OMOCHANKO 4
4
Kaini na Abeli
1Bono Adamu akaba na mokaye, na ere akaba morito, akaibora Kaini,#4:1 Kaini: engencho yaye: okonyora (1 Am ’Eb 1:1–4) akabora, “Nanyorire omonto ase ogokonywa kw’Omonene.” 2Naende akaibora Abeli omwabo. Abeli akaba omorisia bwe ching’ondi, na Kaini akaba omoremi bw’omogondo. 3Engaki egaika Kaini akarenta okwa ma kw’omogondo kobe ekeegwa ase Omonene. 4Abeli nere akarenta chimanwa chintangi chinoru korwa ase riicho riaye. Na Omonene aganchera ekeegwa ki’Abeli, 5korende tancherete Kaini na ekeegwa kiaye. Ase ayio Kaini akagechigwa, na obosio bwaye bokaonchoka, bokairura. 6Na Omonene akamoboria, “Kaini, nase ki okoba nendamwamu na obosio bwao bwairurire?
7“Korakore buya, nabwancherwe.
Otakoreti buya, ebibe nigo bikoganyererete gesieri;
na birobio nigo bikoganetie.
Korende nekogwenerete aye obibue.”
8Erio Kaini agatebia Abeli omwabo, “Inchuo, togende getii borabu.” Ekero baare agwo borabu, Kaini akaimokera Abeli omwabo, akamoita.
9Erio Omonene akaboria Kaini, “Ng’ai Abeli omino are?”
Kaini akamoiraneria, “Timanyeti inche. Inee! Ninche nkomorenda oyominto?”
10Naende Omonene akamotebia, “Inki eke gwakorire? Eriogi ri’amanyinga ’oyomino riarure ase riroba, riang’ikeire. 11Bono aye kwaragererigwe na goserigwa korwa ase riroba erio riaasamirie omonwa oye na konywa amanyinga ’oyomino korwa ase okoboko kwao. 12Ekero orabe gokorema riroba tirigokwamera endagera nonya ng’ake. Igo orabe omoomboganu na omoetanani ase ense.”
13Erio Kaini agatebia Omonene, “Egesusuro kiane nekerito, tinkonyara gokebogoria. 14Rora, rero gwanseririe korwa ase riroba eri, nimbiseke korwa ase obosio bwao, timborora naende. Nimbe omoomboganu na omoetanani ase ense, na onde bwensi orang’umere nigo arang’ite.”
15Korende Omonene akamotebia, “Taibo! Onde bwensi oraite Kaini nigo araakanigwe egesiomba ara gatano na kabere.” Na Omonene akabekera Kaini ekemanyererio ng’a onde bwensi oramoumere tabaisa komoita. 16Erio Kaini akarua ase obosio bw’Omonene, akagenda, akamenya ase ense ya Nodi, moocha ya Edeni.
Ororeria rwa Kaini
17Kaini akaba na mokaye, na ere akaba morito, akaibora Enoku; na Kaini akaagacha omochie, akayoroka Enoku, erieta ri’omwana oye. 18Enoku akaibora Iradi, Iradi akaibora Metusaeli, Metusaeli akaibora Lameki. 19Lameki akanyuoma abakungu babere. Omokungu bwe ritang’ani nigo are korokwa Ada, na oyo o kabere Zila. 20Ada akaibora Yabeli; oyo nere sokoro bw’abaare komenya ase chiema na babwate ching’iti chigotugwa. 21Na momura omwabo nigo are korokwa Yubali; oyio nere sokoro bw’abaare kobugia amakano na ebiroria. 22Zila akaibora Tubali‐Kaini. Ere nigo arenge omoturi bw’ebinto bi’ebioma na ebie chitaai. Na omosubati omwabo nere Naama.
23Lameki agatebia abakungu baye,
“Ada na Zila, igwa eriogi riane,
inwe abakungu ba Lameki, tegerera ogokwana kwane,
igo ndaite omonto karanyate orogoma,
naisa koba omwana omomura karang’ake.
24Onye Kaini ogoakanerwa egesiomba ara gatano na kabere,
amaene, Lameki ere naakanerwe ara emerongo etano na ebere,
na gatano na kabere.”
Seti na Enosu
25Adamu akaba na mokaye naende na ere akaibora omwana omomura, akamoroka Seti, agateba, “Bono Nyasae ong’eire omwana onde ribaga ri’Abeli, oria Kaini aitete.” 26Seti nere akaibora omwana omomura, akamoroka Enosu. Erio agwo abanto bagachaka korangeria erieta ri’Omonene ase okomosasima.
Currently Selected:
OMOCHANKO 4: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
