लूका 24

यीसू रा जी उठणा

1पर हप्ते रे पैहले ध्याड़े भ्यागा ई स्यों ज्नानिया तिन्हा खुस्बूदार चीजा जो लई किन्हें जो तिन्हें त्यार कितरी थी, डुआरा पर आई। 2तिन्हा जो डुआरा वाले ले पात्थर हट्टीरा मिल्या। 3होर तिन्हा जो अंदर जाई किन्हें प्रभु यीसू री ल्हास नी मिली। 4जेबे स्यों ज्नानिया एस गल्ला ले हरान हुएया करहा ई थी ता दो मर्ध जिन्हें जे चमकीले कपड़े पैहनीरे थे तिन्हा वाले खड़ी गये। 5जेबे स्यों डरी गयी, होर धरती वखा आपणे मुंह फेरी दिते, तेबे तिन्हें तिन्हा ज्नानिया ले पूछ्या, “तुस्से जिउंदेया जो मरिरे मन्झ किधियो टोल्हा ई? 6से एथी नी आ, पर जिउंदा हुई गईरा। याद करा कि, तिन्हें गलील जिल्ले मन्झ रैहणे रे टैमा तुस्सा किन्हें क्या बोलिरा था 7कि, ‘जरूरी आ, हांऊँ माह्णुं रा मह्ठा पापिया रे हाथा मन्झ पकड़ाया जाऊँ, होर क्रूसा प्रयाल्हे चढ़ाया जाऊँ, होर त्रीजे ध्याड़े जिउंदा हुई जाऊँ।’” 8तेबे तिन्हा ज्नानिया जो यीसू री याद आई।

9होर स्यों सभ ज्नानिया डुआरा वाले ले वापस आई होर तिन्हा ग्यारा चेलेया जो, होर बाकि सभी जो ये गल्ला सुणाई दिती। 10जिन्हे जे चुणिरे चेले किन्हें ये गल्ला बोली, स्यों ये ज्नानिया थी, मगदल गांऊँआं री मरियम होर योअन्ना होर याकूबा री माऊ मरियम होर तिन्हा साउगी होर ज्नानिया भी थी। 11पर तिन्हारी गल्ला तिन्हा जो कहाणी साहीं लगी, होर तिन्हें तिन्हारा विस्वास नी कितेया। 12तेबे पतरस उठी किन्हें डुआरा वाले दौड़ी किन्हें गया, होर झुकी किन्हें सिर्फ कपड़े पईरे देखे, होर जो कुछ हुईरा था तेता ले हरान हुई किन्हें, से आपणे घरा जो चली गया।

इम्माऊसा गांऊँआं रे पैंडे पर चेले

13तेस ई ध्याड़े तेसरे चेले मन्झ ले दो जण इम्माउस नांऊँआं रे एकी गांऊँआं जो जाया करहा ऐं थे, जो यरुस्लेम सैहरा ले ग्यारा किलोमीटर दूर था। 14होर स्यों इन्हा सभी गल्ला पर जो हुईरी थी, आपु मन्झ गलबात करेया करहा ऐं थे। 15होर जेबे स्यों आपु मन्झ गलबात होर पूछ-ताछ करेया करहा ऐं थे, ता यीसू आप्हुए तेथी आया होर तिन्हा साउगी चलदा लग्या। 16पर तिन्हारी हाखिया एह्ड़ी बंद करी दितीरी थी कि, स्यों तेस जो नी पछ्याणी सके। 17यीसूए तिन्हा ले पूछेया, “ये क्या गल्ला ई, जो तुस्से चल्दे-चल्दे आपु मन्झ करेया करहा ऐं?” स्यों दुआस हुई किन्हें तेथी रुकी गये। 18ये सुणी किन्हें, तिन्हा मन्झा ले क्लियुपास नांऊँआं रे एक आदमिये बोल्या, “तू यरुस्लेम सैहरा मन्झ कल्हा माह्णुं आ, जो नी जाणदा कि, इन्हा ध्याड़े मन्झ एथी क्या-क्या हुआ।”

19यीसूए तिन्हा ले पूछेया, “कुण गल्ला?” तिन्हें यीसू किन्हें बोल्या कि, “ये गल्ला नासरता रा यीसू रे बारे मन्झ आ। जेह्ड़ा एक नबी था, जिन्हें सामर्थी चमत्कार कितरे थे। परमेसरा रा होर सभ लोका रे हाखिया मन्झ एक नौखा गुरु था। 20होर मुख्य याजके होर आस्सा रे मुखिये से पकड़वाई दितेया, ताकि तेस पर मौता रा हुक्म दितेया जाए; होर तेस जो क्रूसा प्रयाल्हे चढ़ाया जाए। 21पर आस्सा जो आस थी कि, एस ई इस्राएल देसा रे लोका जो रोम देसा रे राज ले छुटकारा देणा। होर इन्हा सभ गल्ला रे अलावा एस घटना जो घटी रे आज त्राय ध्याड़े हुई गईरे। 22होर आस्सा साउगी मन्झा ले कई ज्नाने भी आस्से हरान करी दिते, जो भ्यागा-भ्यागा ई डुआरा पर गईरी थी। 23होर जेबे तेसरी ल्हास नी मिली, ता ये बोल्दी हुई आई कि, आस्से स्वर्गदूता रा दर्सन देख्या, तिन्हें तिन्हा किन्हें बोल्या कि यीसू जिउंदा हुई गईरा। 24तेबे आस्सा रे साथिया मन्झा ले कई डुआरा वाले गये, होर जेह्ड़ा तिन्हें ज्नानिया बोलिरा था, तिन्हें तेह्ड़ा ई तेथी पाया, तिन्हें यीसू नी देख्या।”

25तेबे यीसूए तिन्हा दुहीं चेलेया किन्हें बोल्या, “हे नर्क्कलेयो, तुस्सा रे कठे नबिया री सभ गल्ला पर विस्वास करणा कितना कठण लगा! 26मसीह रे कठे जरूरी था कि, से दुःख सही किन्हें आपणी महिमा मन्झ दाखल करहे।” 27तेबे यीसूए मूसा री व्यवस्था ले होर सभ नबिया ले सुर्हू करी किन्हें सारे पवित्र सास्त्रा मन्झा ले, आपणे बारे मन्झ कितिरी गला रा मतलब तिन्हा जो समझाया। 28इतने मन्झ स्यों तेस गांऊँआं वाले पूजी गये, जेथी जे स्यों जाया करहा ऐं थे, होर तेसरे व्यवहारा ले एह्ड़ा मैहसूस हुएया कि से होर अगे जाणा चाहां।

29पर तिन्हें यीसू ये गल्ला बोली किन्हें रुकणे रे कठे राजी करी लया कि, “आज राती आस्सा साउगी रुकी जा; क्यूंकि सांझ हुएया करहा ई होर ध्याड़ा भी ढल्या करहा होर जल्दी ई रात भी हुई जाणी।” तेबे से तिन्हारी गल मन किन्हें तिन्हा साउगी रैहणे रे कठे अंदर गया। 30जेबे यीसू तिन्हा साउगी खाणा खांदे बैठ्या, ता यीसूए रोटी लई किन्हें धन्यावाद कितेया, होर रोटी तोड़ी किन्हें तिन्हा जो देंदा लग्या। 31तेबे परमेसरे तिन्हारी हाखिया खोल्ही दिती; होर तिन्हें से प्छ्याणी लया, होर से तिन्हारे साम्हणें गायब हुई गया। 32तिन्हें आपु मन्झ बोल्या, “जेबे से पैंडे मन्झ आस्सा किन्हें गल्ला करहा था, होर पवित्र सास्त्रा रा मतलब आस्सा जो समझाहां था, ता क्या आस्सा रा मन आसा किन्हें नी भरेया था?” 33स्यों तेस ई टैम उठी किन्हें यरुस्लेम सैहरा जो वापस चली गये, होर तेथी तिन्हा जो स्यों ग्यारा चेले होर तिन्हा साउगी तिन्हारे होर साथी सभ कठे मिले। 34स्यों बोल्हा ऐं थे, “प्रभु सच्चे जिउंदा हुई गईरा! होर तिन्हें समौना पतरसा जो दर्सन दिते।” 35तेबे तिन्हें दुहींऐं जो कुछ पैंडे मन्झ हुईरा था तेता रा ब्यौरा दितेया होर दसेया कि किहाँ रोटी तोड़ने रे टैमा तिन्हें यीसू पछ्याणी लितेया।

यीसू आपणे चेले जो सूझणा

36स्यों ये गल्ला हल्ली बोल्या ई करहा ऐं थे, यीसू आप्हुए तिन्हारे बीचा मन्झ आई किन्हें खड़ी गया, होर तिन्हा किन्हें बोल्या, “तुस्सा जो सांति मिले।” 37पर स्यों घबराई गये होर डरी गये, होर तिन्हा जो ये लग्या कि स्यों केसी भूता जो देख्या करहा ऐं। 38होर तिन्हें तिन्हा किन्हें बोल्या, “तुस्से किधियो डरहा ऐं? होर तुस्सा रे मना मन्झ सक कि हुएया करहा? 39मेरे हाथा होर पैरा जो देखा कि, हांऊँ सेई आ। मुंजो छुही किन्हें देखा, क्यूंकि भूता री हड्डी मास नी हुन्दा जेह्ड़ा तुस्से मेरे मन्झ देख्हा ऐं।” 40ये बोली किन्हें यीसूए तिन्हा जो आपणे हाथ पैर दसे। 41जेबे खुसी रे मारे तिन्हा जो विस्वास नी हुएया कि यीसू जिउंदा हुई गईरा, होर हरानी हुई। ता यीसूए तिन्हा ले पूछेया, “क्या एथी तुस्सा वाले कुछ खाणा हाया?”

42होर तिन्हें यीसू जो भुनी री मछि रा एक टुकड़ा दितेया। 43यीसूए से मछि रा टुकड़ा लया होर तिन्हारे साम्हणें खाध्या। 44फेरी तिन्हें तिन्हा किन्हें बोल्या, “ये मेरी स्यों गल्ला ई, जो मैं तुस्सा साउगी रही किन्हें, तुस्सा किन्हें बोली थी कि, जरूरी आ कि, जितनी गल्ला मूसा री व्यवस्था होर नबिया री होर भजना री कताबा मन्झ, मेरे बारे मन्झ लिखिरी, स्यों सभ पूरी हो।” 45तेबे यीसूए पवित्र सास्त्रा जो समझणे रे कठे तिन्हारी समझ खोल्ही दिती। 46होर तिन्हा किन्हें बोल्या, “पवित्र सास्त्रा मन्झ एह्ड़ा लिखिरा कि, मसीहा दुःख सहन करणा, होर त्रीजे ध्याड़े मरिरे मन्झा ले जिउंदे हुई जाणा। 47होर यरुस्लेम सैहरा ले लई किन्हें सभ जातिया रे लोका मन्झ तेसरे नांऊँआं रे हका ले पापा जो छाडणे, पापा री माफी रा प्रचार कितेया जाणा। 48तुस्से इन्हा सभी गल्ला रे गुआह ऐ। 49होर मां आपु पवित्र आत्मा भेजणी जेह्ड़ा मेरे बापूए वादा कितिरा। पर जेबे तक स्वर्गा ले सामर्थ नी पाओ, तेबे तक तुस्से एस सैहरा मन्झ ई रुकी रैहया।”

यीसू रा स्वर्गा वखा जो चकी लितेया जाणा

50तेबे यीसू तिन्हा जो सैहरा रे बाहर बैतनिय्याह गांऊँआं तक लई गया, होर आपणे हाथ स्वर्गा वखा जो करी किन्हें तिन्हा जो आसीस दिति। 51होर तिन्हा जो आसीस देंदे हुए से तिन्हा ले लग हुई गया होर स्वर्गा जो चकी लितेया गया। 52इधी कठे तिन्हें तेस जो अराधना करी किन्हें बड़ी खुसी किन्हें यरुस्लेम सैहरा जो वापस चली गये। 53होर स्यों हर रोज लगातार मन्दरा मन्झ जाई किन्हें आपणा सारा टैम परमेसरा रा धन्यबाद करणे मन्झ लगाया।

Currently Selected:

लूका 24: MJLNT

Highlight

Copy