यहून्ना 3

यीसू होर निकुदेमुस

1फरीसी लोका मन्झा ले नीकुदेमुस नांऊँआं रा एक माह्णुं था, जो यहूदी लोका रा प्रधान था। 2तिन्हें राती यीसू वाले आई किन्हें यीसू किन्हें बोल्या, “हे गुरु, आस्से जाणहां ऐं कि, परमेसरे तुजो आस्सा जो स्खाणे रे कठे भेजीरा; परमेसर अगर तेरे साउगी नी हो, ता तू इन्हा चिन्हा जो जेह्ड़े तू दसा नी दसी सक्दा था।” 3यीसूए तेस जो जवाब दितेया कि, “हांऊँ तुस्सा किन्हें सच्च-सच्च बोल्हा, अगर कोई नंऊँऐं सिरे ले नी जम्मे ता से परमेसरा रा राज नी देखी सक्दा।” 4नीकुदेमुसे तेस जो बोल्या, “माह्णुं जेबे बुड्ढा हुई जाहाँ, ता से माऊआ रे गर्भा मन्झ जाई किन्हें दबारा जन्म नी ले सकदा।” 5यीसूए तेस जो जवाब दितेया कि, “हांऊँ तुस्सा किन्हें सच्च -सच्च बोल्हा कि, जेबे तक कोई माह्णुं पाणी होर आत्मा किन्हें नी जम्मे ता से परमेसरा रे राजा मन्झ दाखल नी करी सक्दा। 6क्यूंकि माह्णुं रा सरीरा मन्झ जम्मणा एक सरीरा रा जन्म आ; जेबे कि आत्मा रा जम्मणा एक नंऊँआं जन्म आ। 7हरान नी हो कि, हांऊँ तुजो बोल्हा; कि तुजो नंऊँऐं सिरे ले जमणा जरूरी आ। 8हउवा जेथी चांही तेथी चल्हा ई, होर तू तेता री अवाज सुणहां, पर नी जाणदा कि, से केथी ले आहूँआं ईं होर केथी जो जांही? जो कोई पवित्र आत्मा ले जम्मिरा से एह्ड़ा ई आ।”

9नीकुदेमुसे यीसू जो जवाब दितेया कि, “ये गल्ला किहाँ हुई सक्हा ई?” 10ये सुणी किन्हें यीसूए जबाब दितेया, “तू इस्राएल देसा रा गुरु हुई किन्हें भी इन्हा गल्ला जो नी समझ्दा? 11हांऊँ तुस्सा किन्हें सच्च -सच्च बोल्हा कि आस्से जो जाणहां ऐं, से बोल्हा ऐं, होर जो आस्से देख्या तेता री गुआही देहां ऐं, होर तुस्से आस्सा री गल्ला पर विस्वास नी करदे। 12जेबे मैं तुस्सा जो धरतीया मन्झ हूंणे वाली गल्ला दसी, ता तुस्से विस्वास नी कितेया, होर जेबे हांऊँ तुस्सा किन्हें स्वर्गा मन्झ हूंणे री गल्ला करूं, ता फेरी तुस्सा किहाँ विस्वास करणा? 13हांऊँ माह्णुं रा मह्ठा ई सिर्फ स्वर्गा जो गया होर सिर्फ हांऊँ ई आ जेह्ड़ा स्वर्गा ले धरती पर आया। 14बौह्त पैहले जेबे इस्राएली लोके जंगला मन्झ परमेसरा रा व्रोध कितेया, तेबे मूसे कांसे रे बणिरे जैहर्ला कीड़ा खम्बे प्र्याहले चढ़ाया। होर जिहां ईं लोके से कीड़ा देख्या स्यों बची गये, तिंहां ईं जरूरी आ कि हांऊँ माह्णुं रा मह्ठा मा भी ऊंचे पर चढ़णा। 15ताकि जो कोई मेरे पर विस्वास करहे से तेस मन्झ अनंत जिन्दगी पाए।

16क्यूंकि परमेसरे संसारा रे लोका किन्हें एह्ड़ा प्यार कितेया कि तिन्हें आपणा एकलौता मह्ठा देई दितेया, ताकि जो कोई तेस पर विस्वास करहे से नास नी हो पर अनंत जिन्दगी पाए। 17क्यूंकि परमेसरे आपणा मह्ठा संसारा मन्झ इधी कठे नी भेज्या कि, से संसारा रे लोका जो सजा रा हुक्म दे पर तिन्हें से इधी कठे भेज्या कि संसारा रे लोक तेसरे ज्रीए उद्धार पाई सके। 18जो परमेसरे रे मह्ठे पर विस्वास करहा, तेस पर सजा रा हुक्म नी हुन्दा, पर जो तेस पर विस्वास नी करदा, से दोसी बणी गया, इधी कठे कि तिन्हें परमेसरा रे एकलौते मह्ठे रे नांऊँआं पर विस्वास नी कितेया। 19होर सजा रे हुक्मा री वजहा येई कि प्रयासा संसारा मन्झ आईरा, होर माह्णुंऐ नह्यारे जो प्रयासे ले ज्यादा खरा मन्या क्यूंकि तिन्हारे काम बुरे थे। 20क्यूंकि जो कोई बुराई करहा से प्रयासे किन्हें बैर करहा, होर से प्रयासे रे नेडे नी आऊंदा, एह्ड़ा नी हो कि तेसरे कामा पर इल्जाम लगी जाए। 21पर जो सच्चाई पर चल्हा, से प्रयासे रे नेडे आहूँआं, ताकि तेसरे काम सूझी जाए कि, स्यों परमेसरा री तरफा ले किते गईरे।”

यीसू रे बारे मन्झ यहून्ना बपतिस्मा देणे वाल़े री गुआही

22एता ले बाद यीसू होर तेसरे चेले यहूदिया ईलाके मन्झ आये; होर से तेथी तिन्हा साउगी रही किन्हें बपतिस्मा देंदा रहें। 23होर यहून्ना बपतिस्मा देणे वाल़ा ऐनोन गांऊँआं जेह्ड़ा सामरिया जिल्ले रे सालेमा सैहरा मन्झ बपतिस्मा देंदा लगिरा था, क्यूंकि तेथी बौह्त पाणी था। होर लोक आई किन्हें तेस ले बपतिस्मा लैंदे लगीरे थे, 24क्यूंकि यहून्ना बपतिस्मा देणे वाल़े तेबे तक जेल्हा अंदर नी पाईरा था। 25तेथी यहून्ना बपतिस्मा देणे वाल़े रे चेलेया रा केसी यहूदी लोका साउगी यहूदी रूआजा रे मताबक सुद्ध हूंणे रे बारे मन्झ बैहस हुई। 26होर तिन्हें यहून्ना बपतिस्मा देणे वाल़े रे चेले यहून्ना वाले आई किन्हें तेस किन्हें बोल्या, “हे गुरु, जो आदमी यरदन दराऊआ रे पार तेरे साउगी था, होर जेसरे बारे मन्झ तैं आस्सा जो दसिरा था, से बपतिस्मा देंहां, होर सभ लोक तेस वाले जाया करहा ऐं।”

27यहून्ना बपतिस्मा देणे वाल़े जवाब दितेया, “जेबे तक माह्णुं जो स्वर्गा ले नी दितेया जाए तेबे तक से कुछ नी पाई सक्दा। 28तुस्से ता आपु ई मुंजो बोलदे हुए सुणीरा कि, ‘हांऊँ मसीह नी आ, पर तेस मसीह ले पैहले भेजीरा।’ 29नंऊँआं लाड़ा ही नौंईं लाड़ीया किन्हें ब्याह करहा, पर नऊँए लाड़े रा दोस्त बौह्त खुस हुई किन्हें तेसरी सुणहां। से नऊँए लाड़े री अवाज सुणी किन्हें बौह्त खुस हुई जाहाँ, ये ही मेरी खुसी होर ऐबे पूरी हुई गई। 30जरूरी आ कि से बढ़े होर हांऊँ घटी जाऊं। 31जो स्वर्गा ले आहूँआं, से सभी चीजा ले बड़ा आ, जो धरती ले आहूँआं से धरती रा आ; होर धरतिया री गल्ला करहा: जो स्वर्गा ले आहूँआं, से सभी ले गास आ। 32जो कुछ तिन्हें देख्या, होर सुणेया, से लोका जो तेसरे बारे दसेया; पर कुछ लोक ई तेसरी गल्ला मन्नी। 33पर जिन्हें जे तेसरी गल्ला मनी लई तिन्हें एस गल्ला री छाप लगाई दिती कि परमेसर सच्चा आ। 34क्यूंकि जो परमेसरे भेज्या, से परमेसरा री गल्ला करहा: क्यूंकि से पवित्र आत्मा नापी-नापी किन्हें नी देंदा। 35बापू परमेसर मह्ठे किन्हें प्यार रख्हा, होर तिन्हें सभ चीजा रा हक तेसरे हाथा मन्झ देई दितिरी। 36जो परमेसरा रे मह्ठे पर विस्वास करहा, अनंत जिन्दगी तेसरी ई; पर जो मह्ठे री नी मन्नदा, तेस अनंत जिन्दगी नी देखणी, पर परमेसरा रा गुस्सा तेस पर रैंहयां।”

Currently Selected:

यहून्ना 3: MJLNT

Highlight

Copy