मत्ती 11

यहून्ना बपतिस्मा देणे वाल़ा रा सुआल

(लूक. 7:18-35)

1जेबे यीसू आपणे बारा चेले जो हुक्म देई चुक्केया, ता से तिन्हारे गांऊँआं मन्झ उपदेस होर प्रचार करणे रे कठे तेथी ले चली गया। 2यहून्ना बपतिस्मा देणे वाल़े जेल्हा मन्झ मसीहा रे कामा री खबर सुणी किन्हें आपणे चेले जो तेस ले ये पूछणे रे कठे भेज्या। 3“क्या तू से मसीहा जेस जो भेजणे रा वादा परमेसरे कितरा था, या आस्से केसी होरी जो नह्यालिए?”

4यीसूए तिन्हो जबाब दितेया, “जो कुछ तुस्से देख्या होर सुणेया, जाई किन्हें यहून्ना बपतिस्मा देणे वाल़े किन्हें बोली देआ; 5कि काणे देख्हा ऐं, लंगड़े चल्हा फिरहा ऐं, कोढ़ी सुद्ध किते जाहें, होर टौणें सुणहां ऐं, मरिरे या जो जिउंदा कितेया जाहाँ, होर गरीबा जो खुसी री खबर सुणाई जाहीं। 6होर धन्य ऐं स्यों, जो मेरे पर विस्वास करणा नी छाडदे।”

यहून्ना बपतिस्मा देणे वाल़े री तारीफ

7जेबे यहून्ना बपतिस्मा देणे वाल़े रे चेले तेथी ले चली गये, ता यीसू यहून्ना रे बारे मन्झ लोका किन्हें बोल्दा लग्या, “तुस्से बियाबान जगहा मन्झ क्या देख्दे गईरे थे? क्या बागरा किन्हें हिल्दे लगिरे सरकंडे जो। 8या तुस्से तेस आदमी जो देखदे गईरे थे जिन्हें मैहंगे कपड़े पैहनीरे थे? नीं, मैहंगे कपड़े पैन्ह्णे वाल़े ता राजमहला मन्झ रैंहयां ऐं। 9ता फेरी किधियो गईरे थे? क्या केसी नबी जो देखणे रे कठे? हां, हांऊँ तुस्सा किन्हें बोल्हा कि, ये से आ जो एक नबी ले भी बढ़ी किन्हें हाया। 10ये यहुन्ना ही हाया, जेसरे बारे मन्झ लिखिरा कि:

‘देख, हांऊँ आपणे दूता जो तेरे अगे भेज्हा, जेस तेरे अगे तेरे कठे पैंडा त्यार करणा।’”#11:10 मला. 3:1

11हांऊँ तुस्सा किन्हें सच्च बोल्हा कि, जितने भी लोका रा संसारा मन्झ जन्म हुईरा, तिन्हा मन्झा ले यहून्ना बपतिस्मा देणे वाल़े ले कोई बडा नी हुआ; पर जो स्वर्गा रे राजा मन्झ छोटे ले छोटा आ से तेस ले बडा आ। 12यहून्ना बपतिस्मा देणे वाल़े रे प्रचार करणे रे टैमा ले ऐबे तक स्वर्ग रे राज पुरे जोरा सोरा किन्हें फैल्या, होर ताकतवर लोक तेता पर हमला करदे लगिरे। 13सारे नबिया री कताबा होर मूसा री व्यवस्था यहून्ना बपतिस्मा देणे वाल़े रे आऊणें तक परमेसरा रे राज्य मन्झ दसदे रहे। 14होर चाहे तुस्से मना या नी मना, एलिय्याह नबी जेसरे बारे मन्झ नबिये बोलिरा था जो आऊणें वाल़ा था, से येई आ।#11:14 मला. 4:5 15होर यीसूए बोल्या, जो मेरी गल्ला सुणदा लगीरा, से बड़े ध्याना किन्हें सुणें।

16“हांऊँ एस्सा पीढ़ी रे लोका री तुलना केस किन्हें करूं? स्यों तिन्हा बच्चेया साहीं ऐं, जो बजारा मन्झ बैठी किन्हें खेल्हा ऐं होर एक दूजे किन्हें सिकायत करहे, 17कि आस्से तुस्सा रे कठे ब्याह रे गाणे गाये, होर तुस्से नी नाचे; आस्से मातम बणाया पर तुस्से नी रोये। 18इंहां करी किन्हें तुस्से यहून्ना बपतिस्मा देणे वाल़े रे कठे भी सिकायत करहे कि तिन्हें आपणा टैम खाणे-पीणे मन्झ नी लगाया, होर तुस्से बोल्हा ऐं कि तेस मन्झ दुस्टात्मा ई। 19पर हांऊँ माह्णुं रा मह्ठा भी आम लोका साहीं खांहां पींहां, होर तुस्से बोल्हा ऐं कि से ता खाऊ होर पियक्कड़ माह्णुंआं, होर चुंगी लैणे वाल़ा होर पापिया रा दोस्त! पर माह्णुं रे काम एस गल्ला रा फैसला करहे कि बुद्धिमान कुणहां।”

विस्वास नी करणे वाल़े पर सजा

(लूक. 10:13-15)

20तेबे यीसू तिन्हा गांऊँआं रे लोका जो धिकारदा लग्या, जिन्हारे बिचभरा मन्झ यीसूए भतेरे चमत्कारा रे काम कितिरे थे; क्यूंकि फेरी भी तिन्हें पाप करणा नी छाडीरा था। 21“हे खुराजीन गांऊँआं, होर बैतसैदा गांऊँआं मन्झ रैहणे वाल़े लोको! तुस्सा जो बौह्त सजा मिलणी। जो चमत्कारा रे काम तुस्सा मन्झ किते गये, अगर स्यों सुर होर सैदा रे सैहरा रे मन्झ किते जांदे, ता तेथी रे लोक बौह्त पैहले ही स्यों टाट ढखी किन्हें, होर सुआही मन्झ बैठी किन्हें, ये दसदे कि तिन्हें पाप करना छाडी दितिरा। 22पर हांऊँ तुस्सा किन्हें बोल्हा; कि न्याया रे ध्याड़े तुस्सा री हालत सुर होर सैदा रे सैहरा रे लोका ले ज्यादा खराब हूणीं। 23होर हे कफरनहूम सैहर रे लोको, क्या तुस्से स्वर्गा तक ऊँचा किते जाणे? तुस्से ता पताल लोका तक नीचे किते जाणे। क्यूंकि जो चमत्कारा रे काम तुस्सा मन्झ किते गईरे, अगर सदोम सैहरा मन्झ किते जांदे, ता से आजा तक सलामत बणी रैहन्दा। 24पर हांऊँ तुस्सा किन्हें बोल्हा कि, न्याया रे ध्याड़े तेरी हालत ले सदोम सैहरा रे लोका ले ज्यादा खराब हूणीं।”

बोझा किन्हें दभिरे लोका रे कठे अराम

(लूक. 10:21-22)

25तेस ई टैम यीसूए ये प्रार्थना किती, “हे बापू, स्वर्गा होर धरती रे प्रभु, हांऊँ तेरा धन्यावाद करहा कि, तैं ये गल्ला बुद्धिमाना होर समझदारा लोका ले ल्कोई किन्हें रखी, होर छोटे बच्चेया साहीं लोका पर जाहिर किती। 26हां, हे बापू, क्यूंकि तुस्सा जो येई खरा लग्या।

27मेरे बापूए मुंजो सब कुछ दितिरा, होर कोई मह्ठे जो नी जाणदा, सिर्फ बापू जाणा; होर कोई बापू जो नी जाणदा, सिर्फ मह्ठा जाणा, होर जेस पर मह्ठा जाहिर करणा चाहे से बापू जो जाणा।

28हे सभ मैहनत करणे वाल़ेओ होर बोझा किन्हें दभीरे लोको, मेरे वाले आऊआ; मां तुस्सा जो अराम देणा। 29मेरा जुआ आपणे गास चकी लऊआ#11:29 ये एक कहावत ई जेसरा मतलब आ मेरी सेऊआ करो या मेरे कठे समर्पित हुई जाओ; होर मेरे ले सिखा; क्यूंकि हांऊँ नम्र होर मना मन्झ दीन आ: होर तुस्सा आपणे मना मन्झ अराम पाणा। 30क्यूंकि मेरा जुआ असान होर मेरा बोझ फाहूका आ।”

Currently Selected:

मत्ती 11: MJLNT

Highlight

Copy