मरकुस 4

ब्यू बाहणे औल़े‍ रा उदाहरण

(मत्ती 13:1-9; लूका 8:4-8)

1फेरी यीशु गलील दरयावा रे कनारे उपदेश देणे लगया : कने येढ़ि बड्डी भीड़ तिसले कट्ठी हुईगी भई सै तिस दरयावा च इक्की किश्तिया पर चढ़ीने बैठिग्या, कने सारी भीड़ धरतिया पर दरयावा रे कनारे खढ़ी रैई। 2कने सै तिन्हांजो उदाहरणां च बौहत सारियां गल्लां सखाणे लगया, कने अपणे उपदेशा च तिन्हांने गलाया, 3“सुणा! इक करसाण खेता च ब्यू बाहणे खातर निकल़या। 4कने बाहन्दे बगत किछ ब्यू रस्ते रे कण्डे पैया कने पंछियें आईने तिस्सो चुगील्या। 5कने किछ ब्यू पत्थरीली धरतिया पर पै तित्थी तिस्सो जादा मिट्टी नीं मिली, कने डुग्गी मिट्टी नीं मिलणे रिया बजह ते सै इकदम उगीगे। 6कने तंजे सूरज निकल़या, तां डाल़ू फुखीगे, काँह्भई जड़ कमजोर हुणे रिया वजह ते सै सुकीगे। 7किछ ब्यू येढ़िया जगह च पै तित्थी जे झाड़ियां थिआं, कने झाड़ियें बधीने तिन्हांजो दबाईत्या, कने तिसच फल़ नीं आया। 8पर किछ ब्यू खरिया धरतिया पर पै, कने सै उगीने सौ गुणा फल़ ल्याया।” 9तां तिने गलाया, “जो बी मेरी गल्ल सुणां, सै ध्यान देईने सुणो कने समझो।”

उदाहरण रा मकसद

(मत्ती 13:10-17; लूका 8:9-10)

10तंजे यीशु कल्हा था, तां बारा चेले कने होर सै लोक सै जे ऊत्थी कट्ठे हुईरे थे, तिसते तिन्हें इन्हां उदाहरणां रा मतलब पुच्छया। 11यीशुये तिन्हांने गलाया, “परमेशरे अपणे राज्जा रे भेत्तां जो तुहां पर परगट कित्या, पर तिन्हांजो सै जे माह पर विश्वास नीं करदे तिन्हांरे खातर ये सारियां गल्लां उदाहरणां च हुआं इयां। 12तियां जे पवित्रशास्त्र बोलां,

“‘तिन्हां मेरे काम्म देखीने सिखणा निआं,

कने मेरी गल्ल सुणीने समझणा नींआ;

जे सै समझी जाओ, तां तिन्हां अपणे कित्तिरे पापां ते पश्चाताप करना कने पाप नीं करने रा फैसला करना, कने परमेशर तिन्हांजो माफ करी सक्कां।’”

ब्यू बाहणे औल़े‍ उदाहरणा री व्याख्या

(मत्ती 13:18-23; लूका 8:11-15)

13फेरी यीशुये तिन्हांने गलाया, “पर जे तुहें इस उदाहरणा जो नीं समझी सकदे तां फेरी होरीं सब्बीं उदाहरणां जो कियाँ समझगे सै जे हऊँ दसणे औल़ा? 14इस उदाहरणा च मैं तुहांजो दस्या भई ब्यू बाहणे औल़ा माहणु परमेशरा रे बचना रा प्रचार कराँ। 15किछ लोक येढ़े तिन्हांरी बराबरी जे तिस ब्यूआ ते कित्ती जाई सक्कां इ सै जे बाट्टा च पैईरा। सै परमेशरा रा वचन जरूर सुणां ये, पर शैतान छोड़चा ने जां कने तिन्हांरे मनां ते तिस वचना जो मटाई देआं सै जे तिन्हें सुणया था। 16किछ लोक येढ़े तिन्हांरी बराबरी तिन्हां ब्यूआं ते कित्ती जाई सक्कां इ सै जे पत्थरीली जमीन्ना पर पैया। ये सैए सै जे परमेशरा रा बचन खुशिया ने सुणां ये कने इकदम ग्रहण बी कराँ ये। 17पर वचन तिन्हांरे दिलां री गहराईया तक नीं जान्दा, सै सिर्फ किछ वगता खातर विश्वास कराँ ये। सै तिन्हां बुटयां साई हुआं ये तिन्हांरियां जड़ां जे डुग्गियां नीं हुन्दियां; ताहली जे कोई दुज्जा तिन्हां सौगी बुरा बर्ताव करो या परमेशरा रे बचना पर विश्चास करने रिया वजह ने तिन्हांजो परेशान करो, तां सै लोक परेशान हुईने इकदम बचना पर विश्वास करना छड्डी दें। 18किछ लोक येढ़े तिन्हांरी बराबरी अहें झाड़ियां औल़िया धरतिया ने करी सक्कां ए, ये सै लोक ये तिन्हेंजे परमेशरा रा सन्देश सुणया, 19सै बौहत सारी चिज़ां रा लालच करीने अमीर हुणे री इच्छा कराँ ये, इस खातर सै सिर्फ इन्हां चिज़ां री चिन्ता कराँ ये; इयां सै परमेशरा रे सन्देशा च अड़चन पाएं कने सै तिसरिया इच्छा पर नीं चली पान्दे। 20पर किछ लोक उपजाऊ धरतिया पर बाहीरे ब्यूआ साई ये, सै परमेशरा रे वचना जो सुणीने ग्रहण करी लैं कने सै इस पर विश्चास बी कराँ ये। सै परमेशरा रिया इच्छा पर चलां ये। सै तिन्हां खरयां बुट्टयां साई ये तिन्हांरी पैदावार जे तीह गुणा, साठ गुणा कने सौ गुणा हुआं इ।”

दिऊए रा उदाहरण

(लूका 8:16-18)

21फेरी यीशुये तिन्हांने गलाया, “क्या कोई इक दिऊए जो बाल़ीने तिस्सो टोकरे या मंजे हेठ रक्खां ताकि तिसरिया लोई जो लुकोई सक्को? बिल्कुल नी। इक दिऊए जो इक ऊच्चिया ठारी रख्या जां, तित्थी ते जे तिसरी लोय चमकी सक्को। 22काँह्भई गल्लां सै जे छिपि रियां इक दिन सै हरेक लोकां जाणनियां; कने किछ गल्लां सै जे चोरी-चुपके हुआं इयां, सै इक दिन हर माहणुये पूरिया रौशनिया च देखणियां। 23जो बी मेरी गल्ल सुणां, सै ध्यान देईने सुणो कने समझे।”

24फेरी तिने तिन्हांने गलाया, “चकन्ने रौआ भई तुहें मेरते क्या सुणां यें? जितने ध्यान्ना ने तुहें सुणगे, उतणी ही जादा समझ तुहांजो दित्ति जाणी वल्कि परमेशरा तुहांजो उसते बी जादा समझ देणी। 25काँह्भई सै जे कोई मेरिया गलाई रिया गल्ला जो ध्याना ने सुणा कने समझां, परमेशर तिसजो होर जादा समझणे रे लायक बणां; पर सै जे मेरिया गल्ला जो ध्याना ने नीं सुणदा, तिस सै बी भुल्ली जाणा तिसजो जे सै पैहले ते जाणदा हुन्गा।”

उगणे औल़े ब्यूआ रा द्रष्टान्त

26फेरी यीशुये गलाया, “परमेशर रा राज येढ़ा, तियां जे कोई करसाण धरतिया पर ब्यू बांह, 27कने सै बाहीरे ब्यूआ रे बारे च बिणा चिन्ता कित्ते सुत्तया कने जागया। तिस वगत ब्यू अप्पूँ उगया कने बधया तिस्सो सै जाणी नीं पाया। 28जमीन खुद अप्पूँ फसल पैदा कराँ इ, पैहले लुंग, फेरी सिल्लु, कने इसते बाद सिल्लुआं च दाणा त्यार हुआं। 29पर तंजे दाणा पक्की जां, तां सै डाटिया लईने कटणे लगां, काँह्भई फसला जो लुणने रा बगत आई गरा हुआं।”

राईया रे दाणे रा द्रष्टान्त

(मत्ती 13:31,32; लूका 13:18,19)

30फेरी यीशुये गलाया, “अहें परमेशरा रे राज्जा री बराबरी इस तरिके ने करी सक्कां ए। हऊँ तुहांजो इक उदाहरण दस्सां। 31परमेशरा रा राज राईया रे दाणे रे बराबर आ; तंजे धरतिया च बाहया जां, तां धरतिया रे सबनी ब्यूआं ते छोट्टा हुआं, 32पर तंजे बाही दें, तां उगीने सारे सागापाता ते बड्डा हुई जां, कने तिसरी येढ़ि बड्डियां डाल़ियां निकल़ां इयां भई अम्बरा रे पंछी तिसरी छावां च बसी सक्कां ये।” 33सै तिन्हाजो येढ़े कई उदाहरण देईने तिन्हां रिया समझा रे मुतावक वचन सुणावां था, 34ताहली जे यीशु अपणयां चेलयां ने गल्लां था, तां सै सदा उदाहरणां रा इस्तेमाल कराँ था; पर ताहली जे सै एकान्त च अपणे चेलयां सौगी हुआं था, तां तिन्हांजो सब्बीं गल्लां रा मतलब दस्सां था।

आन्धिया जो शान्त करना

(मत्ती 8:23-27; लूका 8:22-25)

35तिस दिन तंजे सांझ हुई, तां यीशुये चेलयां जो गलाया, “औआ अहें, गलील दरयावा रे पार चलिये।” 36यीशु पैहले तेई किश्तिया च था इस खातर तिन्हें भीड़ा जो छड्डया कने दरयावा च यात्रा करने लगीपे, होर लोक बी दुज्जियां किश्तियां च तिन्हांरे सौगी चलीपे। 37फेरी बड्डा तूफान आया, कने छालियां किश्तिया परा जो येढ़ियां आईयां भई सै पाणिये ने भरने लगी कने डुबणे औल़ी थी। 38कने सै अप्पूँ किश्तिया रे पिछले हिस्से च गद्दिया पर सिर रक्खीने सुत्तीरा था; फेरी तिन्हें तिस्सो जगाईने गलाया, “गुरू जी, अहें सारे डुबणे औल़े कने तिज्जो कोई चिन्ता नीं!” 39तां तिने उठ्ठीने तूफाना जो थिड़क्या, कने पाणिये रियां छालियां जो गलाया, “शान्त रै, रुकी जा!” कने तूफान रुकिग्या कने पूरा चैन हुईग्या; 40कने तिन्हांने गलाया, “तुहें काँह डराँ ये? क्या तुहांजो अजें तकौ बी माह पर विश्वास निआं?” 41सै बौहत डरीगे कने अप्पूँ चियें गलाये, “ये कुण आ तिसरा हुक्म जे नां सिर्फ बुरीआत्मा, पर तूफान कने छालियां बी मन्नां ये?”

Currently Selected:

मरकुस 4: KFSNT

Highlight

Copy