OMOCHANKO 19
19
Ebibe bi’abanto ba Sodomu
1Abamalaika baria babere bakagenda, bagaika Sodomu mogoroba, na Loti nigo arenge oikaransete geita gia Sodomu. Ekero Loti abaroche, akaimoka kobarotota, agatung’ama inse, akaumama, 2akabora, “Abanene baane, gobera gocha aa, mosoe mw’omosomba oino, monyore amache mwesibie amagoro aino, morare goika mambia bokie; erio moche moimoke mambia, mogende.”
Barabwo bagakana, bagateba, “Yaya, nigo tokoba aa inchera obotuko obo bwonsi.”
3Korende akabasorora mono, na barabwo bakagobera, bagasoa nyomba mwaye. Erio akabakorera endagera, akaroisia na emegati etabekiri memera, na barabwo bakaria.
4Ritang’ani batarachia korara, abanto bonsi pi b’omochie oria o Sodomu, abamura na abagaaka, bagacha bagaetanana enyomba, 5bakarangeria Loti, bakamoboria, “Abanto abwo bacha mwao bono botuko, ng’ai bare? Basokie isiko aa, tobakorere obosooku.”
6Loti agasoka isiko ase abanto baria, agasieka egesieri korwa nyuma yaye, 7akabatebia, “Baminto, nabasoroire, timokora bobe buna iga. 8Rora, nimbwate abaiseke baane babere abekungi; tiga mbabarentere, na mobakorere buna moranche, korende abanto aba iga timobakorera ing’ana riibe, ekiagera basoire nyomba mwane ime.”
9Korende barabwo bakamotebia, “Karuo!” Naende bagatebania, “Omonto oyo nomomenyi are aa seito, na bono nigo arigetie kogamba! Bono nigo toragokorere bobe mono kobua buna nanga tware gokorera abanto abwo.” Erio bagatwoma‐twoma Loti mono, bagaika ang’e gosaria egesieri. 10Korende abanto baria barenge ime bakarambora amaboko abo, bakang’usa Loti gochia nyomba ime, bagasieka egesieri. 11Erio bakabaukoria abanto baria barenge gesieri isiko, abake na abanene, erinde bagasinywa konyora egesieri.
12Erio abasacha baria babere bakaboria Loti, “Nore nonde omino aa? Nobwate abana bao banyuomete abaiseke bao, gose abamura na abaiseke bao, gose kobwate bande bamino ase omochie oyo, barusie korwa aase aa. 13Naki intwe nigo twachire gosaria aase aa, ekiagera ekerero kiaye kiamentekire ase obosio bw’Omonene; ase ayio Omonene ototomire tosarie aase aa.”
14Erio Loti agasoka, agatebia abamura aba konya bariereire abaiseke baye boko, “Imoka bwango, morue aase aa, ekiagera Omonene ngocha are gosaria omochie oyo,” Korende barabwo bagakaga ng’a negosori akobakorera.
Loti ogotoorigwa amo nabaiseke baye, korende mokaye akoomera inchera
15Bogachia gokia mambia, abamalaika baria bakaayereria Loti, bakamotebia, “Imoka bwango, ira mokao na abaiseke bao babere abare aa amo naye, tobaisa gosirigwa ase egesusuro keria omochie oyo ogochia konyora.” 16Ekero abete ogotebana, abanto abwo bakamobwata okoboko, bakabwata na mokaye na abaiseke baye, ekiagera Omonene amororerete amabera, akamosokia isiko y’omochie. 17Ekero babasokirie isiko, oyomo obo akabatebia, “Tama, motoorie obogima bwaino; timorigereria nyuma, gose timotenena aande onsi ase ense eraire. Motame gochia ase ebitunwa, timobaisa gosira.”
18Loti akabakania, akabatebia, “Taibo, Omonene one; 19rora omosomba oo onyorire ogwancherwa ase amaiso ao, kwamentire amabera ao asende ase ogotooria obogima bwane; korende inche tinkonyara gotama ng’ikeere ebitunwa; amabe abaise konyora, ang’ite. 20Rora omochie oyo ore ang’e aiga, omochie omoke, noro ndaike bwango. Tiga ntame gochia ase omochie oria, ore omoke iga, ntoorie obogima bwane.”
21Ere akamotebia, “Rora, nagwancheire ase ring’ana erio boigo. Tingosaria omochie oyio gwateba. 22Ayerera, bwetoorie, ekiagera tingokora ing’ana rinde rionsi goika gwasoire omochie oria ime.”
Ase ayio, omochie oyio okarokwa Soari.
Sodomu na Gomora egosambwa na gosarigwa
23Erioba konya riaorokire ekero Loti asoete Soari. 24Erio Omonene akaruta korwa igoro amagena ’omorero akonyititoka na omorero igoro ya Sodomu na Gomora, 25agasamba emechie eyio, amo nense eyio yonsi eraire, na agasiria bonsi abamenyete imeo, na ebinto bionsi biare gokina ase ense eria. 26Korende moka Loti nigo arenge korwa nyuma, akarigereria magega, akaonchoka, akooma, akaba buna rigena ri’omonyo.
27Mambia kobwakia, Ibrahimu akagenda aase aria atenenete ase obosio bw’Omonene. 28Ere akarigereria maate gochia ensemo ya Sodomu na Gomora, na ense yonsi eraire, na agwo akarora erioki rigotiira korwa inse, buna erioki rikorwa ase eriko rinene.
29Ekaba ekero Nyasae asaretie emechie eyio y’ense eraire, akaba okoinyora Ibrahimu, akarusia Loti ase ogosarigwa koria, ekero asambete emechie eyio ase Loti amenyete.
Omochaki bwe chinderia chi’Abamoabu na Abaamoni
30Loti agatiira korwa Soari, agacha akamenya ase ebitunwa amo nabaiseke baye babere, ekiagera nigo oboete komenya Soari; akamenya ase rikuruma amo nabaiseke baye babere. 31Omoiseke oye omotangi agatebia oyomwabo omoke, “Tata ogotire, gose monto onde tari ase ense oyorache gotonyuoma buna engencho y’ense yonsi ere. 32Bono, tiga toe tata edivai anywe, atinde, torare nere, erinde tomotenenerie egesaku kiaye, tigesira.” 33Bakanyoisia ise edivai ase obotuko boria; omoiseke oria omotangi agachia, akarara nere, ise tamanya ekero arara, gose ekero aboka.
34Rituko ria kabere omoiseke oria omotangi agatebia oria omoke omwabo, “Rora, obotuko bwa igoro nigo naraire na Tata; tomonyoisie naende edivai ase obotuko obo, erio naye ochie, orare nere, erinde tomotenenerie egesaku kiaye, tigesira.” 35Bakamonyoisia naende edivai ase obotuko obwo. Omoiseke oria omoke akaimoka, akarara nere, ise tamanya ekero arara, gose ekero aboka. 36Naboigo abaiseke abwo babere ba Loti bakorete, bakaba barito korwa ase ise. 37Oria omotangi akaibora omwana omoisia, akamoroka Moabu; oyio nere sokoro bw’Abamoabu goika rero iga. 38Na oria omwabo omoke, nere akaibora omwana omoisia, akamoroka Ben‐Ami; oyio nere sokoro bw’Abaamoni goika rero iga.
Currently Selected:
OMOCHANKO 19: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
