MWAMBĨLĨLYO 11
11
Mwako mũtũlu wa mũnyoolo wa Mbaveli
1Na nthĩ yonthe yaĩ ya kĩthyomo kĩmwe na kĩneeno kĩmwe. 2Na kweethĩwa, yĩla maendete kyalo wumĩlonĩ wa syũa, moona ũiĩ nthĩ ya Sinali; na matũa vo. #Nda 1.2. 3Na meeana, Ũkai, tũmbe mavali, na tũimavĩvya vyũ. Na meethĩwa na mavali vandũ va mavia, na lami vandũ va ndaka. 4Na masya, Ũkai, twĩyakĩe, ndũa, na mwako mũtũlu wa mũnyoolo, ũla mũthya waw’o ũtonya ũvika ĩtunĩ, na twĩmanthĩe syĩtwa; tũikese kũnyaĩĩkw’a ĩũlũ wa nthĩ yonthe. #Kũt 1.28. 5Na Yeova atheea one ndũa na mwako ũsu mũtũlu, ũla ana ma andũ makĩte. #Mwa 18.21. 6Na Yeova asya, Sisya, mo nĩ ũko ũmwe, na onthe me na kĩthyomo kĩmwe; na ũũ nĩ ũndũ mambĩlĩlya kwĩka; namo yu maikasiĩĩwa ũndũ meũsũanĩa kwĩka. 7Ũkai, tũtheee, na tũithokoan’ya kĩthyomo kyoo vo, maikew’ane ũneeni. #Mwa 1.26; 3.22; Isa 6.8. 8Na ĩndĩ Yeova amanyaĩĩkya ĩũlũ wa nthĩ yonthe kuma vau: na maeka kwaka ndũa. #Lk 1.51. 9Kwondũ wa ũu syĩtwa yayo yeetwa Mbaveli; nũndũ nĩvo Yeova wathokoanĩsye kĩthyomo kya nthĩ yonthe: na kuma vau Yeova amanyaĩĩkya ĩũlũ wa nthĩ yonthe.
Mosyaanĩo ma Semu
(1 MAVINDA 1.24–27)
10Aa nĩo mosyaanĩo ma Semu. Semu aĩ wa myaka ĩana, na asyaa Alivakasati myaka ĩlĩ ĩtina wa kĩla kĩw’ũ kingĩ: #1 Mav 1.17–27. 11na Semu ekala ĩtina wa kũsyaa Alivakasati myaka maana atano, o akĩsyaa ana na eĩtu.
12Na Alivakasati ekala myaka mĩongo ĩtatũ na ĩtano, na asyaa Siela: 13na Alivakasati ekala ĩtina wa kũsyaa Siela myaka maana ana na ĩtatũ, o akĩsyaa ana na eĩtu.
14Na Siela ekala myaka mĩongo ĩtatũ, na asyaa Eveli: 15na Siela ekala ĩtina wa kũsyaa Eveli myaka maana ana na ĩtatũ, o akĩsyaa ana na eĩtu.
16Na Eveli ekala myaka mĩongo ĩtatũ na ĩna, na asyaa Veleki: 17na Eveli ekala ĩtina wa kũsyaa Veleki myaka maana ana na mĩongo ĩtatũ, o akĩsyaa ana na eĩtu.
18Na Veleki ekala myaka mĩongo ĩtatũ, na asyaa Leu: 19na Veleki ekala ĩtina wa kũsyaa Leu myaka maana elĩ na kenda, o akĩsyaa ana na eĩtu.
20Na Leu ekala myaka mĩongo ĩtatũ na ĩlĩ, na asyaa Seluki: 21na Leu ekala ĩtina wa kũsyaa Seluki myaka maana elĩ na mũonza, o akĩsyaa ana na eĩtu.
22Na Seluki ekala myaka mĩongo ĩtatũ, na asyaa Naoli: 23na Seluki ekala ĩtina wa kũsyaa Naolĩ myaka maana elĩ, o akĩsyaa ana na eĩtu.
24Na Naoli ekala myaka mĩongo ĩlĩ na kenda, na asyaa Tela: 25na Naoli ekala ĩtina wa kũsyaa Tela myaka ĩana na ĩkũmi na kenda, o akĩsyaa ana na eĩtu.
26Na Tela ekala myaka mĩongo mũonza, na asyaa Avalamu, na Naoli, na Aalani. #Yos 24.2.
Mosyaanĩo ma Tela
27Na ĩndĩ aa nĩo mosyaanĩo ma Tela. Tela asyaa Avalamu, na Naoli, na Aalani; na Aalani asyaa Loto. 28Na Aalani nĩwakw’ĩĩe nthĩ ĩla wasyaĩwe nthĩ ya Ulu wa Akalitei, ĩthe wake Tela atanakw’a.
29Na Avalamu na Naoli meetwaĩa aka: syĩtwa ya mũka wa Avalamu eetawa Salai; na syĩtwa ya mũka wa Naoli, eetawa Milika, mwĩĩtu wa Aalani, ĩthe wa Milika, na ĩthe wa Isika. #Mwa 17.15; 22.20. 30Na Salai aĩ ngũngũ; ndaĩ mwana. 31Na Tela oosa Avalamu mwana wake, na Loto mwana wa Aalani, mwĩsũkũũe, na Salai mũka wa mwana, o mũka wa mwana wake Avalamu; na mathi nao kuma Ulu wa Akalitei, kũlika nthĩ ya Kanaani; na mavika Aalani, na matũa vo. #Mwa 15.7; Nee 9.7; Meko 7.4. 32Na matukũ ma Tela maĩ myaka maana elĩ na ĩtano: na Tela akw’ĩa Aalani.
Currently Selected:
MWAMBĨLĨLYO 11: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
