MWAMBĨLĨLYO 12
12
Kwĩtwa kwa Avalamu nĩ Ngai
1Na ĩndĩ Yeova amwĩa Avalamu, Uma, we, nthĩ yaku, na kwa ũko waku, na nyũmba ya au, kũvika nthĩ ĩla nĩkwon’ya: #Meko 7.3; Aevl 11.8. 2na ngakũtw’ĩkĩthya mbaĩ nene, na ngakũathima, na kũnenevya syĩtwa yaku; naku wĩthĩwe ũathimo: #Mwa 18.18; 1 Asu 3.8. 3nakwa ngamaathima ala makũathimaa, na ũla ũkũumanĩaa ngamũumanĩa: na nthĩnĩ waku, we, mĩvĩa yonthe ya nthĩ ĩkaathimwa. #Mwa 18.18; 22.18; 26.4; 27.29; 28.14. 4Na ĩndĩ Avalamu athi, o tondũ Yeova wamwĩie; na Loto athi nake: na Avalamu aĩ wa myaka mĩongo mũonza na ĩtano yĩla waumie Aalani. #Kuma 23.22; Mot 24.9; Sav 72.17; Meko 3.25; Aka 3.8. 5Na Avalamu oosa Salai mũka wake, na Loto mwana wa mwana‐a‐inyia, na syĩndũ syoo syonthe ila moombanĩtye, na andũ ala masyaĩwe Aalani; na mauma nĩ kana maende nthĩ ya Kanaani; na mavota nthĩ ya Kanaani. #Mwa 11.31. 6Na Avalamu avĩtĩla ĩ nthĩ avika vandũ vetawa Sekemu, kũvika mũtĩ wa mwaloni wĩ Mole. Na ĩvinda yĩu Mũkanaani atũaa nthĩ ĩsu. #Kũt 11.30; Asi 7.1. 7Na Yeova aumĩlĩla Avalamu, na asya, Nganenga ũsyao waku nthĩ ĩno: na vau aakĩa Yeova, ũla wamumĩlĩle, kĩthembeo. #Mwa 13.15; 17.8; Kuma 33.1; Kũt 34.4. 8Na auma vau avika kĩĩmanĩ ngalĩ ya wumĩlonĩ wa syũa ya Mbethi‐eli, na amba ĩeema yake, Mbethi‐eli yĩ ngalĩ ya ũthũĩlonĩ wa syũa, na Ai yĩ ngalĩ ya wumĩlonĩ wa syũa: na vau aakĩa Yeova kĩthembeo, na eekaĩla syĩtwa ya Yeova. #Aevl 11.9. 9Na Avalamu athi kyalo, aendeea elekele ngalĩ ya Ĩtheo.
Avalamu e nthĩ ya Misili
10Na kwaĩ yũa nthĩ ĩsu: na Avalamu atheea Misili ekale ũeni kw’o: nũndũ yũa yaĩ ĩnene nthĩ ĩsu. 11Na kweethĩwa, yĩla wathengeeie kũlika Misili, amwĩa Salai mũka wake, Na yu ĩndĩ, nĩnĩsĩ wĩ mũndũ mũka mwanake mũno kwa kũsiw’a: 12na kũkeethĩwa, yĩla Amisili mekwona, makasya, Ũũ nĩ mũka wake: na makambũaa, ĩndĩ we makakũeka wĩ thayũ. #Mwa 20.1–18. 13Nĩngũkwĩsũva, asya wĩ mwĩĩtũ‐a‐ia; nĩ kana kwĩthĩwe kwĩ kũseo kwakwa kwondũ waku, na kyuu kyakwa kĩkale thayũ kwondũ waku. 14Na kweethĩwa, Avalamu avika Misili, Amisili moona mũka wake kana nĩ mwanake mũno. 15Na anene me mbee ũsumbĩnĩ ma Valao mamwona, na mamũkatha kwa Valao: na mũndũ mũka atwawa nyũmbanĩ ya Valao. #Est 2.16. 16Na amwĩka Avalamu nesa kwondũ wake: na aĩ na malondu, na ng’ombe, na mang’oi maũme, na athũkũmi aũme na eĩtu, na mang’oi maka, na ngamĩle. 17Na Yeova athĩn’ya Valao na nyũmba yake mothĩn’yo manene kwondũ wa Salai, mũka wa Avalamu. #Sav 105.14. 18Na Valao amwĩta Avalamu, na amũkũlya, Ũu ũmbĩkĩte nata? Nĩkĩ ndwaandavya kana nĩ kĩveti kyaku? 19Nĩkĩ waisye, Nĩ mwĩĩtu‐a‐ia, ũndũ nĩmũtwaie ethĩwe mũka wakwa? Yu ĩndĩ sisya mũka waku, mwose, ũkwate nzĩa ũthi. 20Na Valao eeaĩa andũ ũndũ wake: nao mamumaasya nzĩanĩ, na mũka wake, na syonthe ila waĩ nasyo.
Currently Selected:
MWAMBĨLĨLYO 12: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
