उत्पत्ति 36
36
एसावेरी खानदानी
1एसावे जो एदोम भी ज़ोतन, ते तैसेरी खानदानी ई आहे। 2एसावे त कनानी कुइयां ड्लेइतां एन्हीं; मतलब हित्ती एलोनेरी कुई आदा, ते ओहोलीबामा ज़ै अनारी कुई, ते हिब्बी सिबोनेरी धिहोड़ी थी। 3फिरी तैनी इश्माएलेरि कुई बासमत ज़ै नबायोतेरी बेइन थी, तैस सेइं ड्लाह बनाव। 4आदा त एसावेरे ज़िरिये एलीपज ज़र्मो, ते बासमतां रूएले ज़र्म दित्तू। 5ते ओहोलीबामारां मट्ठां यूश, यालाम, ते कोरह पैदा भोए, एसावेरां इना मट्ठां कनान मुल्खे मां पैदा भोआं।
6एसावे त एपनी कौन्शां, ते मट्ठां कुइयां, ते घरेरे सब प्राणी ज़ेन्च़रे कि गोरू-गब्बां सब जानबरन, ते सारी जाईदात ज़ै तैनी कनान मुल्खे मां अकोट्ठी कियोरी थी, एन्हतां अपने ढ्लाए याकूबे करां नेशतां दूर मुल्खे जो च़लो जेव। 7किजोकि तैन केरि जाईदात एत्री भोइ जेवरी थी, कि तैना अकोट्ठे न थिये रेइ बटते; ते जानबरां केरे हछे बधनेरे वजाई सेइं तैस मुल्खे, ज़ैड़ी तैना परदेशी बेनतां रहते थिये, अकोट्ठे राने जेई ठार न राई। 8एसावे जो एदोम भी ज़ोतन, तै सेईर नंव्वेरे पहाड़ी मुल्खे मां राने लगो। 9सेईर नंव्वेरे पहाड़ी मुल्खे मां रानेबाले एदोमी लोकां केरे पूर्वज एसावेरी खानदानी ईहीए 10एसावेरे मट्ठां केरां नव्वां इना आन: मतलब एसावेरी कौन्श आदारू मट्ठू एलीपज, ते एसावेरी कौन्श बासमतरू मट्ठू रूएल। 11ते एलीपजेरां इना मट्ठां भोआं: मतलब तेमान, ओमार, सपो, गाताम ते कनज। 12एसावेरे मट्ठे एलीपनेरी तिम्ना नंव्वेरी अक रखैल थी, ज़ैसां एलीपजेरे ज़िरिये अमालेके ज़र्म दित्तू: एसावेरी कौन्श आदारे खानदाने मरां एन्ना पैदा भोए। 13रूएलेरां इना मट्ठां पैदा भोआं: नहत, जेरह, शम्मा ते मिज्जा एसावेरी कौन्श बासमतेरे खानदाने मरां इना पैदा भोआं। 14ओहोलीबामा ज़ै एसावेरी कौन्श थी, ते सिबोनेरी नातिन ते अनारी कुई थी, तैसारां इना मट्ठां पैदा भोआं: तैसां एसावेरे ज़िरिये यूश, यालाम ते कोरहे ज़र्म दित्तू।
एदोमेरे प्रधान
15एसावेरे खानदाने मरां ज़ैना प्रधान बने तैना इनां थिये: मतलब एसावेरे बड्डे मट्ठे एलीपजेरे खानदाने मरां तेमान, ओमार, सपो, कनज, 16कोरह, गाताम, अमालेक, एलीपजेरे खानदाने मरां एदोम प्रदेशे मां प्रधान भोए: ते इना आदारे खानदाने मरां भोए। 17एसावेरां मट्ठां रूएलेरे खानदाने मरां इना प्रधान भोआं: मतलब नहत, जेरह, शम्मा, मिज्जा, रूएल खानदाने मरां एदोम प्रदेशे मां इना प्रधान भोए; ते इना एसावेरी कौन्श बासमतेरे खानदाने मरां प्रधान बने। 18एसावेरी कौन्श ओहोलीबामारे खानदाने मरां इना प्रधान बने: यूश, यालाम, कोरह, अनारी कुई ओहोलीबामा ज़ै एसावेरी कौन्श थी तैसारे खानदाने मरां इना प्रधान बने। 19एसाव ज़ैस जो एदोम भी ज़ोतन, तैसेरे खानदाने मरां सिर्फ इना आन, ते तैसेरे खानदाने मरां इना प्रधान भी बने।
सेईरेरी खानदानी
20सेईर ज़ै होरी नव्वेंरी कौमरो थियो, तैसेरां इना मट्ठां तैस मुल्खे मां पेइलां रहतां थियां; लोतान, शोबाल, सिबोन, अना, 21दीशोन, एसेर, ते दीशान। एदोम मुल्खे मां सेईरे इना होरी कौमरे लोक प्रधान भोए। 22लोतानेरां मट्ठां, होरी, ते हेमाम भोआं; ते लोतानेरी बेइन तिम्ना थी। 23शोबालेरां इना मट्ठां भोआं: आल्वान, मानहत, एबाल, शपो ते ओनाम। 24ते सीदोनेरां इना मट्ठां भोआं: अय्या ते अना; ई तैए अना आहे ज़ैस जंगले मां अपने बाजी सिबोनेरे गधे च़ारते-च़ारते गर्म पैनेरे चशमे मैल्होरे थिये। 25ते अना, दीशोन नंव्वेरू मट्ठू भोवं, ते तैस्से अना ओहोलीबामा नव्वेंरी कुई पैदा भोइ। 26दीशोनेरां इना मट्ठां पैदा भोआं: हेमदान, एशबान, यित्रान, ते करान। 27एसेरेरां इना मट्ठां पैदा भोआं: बिल्हान, जावान ते अकान। 28दीशानेरां इना मट्ठां पैदा भोआं: ऊस ते अरान। 29ते होरी नंव्वेरे कौमां केरे इना प्रधान भोए: लोतान, शोबाल, सिबोन, अना, 30दीशोन, एसेर, दीशान; सेईर मुल्खे मां होरी नंव्वेरे कौमरे लोक इना प्रधान भोए।
एदोम मुल्खेरे राज़े
31फिरी ज़ैखन इस्राएली लोकन पुड़ केन्चे राज़े राज़ न थियूं कियोरू, तैखन भी एदोम मुल्खे मां इना राज़े भोए: 32बोरेरे मट्ठे बेलाए एदोम प्रदेशे मां राज़ कियूं, ते तैसेरे नगरेरू नवं दिन्हाबा आहे। 33बेलारे मरनेरां बाद, बोस्रारे रानेबाले जेरहेरू मट्ठू योबाब तैसेरी ठैरी राज़ो बनो। 34योबाबेरे मरनेरे बाद, तेमानी लोकां केरे मुल्खेरो रानेबालो, हूशाम तैसेरी ठैरी राज़ो बनो। 35फिरी हूशामेरे मरनेरे बाद, बददेरू मट्ठू हदद तैसेरी ठैरी राज़ो बनो। ई तैए ज़ैनी मिद्यानी लोक मोआबेरे मुल्खे मां मारोरे थिये, ते तैसेरे नगरेरू नवं अबीते। 36हददेरे मरनेरां बाद, मस्रेका नगरेरो रानेबालो सम्ला तैसेरी ठैरी राज़ो बनो। 37फिरी सम्लारे मरनेरां बाद, शाऊल ज़ै फरात दरियारे बन्नेरो रहोबोत नगरेरो रानेबालो थियो, तै तैसेरे ठैरी राज़ो बनो। 38शाऊलेरे मरनेरां बाद, अकबोरेरू मट्ठू बाल्हानान तैसेरी ठैरी राज़ो बनो। 39अकबोरेरू मट्ठू बाल्हानानेरे मरनेरे बाद, हदर तैसेरी ठैरी राज़ो बनो, ते तैसेरे नगरेरू नवं पाऊ आहे; ते तैसेरी कौन्शरू नवं महेतबेले, ज़ै मेज़ाहाबेरी धिहोड़ी ते मत्रेदेरी कुई थी।
40फिरी एसावेरे खानदानेरे प्रधानां केरे कुल, ते ठारां केरे मुताबिक तैन केरां नव्वां इना आन तिम्ना, अल्वा, यतेत, 41ओहोलीबामा, एला, पीनोन, 42कनज, तेमान, मिबसार, 43मग्दीएल, ईराम, एदोमी लोकेईं ज़ै मुल्ख अपनो बनेवरो थियो, तैन केरि ठैरी इना प्रधान भोए; ते एदोमी कौमरो पूर्वज एसाव भोव।
Currently Selected:
उत्पत्ति 36: BHDNT
Highlight
Share
Compare
Copy
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
