खतनो कियो गाए। 23कुन तैन केरां गोरू गब्बां बल्के तैन केरे सारे जानबर ते धन-दौलत इश्शी न भोल्ही; अस एत्रू केरम कि तैन केरि गल मन्नम, त तैना असन सेइं साथी राले।” 24एल्हेरेलेइ ज़ेत्रे तैस नगरेरे फाटके मरां निसोरे थिये, तैन सेब्भेईं हमोरी ते तैसेरे मट्ठे शेकेमेरी गल मन्नी, ते सेब्भी लोकां केरो खतनो कियो।
25तैन केरे खतनो केरनेरे ट्लेइयोवं दिहाड़े, ज़ैखन तैना लोक खतनेरे ज़खमे सेइं तकलीफी मां पेवरे थिये, तैखन एरू भोवं कि शिमोन ते लेवी नंव्वेरे याकूबेरे दूई मट्ठेईं ज़ैना दीनारे ढ्ला थिये, अपनि-अपनि तलवार ट्लेइतां तैस नगरे मां बेधड़क भोइतां गेइतां सब मड़द मैरी छ़डे। 26हमोर ते तैसेरू मट्ठू शेकेम तलवारी सेइं मैरी छ़डे, ते दीना शेकेमेरे घरेरां वापस आनी। 27याकूबेरे होरे मट्ठेईं मैन्हु मैरतां ते तै नगर एल्हेरेलेइ लुट्टो कि तैस नगरे मां तैन केरि बेइन अशुद्ध भोवरी थी। 28तैन केरां गोरू, गब्बां ते गधे ते नगर ते मैइदाने मां ज़ेत्री धन-दौलत थी सब घिन्नी जे। 29तैन केरू सब किछ ते तैन केरे बाल बच्चे ते कौन्शन समेत घिन्नी जे, बल्के घरे-घरे मां ज़ैन किछ थियूं, तैन सब तैनेईं लुटी छ़डू। 30तैखन याकूबे शिमोन ते लेवी सेइं ज़ोवं, “तुसेईं इस मुल्खेरे रानेबाले कनानी ते परिज्जी लोकां केरे मने मां मेरे लेई ज़ै नफरत पैदा कियोरीए, तुसेईं अवं मुसीबती मां छ़डोरोईं; किजोकि मीं सेइं साथी त थोड़े ज़ेरे लोकन, एल्हेरेलेइ तैना लोक अकोट्ठे भोइतां मीं पुड़ हमलो केरेले; ते मीं मैरी छ़डेले, ते अवं अपने सारे घरे समेत नाश भोइ गालो।” 31तैनेईं ज़ोवं, “कुन तैन अस इश्शी बेइनी सेइं साथी वेश्या कौन्शरो ज़ेरो बर्ताव केरने देम?”
Currently Selected:
उत्पत्ति 34: BHDNT
Highlight
Share
Compare
Copy
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
