Kîam 21

Gûciarwa kwa Isaka

1Ngai-Mûnene nîwarathimire Sara wata ûrîa aamwîrîrîte. 2#Ahib 11.11 Iburahimu aarî mûthuuri mûkûrû vîndî îrîa Sara aagîre îvu na agîciara kavîcî. Kavîcî kau gaaciarirwe kavinda wa karîa Ngai-Mûnene aaugîte nîgagaaciarwa. 3Iburahimu nîwatuîrîre mwana ûcio rîîtwa Isaka. 4#Kîam 17.12; Ciîko 7.8 Vîndî îrîa Isaka aakinyirie mîthenya înana, Iburahimu nîwamûruithirie, wata ûrîa Ngai aathanîte. 5Iburahimu aarî wa mîaka îgana rîmwe rîrîa Isaka aaciarirwe. 6Nake Sara nîwaugire atîrî, “Ngai nîatûmîte ntheke na mûndû wa wonthe ûkeegucaga ûvoro ûyû wa nake akaathekaga.” 7Sara nîwacokire akiuga atîrî, “Nî kûrî mûndû ûngîerire Iburahimu atî Sara nwa ongie mwana. Rîu nîrîmûmûciarîru kavîcî arî mûkûrû.”

8Kaana kau nîgaakûrire, na mûthenya ûrîa gatigithirue kwonga, Iburahimu nîwagîre na kîrugo kînene.

Iburahimu nîwengatire Hagari na Ishumaeli

9Mûthenya ûmwe Isaka mûvîcî wa Sara nîmaathakanagia na Ishumaeli, mwana ûrîa Iburahimu maagîte na Hagari. Hagari aarî wa kuuma Misiri. 10#Agal 4.29-30 Rîrîa Sara oonire ûguo nîwerire Iburahimu atîrî, “Mûvîcî wa Hagari ndungata yaku, ndakagaa indo ciaku vamwe na Mûvîcîwa. Kwoguo îngata Hagari wana mûvîcî.” 11Ûvoro ûcio nîwathînirie Iburahimu mûno, nîûndû wa nake Ishumaeli aarî mûvîcî. 12#Aro 9.7; Ahib 11.18 Nwatî Ngai nîwerire Iburahimu atîrî, “Ndûkathînîke nîûndû wa kavîcî kau na ng'ina Hagari ndungata yaku ya mûndûmûka. Îka ûrîa Sara akwîra, nîûndû njiarwa irîa nie naakwîrîre ikaaumana na Isaka. 13Wana nîngaava mwana wa mûndûmûka ûrîa ndungata rûrîrî, nîûndû wa nake nî mûvîcîguo.”

14Mûthenya ûcio warûmîrîrîte kîraûko tene mûno, Iburahimu nîwavere Hagari irio, na mbooro îcûrîte manjî. Nîwacokire agîkuithia Hagari mwana na akîmwîngata. Hagari nîwathiîre akîûrûraga werûrî wa Beerisheba. 15Rîrîa manjî marîa aakuîte maathirire, nîwatigire mwana rungu rwa mîtî. 16Nîwacokire akîthiî vandû ta va mita îgana rîmwe agîkara nthî. Hagari nîweîrire atîrî, “Nie ndingîûmîrîria kwona mwana wakwa agîkua.” Ekarîte wa vau, kaana nîkaambîrîrie kûrîra kaugîrîrîtie. #21.16 Mandîko mamwe maugaga Hagari nîwambîrîrie kûrîra.

17Ngai nîwegwire kamwana kau gakîrîra. Nake mûraika wa Ngai kuuma îgûrû, nîwaririe na Hagari akîmûria atîrî, “Nîndûî kîrakûthînia Hagari? Tiga kûmaka nîûndû Ngai nîwegua kavîcî gaku gakîrîra karî varîa karî. 18Ûkîra ûthiî ûnyite kavîcî kau ûkaûmîrîrie, nîûndû nîngaagatua rûrîrî rûnene.” 19Ngai nîwamûvingûrire metho na akîona kîthima Kîam manjî. Hagari nîwathiîre agîtavîrîra mbooro yake manjî magîcûra na agîkundia kamwana. 20Nako kamwana kau nîgaakûrire gakîmenyagîrîrwa nî Ngai-Mûnene. Nîgaatûûrire werûrî wa Parani na gagîtuîka mûguîmi njamba. 21Ng'ina nîwamûcarîrie mûndûmûka kuuma vûrûrirî wa Misiri.

Kîrîkanîro gatagatî ka Iburahimu na Abimeleki

22 # Kîam 26.26 Vîndî wa îo Abimeleki na Fikoli mûnene wa athigari nîmaathiîre kûrî Iburahimu na makîmwîra atîrî, “Ngai ethagîrwa arî vamwe nawe maûndûrî monthe marîa wîkaga. 23Kwoguo îîvîte ûrî ava mbere ya Ngai atî ndûkaamveenia, kana ûveenie ciana ciakwa kana njiarwa ciakwa. Mbîthîrîtwe nîrî mwîvokeku kûrî we, kwoguo mbîra atî wanawe ûkethagîrwa ûrî mwîvokeku kûrî nie na kûrî vûrûri ûyû wathamîre.”

24Nake Iburahimu nîwaugire atîrî, “Nîneranîra guo.”

25Iburahimu nîwavirire mateta kûrî Abimeleki nîûndû wa kîthima kîrîa gîatavîtwe nî ndungata cia Abimeleki. 26Abimeleki nîwerire Iburahimu atîrî, “Nie ndiîcî nîûrîkû wekire ûguo; we ndwanambîra, na îno nî vîndî ya mbere kwîgua ûvoro ûyû.” 27Iburahimu nîwavirîre Abimeleki ng'ondu na ng'ombe, na marî oîrî, nîmaarûthire kîrîkanîro. 28Iburahimu nîwamûrire tûmîatî mûgwanja kuuma ndîthiarî yake. 29Nake Abimeleki nîwamûririe atîrî, “Wamûrire tûmîatî tûtû mûgwanja nîkî?”

30Iburahimu nîwerire Abimeleki atîrî, “Amûkîra tûmîatî tûtû mûgwanja nîguo ûtuîke mûira wakwa atî nî nie nenjire kîthima gîkî.” 31Kwoguo vandû vau nîveetirwe Beerisheba, nîûndû nîvo Abimeleki na Iburahimu maarûthîre kîrîkanîro.

32Nao marîkia kûrûtha kîrîkanîro, Abimeleki na Fikoli nîmaacokire vûrûrirî wa Afilisiti. 33Iburahimu nîwavandire mûtî ûrîa wîtagwa mûkarakaba vau Beerisheba na akîgooca Ngai-Mûnene, Ngai ûrîa ûtûûraga mwoyo arî vo. 34Iburahimu nîwatûûrire vûrûrirî wa Afilisiti arî mûgeni îvinda îraca.

Currently Selected:

Kîam 21: KKB

Highlight

Copy