KUMA 8
8
1Na Yeova amwĩa Mose, Lika kwa Valao, noimwĩa, Ũũ nĩw’o Yeova ũnũkwasya, Lekya andũ makwa mathĩ, manthũkũme. 2Na ethĩwa nũũlea ũmalekya mathi, sisya, ngakũna mĩvaka yaku yonthe na kũete syoa: #Kuma 7.14; 9.2. 3na ũsĩ ũkausũa syoa ki, ila ikambata ilike nyũmbanĩ yaku, o na nthĩnĩ wa kasũmba kaku ka kũkoma, na ũkomonĩ waku, na nthĩnĩ wa nyũmba ya athũkũmi maku, na ĩũlũ wa andũ maku, na nthĩnĩ wa maiko maku, na nthĩnĩ wa syĩndũ syaku ila iluĩlawa mũtu: #Sav 105.30. 4na ila syoa ikambata ĩũlũ waku, na ĩũlũ wa andũ maku, na ĩũlũ wa athũkũmi maku onthe. 5Na Yeova amwĩa Mose, Mwĩe Aluni, Tambũũkya kw’oko kwaku kwĩ na ndata yaku ĩũlũ wa mbũsĩ, na ĩũlũ wa tũlũsĩ, na ĩũlũ wa ndia, ũkambatĩthye syoa nthĩ ya Misili. #Kuma 7.19. 6Na Aluni atambũũkya kw’oko kwake ĩũlũ wa manzĩ ma Misili; na syoa syauma, syausũa nthĩ ya Misili. #Sav 78.45. 7Na eki ma syama nao meeka o ta ũu na mowe moo, na mambatĩthya syoa nthĩ ya Misili. #Kuma 7.11.
8Nĩvo ĩndĩ Valao wametie Mose na Aluni, na amea, Mwĩsũvei Yeova, ambetee syoa kwakwa, na kwa andũ makwa; nakwa ngalekya andũ mathi, mamũthembee Yeova. #Kuma 8.25–28; 9.28; 10.17,18. 9Na Mose amwĩa Valao, Ĩnenevye ĩndĩ vala nĩĩ: nĩ ĩvinda yĩva nĩũvoyea, na athũkũmi maku, na andũ maku, nĩ kana syoa syanangwe kuma kwaku na nyũmbanĩ syaku, na ikĩkala ũsĩnĩ wĩ w’oka? #Mot 21.7; 1 Asu 13.6; Meko 8.24. 10Na amwĩa, Nĩ ũnĩ. Nake amwĩa, Kwĩthĩwe kwĩanana na ndeto yaku; nĩ kana ũmanye vati ũngĩ ũtilyĩ Yeova Ngaĩ waitũ. #Kuma 9.14; Kũt 33.26; 2 Sam 7.22; Sav 86.8; Isa 46.9; Yel 10.6,7. 11Na syoa ikaũma kũla ũĩ, na kuma nyũmbanĩ syaku, na kuma athũkũminĩ maku na kuma andũnĩ maku; ikekala ũsĩni wĩ w’oka. 12Na Mose na Alunĩ maumaala vala ve Valao: na Mose amwikaĩla Yeova ũndũ wa syoa ila wamũetee Valao. 13Na Yeova eeka kwĩanana na ndeto ya Mose; na ila syoa syakw’a syathela nyũmbanĩ, na nza, na mĩũndanĩ. 14Na masyũmban’ya mavumbu: na nthĩ yanyunga naĩ. 15Ĩndĩ yĩla Valao wonie ũthũmũo, oomya ngoo yake, na ndaamethukĩĩsya; o tondũ Yeova ũneenete. #Kuma 8.32; 9.34; 1 Sam 6.6; Mũta 8.11.
Ũthĩn’yo wa ndaa
16Na Yeova amwĩa Mose, Mwĩe Aluni, Tambũũkya ndata yaku, noĩkũna kĩtoo kya nthĩ, kĩtw’ĩke ndaa nthĩ yonthe ya Misili. #Kuma 7.19. 17Na meeka ũu; na Aluni atambũũkya kw’oko kwake kwĩ na ndata yake, na akũna kĩtoo kya nthĩ, na kweethĩwa ndaa andũnĩ, na nyamũnĩ; kĩtoo kyonthe kya nthĩ kyatw’ĩka ndaa nthĩ yonthe ya Misili. #Sav 105.31. 18Na ala eki ma syama meeka o ta ũu na mowe moo maete ndaa, ĩndĩ matyaatonya: na kwaĩ ndaa andũnĩ, na nyamũnĩ. #Kuma 7.11. 19Nĩvo ĩndĩ eki ma syama mamwĩie Valao, Kĩĩ nĩ kyaa kya Ngai: na ngoo ya Valao yaĩ nyũmũ, na ndaamethũkĩĩsya; o tondũ Ngai ũneenete. #Kuma 7.13; 31.18; Sav 8.3; Lk 11.20.
Ũthĩn’yo wa ngi
20Na Yeova amwĩa Mose, Ũkĩla kĩoko tene ũũngame mbee wa Valao; sisya, nĩwũkĩte manzĩnĩ; naku ũmwĩe, Ũũ nĩw’o Yeova ũnũkwasya, Lekya andũ makwa mathi, manthũkũme. #Kuma 8.1; 9.13. 21Kana ethĩwa ndũũlekya andũ makwa mathi, sisya, ngakũetee ngi mbingĩ, na athũkũmi maku, na andũ maku, na iilika nyũmbanĩ syaku: na nyũmba sya Amisili ikausũa ngi mbingĩ, o na nthĩ ĩla matwĩe. 22Na mũthenya ũsu ngavathũkan’ya nthĩ ya Ngoseni ĩla andũ makwa matwĩe, kũtikethĩwe ngi isu mbingĩ vo; nĩ kana ũmanye ninyie Yeova katĩ wa nthĩ. #Kuma 7.17; 9.4,6,26; 10.23; 11.7. 23Na ngeekĩa kĩvathũkan’yo katĩ wa andũ makwa na andũ maku: na kyama kyu kĩkooneka ũnĩ. 24Na Yeova eeka ũu; na kwalika ngi mbingĩ nyũmbanĩ ya Valao, na nyũmbanĩ sya athũkũmi make: na nthĩnĩ wa nthĩ yonthe ya Misili nthĩ yathũkwa mũno kwondũ wa ngi isu mbingĩ. #Sav 78.45; 105.31.
25Na Valao eeta Mose na Aluni, na amea, Endai inyw’ĩ, mũthembee Ngai wenyu o nthĩ ĩno. 26#Mwa 43.32; 46.34; Kuma 3.12,18.Na Mose amwĩa, Kũtyaĩle twĩke ũu; nũndũ tũkathembea Yeova Ngai waitũ nthembo ĩla ĩthatasya Amisili: sisya, tũkathemba ĩla ĩthatasya Amisili mene, namo matitũkima na mavia? 27Tũkaenda weũnĩ kyalo kya mĩthenya ĩtatũ, na tũkĩthembea Yeova Ngai waitũ, o tondũ wĩtwĩaĩa. 28Na Valao amea, Ngamũlekya mũthi, mũthembee Yeova Ngai wenyu weũnĩ; ĩndĩ mũtikaende kũasa mũno: nenyu mboyeai. #Kuma 8.8. 29Na Mose asya, Sisya nĩnguma kũla ũĩ, na ngamwĩsũva Yeova nĩ kana ila ngi mbingĩ syume ũnĩ kwa Valao, na kwa athũkũmi make, na andũ make: no ĩndĩ, Valao ndakasyoke kũkengana ĩngĩ ũndũ wa kũlea kũlekya andũ mathi mathembee Yeova. #Kuma 8.15. 30Na Mose aumaala kwa Valao, na amwĩsũva Yeova. #Kuma 9.33; 10.18. 31Na Yeova eeka kwĩanana na ndeto ya Mose; na amũvetea Valao, na athũkũmi make, na andũ make ngi isu mbingĩ; o na kũtyaatiala kamwe. 32Na Valao oomya ngoo yake ĩvinda yĩu nayo, na ndaalekya andũ mathi. #Kuma 8.15.
Currently Selected:
KUMA 8: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
