OMOCHANKO 28
28
Yakobo ogotama gochia Harani
1Erio Isaka akarangeria Yakobo, akamosesenia, akamotebia, “Tobaisa konyuoma omoiseke bw’Abakanani. 2Imoka, ogende Padan‐Aramu ase omochie o Betueli, sokoro yao, onyuome omokungu oyomo korwa ase abaiseke ba Labani, nyoko rome. 3Na Nyasae Omobui nagosesenie, agokinie, na oroiboro rwao naromente robe omoganda omonene bw’ebisaku. 4Ere nakoe ogosesenigwa kwa Ibrahimu, aye amo nororeria rwao, erinde onyare koira ense eye ore omomenyi bono, eye Nyasae aete Ibrahimu!” 5Naboigo Isaka agatebia Yakobo agende, na ere akagenda Padan‐Aramu ase Labani, mosinto o Betueli Omoaramu, Labani nere momura omwabo Rebeka, ng’ina Yakobo na Esau.
Esau okonyuoma omokungu onde
6Bono Esau akarora buna Isaka asesenirie Yakobo na komotoma agende Padan‐Aramu anyuome omokungu korwa aroro, ekiagera ekero amosesenetie, akamokania tabaisa konyuoma moiseke onde bwensi bw’Abakanani!
7Naende akarora ng’a Yakobo oigwereire ise na ng’ina ogendire Padan‐Aramu. 8Ase igo ekero Esau aroche ng’a Isaka ise tancheti abaiseke b’Abakanani, 9akagenda o Isumaeli, akanyuoma Mahalati, omoiseke o Isumaeli mosinto o Ibrahimu, mosubati omwabo Nebayoti, abe omokungu oye amo nabakungu baria bande abwate ritang’ani.
Okorota kwa Yakobo agwo Beteli
10Yakobo akaimoka korwa Beeri‐Seba kogenda Harani. 11Agaika aase gete, akarara agwo botuko, ekiagera erioba konya riagure. Akabogoria rigena erimo ri’aase aria, akarara, agatoorera omotwe oye ase rigena riria. 12Akarota, akarora ekeriinero getenenirie korwa inse riroba, keigete igoro, na abamalaika ba Nyasae bagokeriinera na goikera. 13Akarora Omonene oteneine ase obosio bwaye, okobora, “Inche ninche Omonene, Nyasae o Ibrahimu, na Nyasae o Isaka. Ense eye oraire ninkoyee aye amo noroiboro rwao; 14narororwo inarobe oronge buna orotu rw’ense, naye norande gochia ensemo ya bosongo, na moocha, na sugusu, na irianyi; na asore aye, na ase ororeria rwao, chiamate chionsi chi’ense inachisesenigwe. 15Rora, inche nimbe amo naye, ninkorende aande onsi orabe gokogenda, naende ninkoiranie gocha ase ense eye; naki tinkogotiga goika nagokoreire ayio nagotebirie.”
16Yakobo akaboka korwa ase chitoro chiaye, akabora, “Amaene, Omonene nao are aase aa, na inche tinamanyete.” 17Ere akoboa, akabora, “Aa naase okoirokia! Aa takomocha koba enyomba ya Nyasae, aa nao egeita kia igoro.”
18Yakobo akaboka mambia chuni, akaimokia rigena riria atoorerete omotwe oye, akaritenenia buna esiiro koba ekeinyorio, akaumora amaguta igoro yaye. 19Aase aria akaaroka Beteli.#28:19 Beteli, engencho yaye: enyomba ya Nyasae Korende ritang’ani omochie oria nigo ore korokwa Lusu. 20Erio Yakobo akaria eira, okobora, “Nyasae karabe amo nainche, andende ase orogendo rwane na kong’a endagera nkoria, ne chianga nkobeka, 21na inche kondairane ase omochie o tata nomorembe, erio Omonene nabe Nyasae one; 22ne rigena eri natenenia aa buna esiiro nigo rirabe enyomba yao, Nyasae. Na kende gionsi orang’e inche, amaene tinkomocha gokoa ensemo ya ikomi.”
Currently Selected:
OMOCHANKO 28: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
