हबक्कूक 3
3
हबक्कूकेरी प्राथना
1शिग्योनीतेरे#3:1 शिग्योनीतेरे इस अक रागे, इस रागे पुड़ हबक्कूके प्राथना की। रीती पुड़ हबक्कूक नेबेरी प्राथना।
2हे यहोवा, ज़ैन तीं कियूं तैस शुन्तां अवं डेरि जेव।
हे यहोवा, इस जुगे मां अपना कम्मां पूरू केर;
इश्शे जुगे मां तैस बांदे केर,
ते क्रोध केरने मां दया केरनी याद केर।
3परमेशर तेमान सूबे मरां एवरोए,
पवित्र परमेशर पारान पहाड़े पुड़ेरां एज्जी राहोरोए। (सेला)
तैसेरी महिमा अम्बरे मांए,
ते ज़मीन तैसेरी तारीफ़ी सेइं भेरोई जेवरीए।
4परमेशरेरी लौ दिहाड़ेरी ज़ेरिए,
तैसेरे हथ्थे सेइं किरणा निस्सी रेवरी थी;
तैन मां तैसेरी कुदरत छ़पोरी थी।
5महामारी तैस अग्री-अग्री च़लती जेई,
ते विनाश तैसेरे पव्वन सेइं निस्तो जेव।
6तै खड़ो भोइतां ज़मीनी नापतो#3:6 नापतो ज़मीन हिलने लगी। राव;
तैनी हेरू ते कौमां-कौमां केरे लोक घेमरोई जे;
तैखन जुगे-जुगेरां पहाड़ां चकनाचूर भोआं, ते सनातन पहैड़ी झुकी जेई,
तैसेरी बत हमेशा करां अक्कां ज़ेरिए।
7मीं कूशानेरे खानदानेरे लोक दुखे सेइं दबोरे लेइहोए;
ते मिद्यान मुल्खेरे डेरे हिल्ली जे।
8हे यहोवा, कुन तू दरियान पुड़ भी सेरकोरो थियो?
कुन तेरो क्रोध दरियान पुड़ भड़कोरो थियो?
कुन तेरी सरक समुन्दरे पुड़ भड़कोरी थी,
ज़ैखन तू अपने घोड़न पुड़ ते ज़ींत करानेबाले रथ्थन पुड़ च़ेढ़तां एज्जी राहोरो थियो?
9तेरू धनुष कमानी मरां निस्सी जेवं,
तेरी सज़ाह कसमरे मुताबिक भोइ। (सेला)
तीं धरती दरियान सेइं च़ीरी छ़डी।
10पहाड़ां तीं लेहितां हिलने लगां,
आँधी ते हड़ाई निस्सी जेई;
डुग्घो समुन्दर ज़ोने लगो ते अपने हथ्थन
मतलब छ़ेल्ही खेड़ि की।
11तेरे उडरने बाले तीरां केरि लौई सेइं,
ते तेरे चमकीले भालेरी चमकरी लौई सेइं दिहाड़ो ते चाँदनी अपने-अपने ठैरी रुकी जे।
12तू क्रोधे मां एइतां धेरती पुड़ निस्सो,
ते अपने क्रोधे सेइं तीं कौमां-कौमां केरे लोकां केरो नाश कियो।
13तू अपने लोकां केरो छुटकारो केरनेरे लेई निस्सो,
हाँ, ते अपने अभिषिक्त राज़े सेइं साथी भोइतां बच़ानेरे लेई निस्सो।
तीं दुष्टेरू घर ढ्लेन्च़ी छ़डू, ते तैसेरी बुनीयाद बिलकुल बरबाद की, (सेला)
14तीं तैसेरे योद्धा केरि क्रोड़ी तैसेरे भाले सेइं कोश्शी,
तैना मीं तितर-बितर केरनेरे लेई बड़े आँधी तूफानेरे ज़ेरे आए,
ते दीन लोकन मारनेरी उमीदी सेइं खुश थिये।
15तू अपने घोड़न पुड़ सुवार भोइतां समुन्दरे सेइं हाँ, हड़ैई सेइं पार भोइ जेव।
16इन सब शुन्ते मेरो कलैज़ो थर-थर कापने लगो;
मेरे ओठ थरकने लगे;
मेरी हेड्डी गलने लेग्गी, ते अवं खड़े-खड़े थरकने लगो,
अवं आरामे सेइं तैस दिहाड़ेरो इंतज़ार केरतो रेइलो,
ज़ैखन दल बेन्धतां लोक चढ़ाई केरन।
17किजोकि अगर फैगेरे बुट न फुल्लन,
ते दाछ़ी सेइं फल न लगे,
ते ज़ैतूने सेइं सिर्फ धोखो मैल्हे,
ते उडारन मां फसल न भोए,
ते बाड़े मां गब्बां न रान,
ते गाल्ही मां गोरू न भोन।#लूक. 13:6.
18फिरी भी अवं यहोवारे वजाई सेइं मघन रालो,
ते छुटकारो देनेबाले अपने परमेशरेरे ज़िरिये बड़ो खुश भोल्हो।
19यहोवा परमेशर मेरो ताकत देनेबालोए,
तै मेरे पव्वन हिरनरे पव्वां केरे ज़ेरे बनाते,
तै मीं उच्ची ठारन पुड़ च़लाते।
Currently Selected:
हबक्कूक 3: BHDNT
Highlight
Share
Compare
Copy
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.