OKONG’ANYA 1
1
Ogokorerwa bobe kw’Abaisraeli agwo Misiri
1Aya naro amarieta ’abamura ba Israeli abasoete Misiri amo na Yakobo ise, kera oyomo amo nabanto b’omochie oye: 2Reuben na Simeoni, Lawi na Yuda; 3Isakaru na Sabuloni, na Benjamin; 4Dani na Nafutali, Gadi na Aseri. 5Abanto bonsi abaiboire korwa ase Yakobo nigo barenge emerongo etano na ebere. Yusufu ere konya nao amenyete Misiri korwa kare.
6Yusufu agakwera aroro, na bamura bamwabo bonsi, na abanto bonsi b’ekegori keria. 7Abaisraeli bagasarara na komenteka, bakaba abange mono, bakabucha kegima ase ense eria.
8Omoruoti omoyia, oyotamomanyete Yusufu, akaira obogambi bw’ense ya Misiri. 9Ere agatebia abanto baye, “Rigereria, Abaisraeli aba babeire abange kobua intwe, naende babeire ne chinguru gotobua. 10Torigie nsemi ki tokobakorera tobatange, tibabaisa komenteka. Toise gosoa esegi, barabwo mbabaise kobwatana nababisa baito batorwanie, erio bang’anye korwa ense yaito.” 11Ase ayio bakabeka abateneneri abatindi igoro asebare babachande nemeremo emekong’u mono. Agwo Abaisraeli bakaagachera Farao emechie y’okogacha chinibo, nero Pitoni na Ramesesi. 12Korende buna Abamisiri bagendererete kobachanda mono, naboigo Abaisraeli bagendererete komenteka na gwesiarera, goika Abamisiri bakabagecha na kobairoka. 13Bagakoria Abaisraeli emeremo emekong’u 14y’ogotiringa esike na gokora amatabori, na emeremo ende ao ao ase emegondo. Ase emeremo ende yonsi Abaisraeli baare gokora nigo baare gokorigwa ase obotindi.
15Omoruoti o Misiri agachika Sifura na Pua, abaiboria b’Abaibirania, akabatebia, 16“Ekero mogosaacha abakungu b’Abaibirania kobakoibora, morigererie mwana ki oiborwa; onye nomoisia, momoite, korende onye nomoiseke, momotige abe moyo.” 17Korende abaiboria baria nigo bamoirogete Nyasae. Tibakorete buna omoruoti o Misiri abatebetie, korende bagatiga abana abaisia babe moyo. 18Omoruoti o Misiri akarangeria abaiboria baria, akababoria, “Nase ki mwakorire iga? Mwatigire abana abaisia bare moyo.”
19Abaiboria bakairaneria Farao, “Abakungu b’Abaibirania tibari buna aba Abamisiri; barabwo nabaango ase okoibora, nigo bakoibora ritang’ani omoiboria ataraika.” 20Nyasae agakorera abaiboria baria amaya, na abanto bakagenderera komenteka koba abange. 21Na ekiagera abakungu baria abaiboria bamoirogete Nyasae, ere akabasesenia, na barabwo bakaibora abana abange. 22Erio Farao agachika abanto baye bonsi, akabatebia, “Kera omwana omoisia okoiborwa ase Abaibirania, momotugute ase orooche rwa Naili, korende kera omwana omoiseke momotige abe moyo.”
Currently Selected:
OKONG’ANYA 1: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
