उत्पत्ति 38
38
यहूदा ते तामार
1तैन दिहाड़न मां एरू भोवं कि यहूदा अपने ढ्लान करां च़लो जेव, ते हीरा नंव्वेरे एक्की अदुल्लामी मैन्हु सेइं साथी डेरो लव। 2तैड़ी यहूदाए शूआ नव्वेंरी अक कनानी मैन्हेरी कुई लाही; ते तैस सेइं ड्लाह बनेइतां तैस कां जेव। 3तै दोज़ींती भोइ, ते तैस अक मट्ठू भोवं; ते यहूदा तैसेरू नवं एर रख्खू। 4ते तै फिरी दोज़ींती भोइ, ते तैस अक होरू मट्ठू भोवं; ते तैसां तैसेरू नवं ओनान रख्खू। 5ते तै फिरी दोज़ींती भोइ, ते तैस अक होरू मट्ठू भोवं, ते यहूदा तैसेरू नवं शेला रख्खू; ते ज़ेइस तैन मट्ठू ज़र्मोरू थियूं, तेइस यहूदा कजीब नंव्वेरे जगाई रहतो थियो। 6ते किछ सालां केरे बाद यहूदा तामार नव्वेंरी एक्की कौन्शी सेइं अपने बड्डे मट्ठे एरेरो ड्लाह बनाव। 7पन यहूदारू बड्डू मट्ठू एर यहोवारे नज़री मां दुष्टी थियूं, एल्हेरेलेइ यहोवा परमेशरे तैन मारू। 8तैखन यहूदा ओनाने सेइं ज़ोवं, “अपनि भैभी सेइं ड्लाह बनेइतां तैस कां गा, ते तैस सेइं अपने बड्डे ढ्लाएरे लेई फर्ज़ पूरो केर, ते अपने ढ्लाएरे लेई औलाद पैदा केर।” 9ओनान त ज़ानतो थियो कि तै औलाद मेरी न भोल्ही; एल्हेरेलेइ एरू भोवं कि ज़ैखन तै अपनि भैभी कां जेव, तैखन तैनी वीर्य तल्ले बुछ़ोड़तां बरबाद कियो, ज़ैस सेइं एरू न भोए कि तैसेरे ढ्लाएरे नंव्वे सेइं खानदान च़ले। 10एन कम ज़ैन तैनी कियूं तैस सेइं यहोवा खुश न भोव, ते तैनी तै भी मैरी छ़डो। 11तैखन यहूदा इस डरे सेइं कि कोन्च एरू न भोए कि अपने ढ्लां केरो ज़ेरो शेला भी मेरि गाए, ते तैनी एपनी नुश्शी तामारी सेइं ज़ोवं, “ज़ांतगर मेरू मट्ठू शेला समझ़दार न भोए तांतगर तू अपने बाजी केरे घरे मां विधवा कौन्शरी ज़ेरि बिशोरी रा।” एल्हेरेलेइ तामार अपने बाजी केरे घरे मां राने लगी।
12बड़े च़िरेरां पत्ती यहूदारी कौन्श ज़ै शूआरी कुई थी, तै मेरि जेई; फिरी यहूदा मातमेरे दिहाड़े बीतनेरां बाद अपने दोस्त हीरा अदुल्लामी कां अपने गब्बां केरि उन्ना बरधांने तिम्नाह जो जेव। 13ते तामारी ई पतो लग्गो, “तैसारो शेरहो अपने गब्बां केरि उन्ना बरधांने तिम्नाह जो च़लोरोए।” 14तैखन तैसां एन सोचू कि शेला समझ़दार त भोइ जेवरोए पन अवं तैसेरी कौन्श नईं बनोरी; अपना विधवारां लिगड़ां खोल्लां, ते घुंघट लेइतां अपनु तुत्तर छ़ुपाव, ते एनैम नगरेरे फाटके पुड़ गेइतां बिश्शी जेई, ज़ै बत तिम्नाह जो गाती थी। 15ज़ैखन यहूदाए तै लाही, तैनी तै कौन्श वेश्या समझ़ी; किजोकि तैसां अपनु तुत्तर घुंघटे सेइं छ़ुपेवरू थियूं। 16तै बत्ती मरां तैसारे पासे फिरो, ते तैस सेइं ज़ोने लगो, “मीं एप्पु कां एजने दे।” (किजोकि तैस ऐह पतो न थियो कि तै तैसेरी नुश्शे।) ते तै ज़ोने लगी, “अगर अवं तीं एप्पु कां नेड़े एजने देईं, त तू मीं कुन देलो?” 17तैनी ज़ोवं, “अवं एपनी छ़ेल्लन मरां अक छ़ेड़ू भेज़ी देइलो।” तैखन तैसां ज़ोवं, “भला तैसेरे भेज़ने तगर कुन तू मीं कां बन्धे मां किछ रखेलो?” 18तैनी पुछ़ू, “अवं तीं कां कुन बन्धे मां रेखी?” तैसां ज़ोवं, “अपनि मोहर, ते बाजूबन्द, ते अपने हथ्थेरी सोटी दे।” तैखन तैनी तैस तैना चीज़ां दित्ती, ते तै तैस कां जेव, ते तै तैस सेइं दोज़ींती भोइ। 19तैखन तै तैट्ठां उठतां अपने घरे च़ली जेई, ते अपनु घुंघट खोलतां विधवा कौन्शां केरां ज़ेरां लिगड़ां लां।
20यहूदाए अपने वाधेरे मुताबिक अक छ़ेड़ू अपने दोस्त अदुल्लामी मैन्हेरे हथ्थे भेज़ू कि तै बन्धे मां रख्खोरी चीज़ां तैस कौन्शी करां छुटेइतां आने; पन तैस तै कौन्श न मैल्ही। 21तैखन तैनी मैन्हें तैट्ठेरे रानेबाले लोकन पुछ़ू, “तै देवदासी ज़ै एनैमेरी बत्ती मां बिशोरीए थी, कोड़िए?” तैनेईं ज़ोवं, “इड़ी त कोई देवदासी न थी।” 22एल्हेरेलेइ तैनी यहूदा कां वापस एइतां ज़ोवं, “मीं त तै न मैल्ही; ते तैट्ठेरे लोकेईं ज़ोवं, ‘कि इड़ी त कोई देवदासी न थी।’” 23तैखन यहूदा ज़ोवं, “ठीके, तैन बन्धू तैस्से कां राने दे, नईं त असां लोक घटिया गने गाले; हेर, मीं छ़ेड़ू भेज़ी दित्तेरू थियूं, पन तै तीं न मैल्ही।”
24कोई ट्लाई महीनां केरे बाद यहूदाए ऐह पतो लग्गो, “कि तेरी नुश तामार ज़ै थी, तैसां व्यभिचार कियोरोए ते तै दोज़ींती भी भोइ जेवरीए।” तैखन यहूदाए ज़ोवं, “तैस बेइर कढा कि तै फुक्की गाए।” 25ज़ैखन तै बेइर निस्सी राहोरी थी, तैखन तैसां अपने शेहरे जो ई समाद भेज़ो, “ज़ैस मड़देरी इना चीज़ां आन, तैस सेइं अवं दोज़ींती भोवरीं,” फिरी तैसां इन भी ज़ोवं, “पिशान ई मोहर ते बाजूबन्द, ते ई सोटी केसेरीए।” 26यहूदाए तैना पिशैनतां ज़ोवं, “ऐह त मीं करां जादे धर्मीए; किजोकि मीं तैसारो ड्लाह अपने मट्ठे शेला सेइं न बनाव।” ते तै तैसेरां बाद फिरी कधे तैस कां न जेव।
27ज़ैखन तैसारे गल्हे बिशनेरो मौको अव, तैखन ई पतो लग्गो कि तैसारे पेटे मां दूई मट्ठन। 28ज़ैखन तै गल्हे लगी बिशने त एक्की मट्ठेरो हथ बेइर निस्सो, ते घैइयाँ लाल सूट्ल एन्हतां तैसेरे हथ्थे इन ज़ोइतां बन्धू, “पेइलो ई ज़र्मोरोए।” 29ज़ैखन तैनी हथ पत्रोवं नियो, तैखन तैसेरो ढ्ला ज़र्मोरो। तैखन तैस घैइयाँ ज़ोवं, “तू किजो ज़बरदस्ती निसोरोस?” एल्हेरेलेइ तैसेरू नवं पेरेस#38:29 पेरेस मतलब ट्लुटोरी ते खुलोरी जगाह। रख्खू। 30तैसेरां बाद तैसेरो ढ्ला ज़ेसेरे हथ्थे लाल सूट्ल बन्धोरू थियूं ज़र्मो, ते एल्हेरेलेइ तैसेरू नवं जेरह#38:30 जेरह लाल झ़ेझ़री चमक। रख्खू।
Currently Selected:
उत्पत्ति 38: BHDNT
Highlight
Share
Compare
Copy
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
