OMOCHANKO 15
15
Omonene ogokora okobwatana kw’ogotianania na Aburamu
1Nyuma y’amang’ana ayio, ring’ana ri’Omonene rigachiera Aburamu ase okorora, rigoteba, “Aburamu, toiroka, Inche nenguba yao, na eng’eria yao nebe enene mono.”
2Aburamu akamoboria, “Inee! Omonene Nyasae, ninki orang’e? Naki nigo ngendererete gochia gokwa ntari na mwana, na oyorache koira omwando o bwone n’Eliezeri, oyo Omodamesiki.” 3Aburamu akabora naende, “Rora, tong’eti abana, na omosomba oyoiboirwe aa bwone, nere oraire omwando o bwone.”
4Erio ring’ana ri’Omonene rikamochiera naende, rigateba, “Omonto oyio, tari ere oraire omwando oo, otatiga omwana oo bori, orarwe ase enda yao, nere oraire omwando oo.” 5Omonene akamosokia isiko, akamotebia, “Rigereria gochia igoro, na obare ching’enang’eni, gose nonyare gochibara.” Erio akamotebia, “Ororeria rwao naboigo rorabe.”
6Aburamu nigo amwegenete Omonene, na ase engencho eyio akabarwa koba omonyene oboronge.
7Erio akamotebia, “Inche ninche Omonene, nakorusetie korwa ase Uru y’Abakalidayo, ninkoe ense eye ebe omwando oo.”
8Aburamu akamoboria, “Inee! Omonene Nyasae, naki ndakore imanye ng’a nebe omwando one?”
9Omonene akamoiraneria, “Ndetera emori ritororo y’emiaka etato, na embori esubeni y’emiaka etato, na emingichi y’emiaka etato, ne riruma ne riige rie riruma.” 10Akamorentera echio chionsi, agatandora kera eyemo chimbaara ibere, akabeka kera orobaara rogachikana norwamwabo, korende chinyoni chirochio tachitandora. 11Na ekero chinsoti chiachia kogwa ase amabego aria, Aburamu agachiseria.
12Erioba koriabeire ang’e kogwa, Aburamu akabwatwa ne chitoro chindito, na obwoba obonene mono bokamosoa. 13Erio Omonene agatebia Aburamu, “Manya amaene ng’a ororeria rwao inabache koba abamenyi ase ense etari eyabo, na barabwo inababe abasomba b’abanto b’agwo, na abwo inababachande mono ase engaki y’emiaka amagana ane. 14Abanto b’egesaku keria, barabakore babe abasomba babo, nimbagambie, na nyuma y’ayio nabaruo bare nenibo enyinge mono. 15Korende aye nogende ase chisokoro chiao ase omorembe. Igo oratindekwe ase obogotu obuya. 16Barabwo bagoika ase ekiaare gia kane inabairane gocha aa, ekiagera obobe bw’Abaamori tiboraikerana goika bono.”
17Ekero erioba riagure, na omosunte osoire, eriko rigosokia erioki amo nekieri kere nomorero ekebemberi, bigaeta gati ye chinyama chiria. 18Ase rituko erio Omonene agakora okobwatana kw’ogotianania n’Aburamu, agateba, “Ororeria rwao nabaeire ense eye gochakera ase orooche orwo oronene rokorokwa Eufarati, 19ase ense y’Abakeni, na Abakenisi, na Abakadimoni, 20na Abahiti, na Abaperisi, na Abarefai, 21na Abaamori, na Abakanani, na Abagirigasi, na Abayebusi.”
Currently Selected:
OMOCHANKO 15: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
