मत्ती 23

शास्त्रियां कने फरीसियां ते खबरदार

(मरकुस 12:38-39; लूका 11:43-46; 20:45,46)

1फेरी यीशुये लोकां री भीड़ा ने कने अपणे चेलयां ने गलाया, 2शास्त्री कने फरीसी तिन्हांले जे मूसा रिया व्यवस्था जो सिखाणे रा अधिकार आ; 3इस खातर सै जो किछ बोल्लो तिस पर चलयां कने तिसरा पालन करयां, पर तिन्हारे साई काम्म मत करयां; काँह्भई सै बोलां त हाये पर करदे नींये। 4सै तुहां पर कई नियम लागू कराँ ये तिन्हांरा पालन करना जे कठण आ, सै लोकां जो तिन्हां पर चलने खातर मजबूर कराँ ये; पर सै खुद अपणे नियमां पर नीं चलदे। 5सै अपणे सारे काम्म लोकां जो दसणे खातर कराँ ये: सै अपणे जंत्राँ#23:5 जंत्राँ इन्हां च शास्त्रा रियां किछ आयतां लिखीने यहूदी लोक अप्पूँजो धर्मी दसणे खातर अपणे मत्थे कने बाजुये पर बन्हां थे कने चोल़े री झालराँ जो इस खातर बड्डे ते बड्डा करदे रैं ताकि लोक तिन्हांजो धर्मात्मा समझो। 6धाम्मां च खास-खास जगह कने यहूदी सभा घराँ च इन्हौं खास-खास आसण चाहिन्दे, 7बज़ाराँ च सै आदरा सौगी नमस्कार कराणा चाँये, कने माहणुआं ते गुरू बलवाणा तिन्हांजो खरा लगां। 8पर तुहें लोकां ते अप्पूँजो गुरू नीं बुल्वायां, काँह्भई तुहांरा सच्चा गुरू त बस इक इ हाया; कने तुहें सारे अप्पूँ चियें भाई भैणा साई ये। 9धरतिया पर किसी जो अपणा पिता नीं बोलणा, काँह्भई तुहांरा इक इ आत्मिक पिता, सै जे स्वर्गा चा। 10नांई लोकां ते तू अप्पूँजो स्वामी बुलवायां, काँह्भई तुहांरा स्वामी त बस इक इ हाया, कने सै मसीह आ। 11सै जे तुहां च बड्डा ओ, सै तुहांरा सेबक बणो। 12सै जे कोई अप्पूँजो महान समझगा, तिसजो परमेशरा नम्र बनाणा, पर सै जे कोई अप्पूँजो नम्र बणांगा, तिस्सो परमेशरा आदर देणा।

शास्त्रियां कने फरीसियां रे पखण्डा री अलोचना

(मरकुस 12:40; लूका 11:39-42,44,52; 20:47)

13“अरे कपटी शास्त्रियो कने फरीसियो, परमेशरा तुहांजो भयानक सजा देणी! तुहें लोकां जो परमेशरा रे अधीन हुणे ते रोकां ये, तुहें तिन्हां माह्णुआं साई ये सै जे स्वर्गा रे राज्जा रा दरवाजा बन्द करी दें इस खातर भई दुज्जे परमेशरा रे नगरा च प्रवेश नीं करी सक्को; तुहें खुद त तिसच दाखल नीं हूणा चाहन्दे कने होरीं जो बी तिसच जाणे ते रोकां ये। 14[अरे कपटी यहूदी शास्त्रियो कने फरीसियो, परमेशरा तुहांजो भयानक सजा देणी! तुहें विधवां रा घर बार खाई जायें, कने दिखावा करने खातर बड़िया देरा तक लम्बी-लम्बी प्राथनायें कराँ ये: इस खातर तुहांजो परमेशरा ते बौहत भयानक सजा मिलणी।] 15ओ कपटी शास्त्रियो कने फरीसियो, तुहांजो परमेशरा भयानक सजा देणी! तुहें किसी जो अपणे पंथा च लौणे खातर बड़े दूर जायें, कने ताहली जे सै तुहांरे पंथा च आई जां तां तुहें तिस्सो अपणे ते बी दुगणा नरका रे लायक बणाई दें।

16“तुहें अन्हे अगुवेयो सै जे माहणुआं रा मार्गदर्शन कराँ ये, तुहांरी सजा बौहत भयानक हूणी! सै बोलां ये भई जे कोई मन्दरा री सगन्द खाओ तां किछ निआं, पर जे कोई मन्दरा रे सोने री सगन्द खाओ तां सै तिसा सगन्दा रा पालन करने खातर मजबूर हुई जां। 17तुहें मूर्ख ये कने तुहें तिन्हां लोकां साई ये सै जे अन्हे, महान कुण आ; मन्दरा रा सोना या सै मन्दर तिने जे तिस सोने जो पवित्र बणाया?” 18तुहें ये बी बोलां ये भई जे कोई बेदिया री सगन्द खां तां किछ निआं, पर जे कोई बेदिया पर रखीरे चढ़ावे री सगन्द खां, तां सै तिसा खातर मजबूर हुई जां। 19तुहें तिन्हां लोकां साई ये सै जे अन्हे। महान कुण आ; बेदी पर रखीरा चढ़ावा या सै बेदी तिसाते जे सै चढ़ावा पवित्र हुआं? 20इस खातर जे कोई बेदिया री सगन्द खां, तां सै बेदिया सौगी बेदी पर जो किछ रखीरा, तिस सारे री सगन्द खां। 21सै जे परमेशरा रे मन्दरा री सगन्द खां, सै तिसरी कने तिसच रैहणे औल़यां री बी सगन्द खां। 22कने सै जे स्वर्गा री सगन्द खां, सै परमेशरा रे संघासणा री कने तिस पर बैठणे औल़े री बी सगन्द खां।

23“अरे कपटी शास्त्रियो कने फरीसियो, परमेशरा तुहांजो भयानक सजा देणी! तुहें पुदीने, कने सुँफा, कने जीरे रा दसवां हिस्सा त परमेशरा जो दें, पर तुहें व्यवस्था री खास गल्लां जो यनि न्याय, दया कने बफादारिया रा तिरस्कार कराँ ये; तुहांजो ये चाहिन्दा था भई इन्हांजो बी करदे रैहन्दे कने तिन्हांजो बी नीं छडदे। 24तुहें तिन्हां अन्हे अगुवेयां साई ये, सै जे छोट्टे ते छोट्टे नियमा रा पालन करने च बौहत ध्यान दें तियां जे पाणिये च मच्छरा जो छाणी लैं, पर परमेशरा रे खास हुक्मा रा पालन नीं करदे सै जे ऊँटा जो निंगल़े साई आ।

25“अरे कपटी शास्त्रियो कने फरीसियो, तुहांरी सजा बौहत भयानक हूणी! काँह्भई तुहें लालची कने स्वार्थी ये, पर तुहें अप्पूँजो पवित्र होणे रा ढोंग रचां ये। इस खातर तुहें तिन्हां कौलियां कने थाल़ियां साई ये सै जे बाहरा ते साफ ये पर अन्दरा ते गन्दे। 26अरे अन्हे फरीसियो, पैहले माहणुआं जो लुटणा बन्द करा तांई तुहें धर्मा रे कम्मां रा पालन करी पांगे, कने फेरी तुहां तिस कटोरे साई हूणा सै जे अन्दरा बाहरा ते साफ हुआं।

27“ओ कपटी शास्त्रियो कने फरीसियो परमेशरा तुहांजो बौहत भयानक सजा देणी! तुहें लिपाई-पुताई कित्तिरी कब्राँ साई ये सै जे गासा ते देखणे जो त बांकियां लगां इयां, पर अन्दरा ते मुर्देयां री हड्डियां ने कने हर किस्मा री गन्दगिया ने भरीरी हुआं इयां। 28इयां इ बाहरा ते त तुहें माहणुआं जो धर्मात्मा दिखां ये, पर अन्दरा ते छल कपटा ने कने अधर्मा ने भरीरे।

शास्त्रियां कने फरीसियां जो सजा री भविष्यवाणी

(लूका 11:47-51)

29“अरे कपटी शास्त्रियो कने फरीसियो, परमेशरा तुहांजो बौहत भयानक सजा देणी! तुहें भविष्यवक्तयां रे खातर तिन्हौं जे तुहांरे पूर्वजे बौहत पैहले मारीत्या था तिन्हांरियां कब्राँ सजांयें कने धर्मियां री कब्राँ जो आदर देणे खातर बणांये। 30कने बोलां ये, भई जे अहें अपणे पूर्वजां रे दिनां च हुन्दे तां भविष्यवक्तयां री हत्या च तिन्हांरी सहायता नीं करदे। 31मतलब येआ भई तुहें इसा गल्ला री गवाही दे भई तुहें तिन्हारी औल़ादां ईं सै जे भविष्यवक्तयां रे हत्यारे थे। 32तुहें बी अपणे पूर्वजां साई लोकां री हत्या करने खातर त्यार ये। 33तुहें बौहत धुर्त लोक ये! तुहें जहरीले सर्पा साई खतरनाक ये! तुहें कियां सोच्चील्या भई तुहां नरका री सजा भोगणे ते बची जाणा? 34इस खातर देक्खा, हऊँ तुहांले भविष्यवक्तयां कने बुद्धिमानां कने शास्त्रियां जो भेज्जां; कने तुहें तिन्हां चते किछ जो मारी देणा, कने किछ लोक क्रूसा पर चढ़ाणे कने किछ जो अपणे यहूदी सभा घराँ च कोड़े मारने कने इक्की नगरा ते दुज्जे नगरा च खदेड़दे फिरगे। 35जिसते धर्मी हाबिल ते लेईने बरिक्याह रे पुत्रा जकर्याह तक, तिस्सो जे तुहें परमेशरा रे मन्दरा कने बेदिया रे बिच मारीत्या था, जितणयां धर्मी लोकां रा खून धरतिया पर बगाईरा, तिन्हां रिया हत्या रे दोषी तुहें हुणे। 36हऊँ तुहांजो सच्च बोलां, इन्हां सारियां हत्यां खातर इसा पीढ़ियां रे लोकां जो सजा भुगतणे पौणी।

यरूशलेम रे खातर बलाप

(लूका 13:34-35)

37“यरूशलेम रे लोको! तुहें सैये सै जे भविष्यवक्तयां री हत्या कराँ ये, कने परमेशरा रे भेज्जीरे दूतां जो पत्थर माराँ ये। मैं कितणी बार चाहया भई तियां जे कोई कुकड़ी अपणयां चूजयां जो अपणे फंगा हेठ सम्भाल़ां इ, तियां इ मैं बी तेरे बच्चयां जो सम्भाल़णा चाया, पर तुहें लोकें नीं चाहया। 38देक्खा, तुहांरा घर तुहांरे खातर उजाड़ छड्डया जां। 39काँह्भई हऊँ तुहांजो बोलां, भई हुण ते तदुआं तक जे तुहें नीं बोलगे, भई परमेशर तिस्सो आशीष देओ, सै जे परमेशरा रे अधिकारा ने औंआं, तदुआं तक तुहां मिन्जो फेरी कदीं नीं देखणा।”

Currently Selected:

मत्ती 23: KFSNT

Highlight

Copy