Kîam 30

1Rakeli ndethîrîtwe aciarîrîte Jakovu mwana. Kwoguo Rakeli nîweguîrîre mwarwang'ina wîru, na akîra Jakovu atîrî, “Mva ciana kana ngue.”

2Jakovu nîwarakarirue nî Rakeli na akîmwîra atîrî, “Ngai nîke ûgirîtie ûgîa ciana; tînie.”

3Rakeli nîwaugire atîrî, “Oca Biliha ndungata îno yakwa ûmenyane nake kîîmwîrî nîguo înjiarîre kaana, nîguo wana nie nduîke ng'ina wa ciana na njîra yake.” 4Kwoguo Rakeli nîwanengere Jakovu ndungata yake Biliha nîguo atuîke mûka, na akîmenyana nake kîîmwîrî. 5Biliha nîwagîre îvu na agîciarîra Jakovu kavîcî. 6Rakeli nîwaugire atîrî, “Ngai nîwatua ciira wakwa waro. Ke nîwîguîte mavoya makwa na amva kavîcî.” Kwoguo Rakeli nîwatuîrîre kaana kau rîîtwa Dani. 7Biliha nîwagîre îvu rîngî na agîciara kavîcî ga kaîrî. 8Rakeli nîwaugire atîrî, “Nîndûîte mbaara nene na mwarwaiya na navootana.” Kwoguo nîwatuîrîre kaana kau rîîtwa Nafutali.

9Rîrîa Lea oonire atî nîmûtigu kûgîa na ciana, nîwanengere Jakovu ndungata yake Zilipa nîguo atuîke mûka. 10Zilipa nîwaciarîre Jakovu kavîcî. 11Nake Lea nîwaugire atîrî, “Nînagîa na mûnyaka.” Kwoguo nîwamûtuîrîre rîîtwa Gadi. 12Zilipa nîwaciarîre Jakovu kaana kengî ga kavîcî. 13Nake Lea nîwaugire atîrî, “Kaî nîrî na gîkeno-î! Rîu aka makambîtaga gûkena.” Kwoguo nîwatuîrîre kaana kau rîîtwa Ashari.

14Vîndî ya maketha ma ngano, Reubeni nîwathiîre mûgûndarî na akîona matunda mekariî ta nathi na akîvirîra ng'ina Lea. Nake Rakeli nîwerire Lea atîrî, “Nakûthaitha ûmve matunda mau mekariî ta nathi ma mûvîcîguo.”

15Nwatî Lea nîwamûûririe atîrî, “Nîtakuga ndûrî mwîganîre nî kûnjuuna mûthuuriwa? Rîu ûrenda gûkuua matunda mau mekariî ta nathi ma mûvîcîwa.”

Rakeli nîwaugire atîrî, “Ethîrwa nîûkûmva matunda mau mekariî ta nathi nîûkûmama na Jakovu ûtukû ûyû wa ûmûnthî.”

16Kîvwaî Jakovu auma mûgûndarî Lea nîwathiîre kûmûtûnga na akîmwîra atîrî, “Ûtukû wa ûmûnthî nîûmama nanie, nîûndû nîngûgûrire na matunda mekariî ta nathi ma mûvîcîwa.” Kwoguo Jakovu nîwamamire na Lea ûtukû ûcio.

17Ngai nîwegwire mavoya ma Lea, kwoguo Lea nîwagîre îvu na agîciarîra Jakovu kavîcî ga gatano. 18Lea nîwacokire akiuga atîrî, “Ngai nîwamva kîveo gîakwa, nîûndû nînavere mûthuuri wakwa ngombo yakwa.” Kwoguo nîwagatuîrîre rîîtwa Isakaru. 19Lea nîwacokire akîgîa îvu rîngî na agîciarîra Jakovu kavîcî ga gatandatû. 20Lea nîwacokire akiuga atîrî, “Ngai nîamvete kîveo Kîamro. Rîu mûthuuri wakwa nîakûmbîtîkîra, nîûndû nînîmûciarîrîte anake atandatû.” Kwoguo nîwamûtuîrîre rîîtwa Zebuluni. 21Vuvarî nîwacokire agîciara kerîtu agîgatuîrîra rîîtwa Dina.

22Ngai nîwaririkanire Rakeli, agîcokia mavoya make agîtûma avote kûgîa na ciana. 23Nîwagîre îvu na agîciara kavîcî, na akiuga atîrî “Ngai nîanthengutîrîtie gîconoko na njîra ya kûmva kavîcî. 24Ngai-Mûnene aromva kavîcî kengî”; kwoguo nîwagatuîrîre rîîtwa Josefu.

Jakovu nîmaarîrîrie îrîvi na Labani

25Vuva wa Rakeli gûciara Josefu, Jakovu nîwerire Labani atîrî, “Tiga nthiî nîguo njoke mûciî. 26Nengera aka akwa arîa matûmîte ndute wîra mûrito gwaku nîguo ngîe nao; na ûnengere ciana nîguo mînûke. We nîwîcî ûrîa ngûtungatîte waro.”

27Labani nîwacokerie Jakovu atîrî, “Tiga mbuge atî nîmenyete na njîra ya ûragûri atî Ngai-Mûnene nîmûndathimu nîûndû waku. 28Gweta mûcara waku na nîngûkûrîva.”

29Jakovu nîwacokirie atîrî, “We mwene nîwîcî ûrîa ngûtungatîrîte na nîwîcî ûrîa ndîthia ciaku irengîvire natuîka mûrîthi wacio. 30Nîûndû mbere ya mbûke gwaku ndîthia ciaku itiarî nyîngî, nwatî rîu nîciîngîvîte mûno na Ngai-Mûnene nîarakûrathimaga kûrîa kuonthe nîrathiîcaga. Nwatî rîu nî kavinda ga kûthûkûmîra mûciî wakwa.”

31Labani nîwaûririe Jakovu atîrî, “Ûrenda ngûrîve na ndûî?”

Nake Jakovu nîwacokirie atîrî, “Ndirenda ûndîve wanarî kîndû, nwatî nîngûthiî na mbere na kûmenyerera ndîthia ciaku ethîrwa nîûgwîtîkania na rîciria rîakwa. 32Tiga nthiî ndîthiarî ciaku cionthe ûmûnthî mboce ng'ondu cionthe mbirû, irîa irî na maroro kana macûgû, na itarî ngûrû. Ûcio nîguo mûcara wakwa wonthe ûrîa ngwenda. 33Vuvarî nîûgaaûka kûroria mûcara wakwa, na nîûkaamenya kana naarî mwîvokeku kana ndiarî mwîvokeku. Ûngîkambîthîra na ng'ondu îtarî mbirû kana îtarî na macûgû kana maroro nîûkaamenya nî ya kwîa.”

34Labani nîwacokirie atîrî, “Nînetîkîra, nîtwîka ûguo wauga.” 35Nwatî mûthenya ûcio Labani nîwathengutirie nthenge irîa ciarî na manyaga kana maroro, na mîgoma îrîa yarî na macûgû kana manyaga. Nîwacokire akîthengutia ng'ondu cionthe irîa ciarî mbirû, na akîinengera avîcî ake mairîthagie. 36Labani nîwathengutîre Jakovu na akîthiî vamwe na ndîthia ciake rûgendo rwa mîthenya îthatû. Jakovu nîwatigîrwe ndîthia îo îngî ya Labani amîrîthagie.

37Jakovu nîwatuire nthanju cia mîtî ya mûribana, mûrothi, na cia mîcindanûgû, agîciûnûra îkoro nîguo cionekane kûndû kûrîa gûcerû ndaarî. 38Nîwaikirie nthanju icio mbere ya ng'ondu, kûrîa ciathiîcagîra ikîthiî kûnyua manjî. 39Kwoguo ng'ondu ciegûtanîria thanjurî icio, ciagîcaga twori twa manyaga twa macûgû na twa maroro.

40Jakovu nîwaigire ng'ondu na mbûri mwanya, na akîirorithia na kûrîa kwarî na ng'ondu cia manyaga, cia macûgû na irîa mbirû cia Labani. Na njîra îo Jakovu nîwagîre na ndîthia yake na akîmîamûrania na ya Labani.

41Rîrîa nyamû irîa ciarî na vinya ciegûtanagia, Jakovu nîwaigaga nthanju vau mbere yacio vau cianyunyagîra manjî nîguo ciîgûtanîrie kûu nthanjurî icio. 42Jakovu ndaaigaga nthanju icio rîrîa irîa itarî vinya iregûtania. Kwoguo Labani nîwagîre na ndîthia ng'înju, nwatî Jakovu akîgîa na ndîthia noru. 43Na njîra îo, Jakovu nîwatongire mûno. Nîwagîre na ng'ondu nyîngî, ndungata, ngamîîra na mvunda.

Currently Selected:

Kîam 30: KKB

Highlight

Copy