यूहन्ना 6

पांज्ज हजार मर्दां जो रोटी ख्वाणा

(मत्ती 14:13-21; मरकुस 6:30-44; लूका 9:10-17)

1इन्हां गल्लां ते बाद यीशु गलील दरयावा रे तिबिरियास पार गया। 2कने लोकां री इक बड्डी भीड़ तिसरे पिच्छे चलीपी काँह्भई जो चमत्कार करने औल़े काम्म सै बमाराँ पर दस्सां था लोक तिन्हाजो देक्खां थे। 3फेरी यीशु पहाड़ा रे ऊपर गया कने तित्थी अपणयां चेलयां सौगी बैट्ठया। 4यहूदियां रा फसह रा त्योहार नजदीक आईरा था। 5फेरी यीशुये बौहत लोकां री भीड़ अपणे खौ औन्दी देक्खी, कने फिलिप्पुसा ने गलाया भई “अहां इन्हांरे खाणे खातर रोटी किति ते खरीदी ने लौणी?” 6पर तिने ये गल्ल तिस्सो परखणे खातर बोल्ली, काँह्भई सै खुद जाणाँ था भई माह क्या करना। 7फिलिप्पुसे तिसजो जबाब दित्या, “दो सौ दिनार आम माहणुये रे खातर तकरीवन दो सौ दिनां री मजदूरी थी, रोटिया रिया कमिया रे दौरान (इतणे जादा लोकां रे खातर आस-पास रे गाँवां ते रोटी कठेरी सक्कां ये ) इक दिना री मजदूरी सिर्फ इक्की परिवारा जो ख्वाई सक्कां इ।” 8तिसरे चेलयां चते शमौन पतरस रे भाई अन्द्रियासे तिसने गलाया, 9“येत्थी इक मुण्डु आ तिसले जौआ रियां पांज्ज रोटियां कने दो मच्छियां इ; पर इतणे सारेयां लोकां रा इन्हांने क्या बणना?” 10यीशुये गलाया, “लोकां जो बठाल़ा।” तिसा जगह च जे सै बैट्ठे तित्थी मता घा था : कने तिन्हां च तकरीवन पांज्ज हजार रे करीब माहणु थे। 11फेरी यीशुये रोटियां लैई, कने धन्यवाद करीने तित्थी बैठिरे सारयां लोकां जो परोसणे जो देईती; कने तियां इ मच्छियां चते जितणी सै लेणा चाँह थे बन्डी तियां। 12ताहली जे सै रज्जीने खाई बैट्ठे तां तिने अपणे चेलयां जो गलाया, भई “जितने टुकड़े बचीरे, तिन्हांजो कट्ठा करी लो ताकि सै बेकार नीं जाओ।” 13ताहली जे सारे खाई बैट्ठे, तां फेरी तिन्हें पंज्जां रोटियां ते बचीरे सारे टुकड़े कट्ठे कित्ते कने तिन्हारी बारा टोकरियां भरियां। 14यीशुये रे इस चमत्कारा जो देखीने लोक बोलणे लगे, भई “सै भविष्यवक्ता जे इस संसारा च औणे औल़ा था, ये पक्का सैई हाया।” 15यीशु ये जाणिग्या भई ये मिन्जो राजा बनाणे खातर आई ने पकड़ना चाँये, इस खातर सै कल्हा इ पहाड़ा पर चलीया।

यीशुये रा पाणिये पर चलना

(मत्ती 14:22-33; मरकुस 6:45-52)

16फेरी ताहली जे सांझ हुई, तां तिसरे चेले नदिया रे कण्डे गये, 17कने किश्तिया च बैठीने नदिया पार कफरनहूम नगरा जो जाणे लगे; तिस वगत अन्धेरा हुई चुक्कीरा था, कने यीशु हल्तियें तक तिन्हांले नीं पुज्जीरा था। 18तूफाना रिया बजह ने नदिया च पाणिये रियां बडबडियां छालियां औणे लगियां। 19ताहली जे सै किश्तिया चलान्दे-चलान्दे तकरीवन पांज्ज या छे किलोमीटर चलिये, फेरी तिन्हे यीशुये जो पाणिये पर चलदे कने किश्तिया खौ औन्दे देख्या, तां सै डरिये। 20पर यीशुये तिन्हांजो गलाया, भई “हऊँ आ; मता डरदे।” 21फेरी झटपट तिन्हें यीशुये जो किश्तिया च चढ़ाईल्या कने थोड़िया इ देरा च किश्ती तिसा जगह पुज्जीगी तित्थी जे सै जाईराँ थे।

लोकां रा यीशुये जो टोल़णा

22दुज्जे दिन लोकां रिये तिसे भीड़े सै जे नदिया रे दुज्जे कण्डे खढ़िरे थे, ये देख्या भई तित्थी इक इ किश्ती थी कने यीशु अपणे चेलयां सौगी तिसा च नीं बैट्ठया था, पर सिर्फ तिसरे इ चेले गये थे। 23फेरी किछ होर छोट्टी किश्तियां तिबिरियास नगरा ते आईने तिसा जगह ले आईयां, तित्थी जे तिन्हे प्रभुये रा धन्यवाद करने ते बाद रोटी खाद्दि थी। 24इस खातर तां जे लोकें देख्या भई नांत ऊत्थी यीशु आ, कने नां तिसरे चेले, तां सै तिन्हां किश्तियां च बैट्ठे कने यीशुये जो टोलदे-टोलदे कफरनहूम नगरा च पुज्जीगे।

यीशु जीवना री रोटी

25नदिया रे दुज्जे कनारे तां जे सै तिसने मिले तां तिन्हें गलाया, “गुरू जी, तुहें इत्थी किस बगत पुज्जे?” 26यीशुये तिन्हांजो जबाब दित्या, भई “हऊँ तुहांजो सच्च बोलां, तुहें मेरे पिच्छे इस खातर नीं आये भई तुहें हैरान करने औल़े काम्म देखे, पर इस खातर आये भई तुहांजो खाणे जो रज्जीने रोटी मिली। 27तिसा रोटिया खातर मेहणत नीं करा सै जे सड़ी जाईं, पर तिसा खातर मेहणत करा सै जे अनन्त जीवन देआं, सै जे माहणुये रे पुत्रा यनि मांह तुहांजो देणी; काँह्भई पिता यनि परमेशरे मिन्जो इ अधिकार दित्तिरा।” 28लोकें तिसते पुच्छया, “तिन्हां कम्मां जे परमेशर चाँह, तिन्हाजो करने खातर अहें क्या करिये?” 29यीशुये तिन्हांजो जबाब दित्या, “परमेशर सै जे चाँह सै येआ भई तिस्सो जे तिने भेजीरा, तुहें तिस पर विश्वास करा।” 30फेरी लोकें तिसने गलाया, “फेरी तू केढ़ा जेआ चमत्कार दसणा भई अहें तिन्हांजो देखीने तूह पर विश्वास करो? 31अहांरे पूर्वजां सुनसान जगह च मन्ना#6:31 मन्ना यनिके ये कणका रे ब्यूआ बराबर रोटी थी सै जे परमेशरे स्वर्गा ते बरसाई थी खादया था; तियां जे पबित्र शास्त्रा च लिखिरा, तिने तिन्हांजो खाणे खातर स्वर्गा ते रोटी दित्ति।” 32यीशुये तिन्हाजो गलाया, “हऊँ तुहां ते सच्च बोलां भई मूसे सै रोटी तुहांजो स्वर्गा ते नीं दित्ति, पर मेरा पिता तुहांजो सच्ची रोटी स्वर्गा ते देआं। 33काँह्भई परमेशरा री रोटी सैई, सै जे स्वर्गा ते उतरी ने संसारा रे लोकां जो जीवन देईं।” 34फेरी तिन्हें तिसने गलाया, “प्रभु जी, ये रोटी अहांजो हमेशा देआ कर।”

35यीशुये तिन्हांने गलाया, “जीवना री रोटी#6:35 जीवना री रोटी यनि अनन्त जीवन हऊँ इ : सै जे मेरले औंगा तिस कदीं भूखे नीं रैहणा कने सै जे माह पर विश्वास करगा, तिस कदीं प्यासे नीं हूणा। 36पर मैं तुहांजो पैहले तेई गलाईरा भई तुहें मिन्जो देक्खी बी लया, तां बी माह पर विश्वास नीं करदे। 37सै किछ जे पिता मिन्जो देआं सै सारा मेरलौ इ औणा, कने तिस जे मेरले औणा तिसजो मांह कदीं नीं त्यागणा। 38काँह्भई हऊँ स्वर्गा ते इस खातर नीं आईरा, भई अपणी इच्छा पूरी करूँ, पर हऊँ इस खातर आईरा भई अपणे भेजणे औल़े परमेशरा री इच्छा जो पूरा करूँ। 39कने मेरे भेजणे औल़े परमेशरा री इच्छा येई, भई सै जे किछ तिने मिन्जो दित्तिरा तिस्सो हऊँ पूरा-पूरा संभाल़ीने रक्खूं, पर माह तिन्हां सब्बीं जो न्याय रे दिन भीं ते जिऊंदा करी देणा। 40काँह्भई मेरे पिता री इच्छा येई, भई तिस जे पुत्रा जो देखीने तिस पर विश्वास करना तिस अनन्त जीवन पाणा; कने माह सै न्याय रे दिन भीं ते जिऊंदा करी देणा।” 41इस खातर यहूदी अगुवे यीशुये पर बड़बड़ाणे लगे काँह्भई तिने गलाया था, भई “सै रोटी जे स्वर्गा ते उतरी री, सै हऊँ इ।” 42कने तिन्हे बोल्या, क्या ये सैई यीशु निआं, सै जे यूसुफा रा पुत्र आ, तिसरे पिता कने माता जो जे अहें जाणाँ ये? तां सै हुण कियां बोलां, भई हऊँ स्वर्गा ते आईरा? 43यीशुये तिन्हाजो जबाब दित्या, “अप्पूँ बाटियें मता बड़बड़ान्दे। 44तिने पिते जे हऊँ भेज्जिरा, बिणा तिसरिया मर्जिया ते मेरले कोई नीं आई सकदा, तदुआं तक जे पिता, तिसरे दिला च, मेरले औणे री इच्छा पैदा करीने तिस्सो खिंजी नीं लो; कने माह न्याय रे दिन सै मूईरयां चते दोबारा जिऊंदा करीने ठवाल़णे। 45भविष्यवक्तयां रे लेक्खां च ये लिखिरा : भई ‘सै सारे परमेशरा रे सखाईरे हुणे।’ तिन्हे किन्हिये जे पिता ते सुणया कने सिक्खया सै मेरले औआं। 46इसरा ये मतलब नींआ, भई किन्हिये पिता जो नीं देखीरा। हऊँ कल्हा सै जे परमेशरा रिया तरफा ते आईरा कने मैं तिसजो देखीरा। 47हऊँ तुहांजो सच्च बोलां भई सै जे विश्वास कराँ अनन्त जीवन तिसरा इ हाया। 48जीवना री सै रोटी हऊँ आ। 49तुहांरयां पूर्वजें सुनसान जगह च मन्ना खाद्दया कने सै मरी चुक्कीगरे। 50ये सै रोटी सै जे स्वर्गा ते उतराँ इ ताकि सै जे कोई माहणु तिसाजो खाओ, सै नीं मरदा। 51जीवना री रोटी सै जे स्वर्गा ते उतरी हऊँ आ। जे कोई इसा रोटिया चते खाओ, तां हमेशा जिऊंदा रैहन्गा; कने सै रोटी जे मांह संसारा रे लोकां रे जीवना खातर देणी, सै मेरा शरीर आ।”

52इसा गल्ला पर यहूदी अगुवे ये बोलीने अप्पूँ बाटियें बैह्सणे लगे, भई “ये माहणु कियां अहांजो अपणा शरीर खाणे जो देई सक्कां?” 53फेरी यीशुये तिन्हौ गलाया, “हऊँ तुहांजो सच्च बोलां तदुआं तक जे तुहें माहणुये रे पुत्रा रा यनि मेरा शरीर नीं खाओ, कने मेरा खून नीं पीओ, तदुआं तक तुहांले अनन्त जीवन नीं हूणा। 54सै जे मेरा शरीर खां कने मेरा खून पीआं, अनन्त जीवन तिसरा इ हाया; कने न्याय रे दिन मांह सै मूईरयां चते भीं जिऊंदा करीने ठवाल़णा। 55काँह्भई हकीकत च मेरा शरीर खाणे री, कने मेरा खून पीणे री चीज़ इ। 56सै जे मेरा शरीर खां कने मेरा खून पीआं सै माह च बास कराँ, कने हऊँ तिसच। 57बिल्कुल तियां इ जियां जे जिऊंदा पिते हऊँ भेज्जिरा कने हऊँ पिता परमेशरा रिया बजह ने जिऊंदा, तियां इ सै बी तिस जे हऊँ खाणा मेरिया बजह ते जिऊंदे रैहणा। 58ये सैई रोटी सै जे स्वर्गा ते उतरी री, ये रोटी तिसा रोटिया साई नीं सै जे तुहांरे पूर्वजें खाद्दि कने मरीगे; सै जे कोई इसा रोटिया खांगा, तिस हमेशा जिऊंदे रैहणा।” 59ये गल्लां तिने कफरनहूम नगरा रे इक्की यहूदी सभा घर च उपदेश देन्दे बगत बोल्ली।

अनन्त जीवना रे बचन

60इस खातर तिसरे चेलयां चते कईयें इन्हां गल्लां जो सुणीने गलाया, भई “ये शिक्षा त बौहत मुश्कल इ, इस पर कुण विश्वास करी सक्कां?” 61यीशुये अपणे मना च जाणील्या भई मेरयां चेलयां जो मेरियां इन्हां गल्लां ते कोई शकैत इ, इस खातर तिने अपणे चेलयां ते पुच्छया, “क्या तुहें इन्हां गल्लां ते परेशान ये? 62कने जे तुहें माहणुये रे पुत्रा जो यनि मिन्जो, तित्थी जे हऊँ पैहले था, भीं ते स्वर्गा च जान्दे देखणा, तां क्या हूणा? 63परमेशरा रा आत्मा त जीवन देणे औल़ा, शरीरा ते कोई फैदा निआं; सै गल्लां जे मैं तुहांजो गलाईयां सै पवित्र आत्मा ते औईयां, कने लोकां जो जीवन देईयां। 64पर तुहां च येढ़े कितणे लोक ये, सै जे विश्वास नीं करदे।” काँह्भई यीशु पैहले तेई जाणाँ था भई सै जे विश्वास नीं करदे, सै कुण ये; कने मिन्जो पकड़वाणे औल़ा कुण आ? 65कने तिने गलाया, “इस खातर मैं तुहांजो गलाया था भई तदुआं तक मेरले कोई नीं आई सकदा तदुआं तक जे पिता परमेशर तिस्सो मेरले औणे री इजाज़त नीं देई दो।”

पतरसा रा विश्वास

66इसा वजह ते यीशुये रे बौहत सारे चेले पिच्छे हटीगे कने तिन्हे यीशुये रा साथ देणा छडित्या। 67फेरी यीशुये अपणे बारा चेलयां ने गलाया, “क्या तुहें बी जाणा चाँये?” 68शमौन पतरसे तिस्सो जबाब दित्या, “प्रभु जी, अहें किसलौ जाईये? अनन्त जीवन देणे औल़ियां गल्लां त तेरले इ हाया। 69कने अहें तूह पर विश्वास कित्या कने ये जाणीगे भई परमेशरा रा पवित्र पुत्र तूई हाया।” 70यीशुये तिन्हांजो जबाब दित्या, “क्या तुहां बाराँ जो मैंई नीं चुणीरा? फेरी भीं तुहां च इक माहणु शैतान रे वशा चा।” 71सै शमौन इस्करियोति रे मुण्डुये यहूदा रे बारे च गल्ल करी रां था, काँह्भई सै यीशुये रा बरोधी बणीने तिस्सो धोखा देणे औल़ा था, काँह्भई सैई बाराँ चेलयां चते इक था।

Currently Selected:

यूहन्ना 6: KFSNT

Highlight

Copy