Kîam 3
3
Ûremi wa Mûndû
1 #
Kûguû 12.9; 20.2 Njoka yarî na wara gûkîra nyamû irîa ciîngî cionthe cia kîthaka irîa Ngai-Mûnene, Ngai aaûmbîte. Njoka nîyaûririe Mûndûmûka atîrî, “Nîkwa Ngai aamwîrire mûtikaarîe matunda ma mûtî wana ûrîkû mûgûndarî ûyû?”
2Mûndûmûka nîwacokerie njoka atîrî, “Nîtwîtîkîrîtue kûrîa matunda ma mûtî wa wonthe ûrîa ûrî Mûgûndarî ûyû, 3nwatî mûtî ûrîa ûrî mûgûndarî gatagatî, Ngai aatwîrire tûtikarîe îtunda rîaguo wana kana tûrîvutie; nîguo tûtigakue.”
4Nwatî njoka nîyerire mûndûmûka atîrî, “Mau nî maveeni, mûtingîkua. 5Ngai aamwîrire ûguo nîûndû nîwecî atî rîrîa mûkaarîa îtunda rîa mûtî ûcio, metho menyu nîmakaavingûka na nîmûgaatuîka ta Ngai mûmenyage maûndû maro na marîa macûku.”
6Nake mûndûmûka nîwonire ûrîa mûtî ûcio warî mûthaka na ûrîa matunda maguo maarî maro ma kûrîwa, na atî warî wa kwîrirîrua nîûndû wa kûva mûndû ûgî. Kwoguo nîwatuire matunda ma mûtî ûcio akîrîa. Nîwacokire akîva mûthuuriwe mamwe, wa nake akîrîa. 7Na maarîa, metho mao oîrî nîmaavingûkire. Nao nîmaamenyire atî maarî njaga. Nao nîmaatumanirie mathangû ma mîkûyû magîîkunîkîra namo.
8Kîvwaî gîakinya, nîmeguire Ngai-Mûnene, Ngai agîcera kûu mûgûndarî, na makîîthitha kûu gatagatîrî ka mîtî nîguo ndakamoone. 9Nwatî Ngai-Mûnene, Ngai nîwetire mûndûmûrûme ûcio na akîmûria atîrî, “Wî kû?”
10Mûndûmûrûme ûcio nîwamûcokerie atîrî “Mbîgwire ûgîcera mûgûndarî; negua guoya na nethitha nîûndû nîraarî njaga.”
11Ngai nîwamûririe atîrî, “Nû ûkwîrire atî ûrî njaga? Nîkwa ûrîîre îtunda rîa mûtî ûrîa naagûkanirie?”
12Mûndûmûrûme ûcio nîwacokirie atîrî, “Mûndûmûka ûrîa wamvere twîkaranagie nake, nîke ûmvere îtunda rîa mûtî ûcio narîrîa.”
13 #
2Akor 11.3; 1Tim 2.14 Ngai-Mûnene, Ngai nîwaûririe mûndûmûka ûcio atîrî, “Wîkire ûguo nîkî?” Nake Mûndûmûka nîwamûcokerie atîrî, “Nî njoka îmvenererie narîrîa.”
Ngai nîwamatuîrîre
14Ngai-Mûnene, Ngai nîwerire njoka atîrî, “Nîûndû wa ûguo wîkîte, gatagatîrî ka nyamû cionthe, we nîûkûnyitwa nî kîrumi. Kuuma rîu we nîûtûûra ûthiîcaga ûkurumîte na ûkaarîcaga mûthetu mîthenya yonthe ya ûtûûro waku. 15#Kûguû 12.17 Nîngûtûma we na mûndûmûka mûmenane, na mbîkîre ûthû gatagatî ka mbeû yaku na ya mûndûmûka. Mbeû ya mûndûmûka îgaakûringaga kîongo nawe ûkamîrûmaga ndiira ya kûgûrû.”
16Ngai-Mûnene, Ngai nîwacokire akîra mûndûmûka atîrî, “Nîngaakwongerera mathîna vîndî îrîa yonthe ûkethagîrwa ûrî îvu, na ngwongagîrîre ûrûrû vîndî ya gûciara. Wana kûnekariî ûguo, we ûkeriragîria mûthuuriguo, nake agaakwathaga.”
17 #
Ahib 6.8
Nake Ngai-Mûnene, Ngai nîwerire Adamu atîrî, “Nîûndû wa kûthikîrîria mûkaguo, na warîa matunda ma mûtî ûrîa nagûkaanirie ndûkarîe, nthî nîîkûnyitwa nî kîrumi nîûndû waku. We ûkonaga irio cia kûrîa kuuma nthî na njîra ya mînoga. 18Nthî îkaameraga ria na mîgua nîûndû waku. Nawe ûkaarîcaga mîmera ya nthî. 19We ûkonaga irio ciaku cia kûrîa ûithithinîrîte nginya vîndî îrîa ûgaacoka mûtheturî, nîûndû kûu nîkuo warutirwe. Waûmbirwe kuuma mûtheturî, na ûgaacoka ûtuîke mûthetu.”
20Adamu eetire mûka Awa nîûndû nîke warî ng'ina wa andû onthe arîa marî mwoyo. 21Nake Ngai-Mûnene, Ngai nîwarûthîre Adamu na mûka nguo ya rûûo na akîmekîra.
Adamu na Awa nîmeengatirwe Mûgûndarî
22 #
Kûguû 22.14
Nake Ngai-Mûnene, Ngai nîwaugire atîrî, “Andû nîmatuîkîte tatue, na nîmagîte na ûmenyo wa maûndû maro na macûku. O matiagîrîrwe nî gwîtîkîrua marîa matunda ma mûtî ûrîa ûvecanaga mwoyo nîguo matûûre tene na tene.” 23Kwoguo Ngai-Mûnene, Ngai nîwamengatire mûgûndarî wa Edeni, nîguo mathiî makarîme nthî kûrîa maaumire. 24Ngai-Mûnene nîwengatire mûndû na akiga ciûmbe irî mwoyo cietagwa Akerubi mwena wa îrathîro wa mûgûnda wa Edeni, na rûviû rwarîrîmbûkaga mwaki na rwathiûrûrûkaga mîena yonthe. Eekire ûguo nîguo njîra îrîa îthiîte mûtîrî wa mwoyo ndîkathiîrîrwe.
Currently Selected:
Kîam 3: KKB
Highlight
Share
Copy
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
©Bible Society of Kenya, 2019