MWAMBĨLĨLYO 13
13
Avalamu na Loto makĩtaanĩsya
1Na Avalamu ambata kuma Misili, we, na mũka wake, na syonthe ila waĩ nasyo, na Loto vamwe nake, kũvika ngalĩ ya Ĩtheo. #Mwa 12.9. 2Na Avalamu aĩ mũthwii mũno na indo, na vetha, na thaavu. #Mwa 24.35; Sav 112.3; Nth 10.22. 3Na aenda kyalo kuma ngalĩ ya Ĩtheo kũvika Mbethi‐eli, vandũ vala ĩeema yake yaĩ mbee, katĩ wa Mbethi‐eli na Ai, 4kũvika vandũ va kĩthembeo, kĩla waseũvĩtye vo mbee: na vau Avalamu eekaĩla syĩtwa ya Yeova. #Mwa 12.8. 5Nake Loto, ũla waendanasya vamwe na Avalamu, aĩ na ndĩthya sya mbũi na malondu, na sya ng’ombe, na maeema. 6Na nthĩ ndĩaatonya kũmeanĩa, mekalae vamwe: nũndũ ũthwii woo waĩ mwingĩ, ũndũ mataatonya kwĩkala vamwe. #Mwa 36.7. 7Na kwaĩ iteta katĩ wa aĩthĩ ma indo sya Avalamu na aĩthi ma indo sya Loto: na ĩvinda yĩu Mũkanaani na Mũvelisi matũaa nthĩ ĩsu. #Mwa 12.6; 26.20. 8Na Avalamu amwĩa Loto, Nĩngũkwĩsũva, kũikethĩwe iteta katĩ wakwa naku, na katĩ wa aĩthi makwa na aĩthi maku; nũndũ twĩ ana‐a‐asa. #Sav 133.1; Meko 7.26; 1 Ako 6.7. 9Nthĩ yonthe ndĩ mbee waku? Nĩngũkwĩsũva, ũtaanĩsye nakwa: wenda kũthi ngalĩ ya kw’oko kwa aka, nakwa ngathi ngalĩ ya kw’oko kwa aũme; kana wathi ngalĩ ya kw’oko kwa aũme, nakwa ngathi ngalĩ ya kw’oko kwa aka. #Mwa 20.15; 34.10; 47.6. 10Na Loto ookĩlya metho, oona Ũiĩ wa Yolotani w’onthe, kana wĩ na manzĩ ngalĩ syonthe, Yeova atanamba kwananga Sotomo na Ngomola, o ta ũla mũũnda wa Yeova, ta nthĩ ya Misili, ũendete Nzoali. #Mwa 2.8; 19.17,24,25,28; Kũt 34.3; Sav 107.34. 11Na ĩndĩ Loto eenyuvĩa Ũiĩ w’onthe wa Yolotani; na Loto athi kyalo ngalĩ ya wumĩlonĩ wa syũa: na mataanĩsya ene kwa ene. 12Avalamu ekala nthĩ ya Kanaani na Loto ekala ndũanĩ sya ũla Ũiĩ, na athamĩĩsya ĩeema yake kũvika Sotomo. 13Na ĩndĩ andũ ma Sotomo maĩ athũku na athe mũno kwa Yeova. #Mwa 18.20; Esek 16.49; 2 Vet 2.7,8.
14Na Yeova amwĩa Avalamu, ĩtina wa kũtaanĩsya na Loto, Yu ũkĩlya metho maku, ũsisye kuma vandũ vala ũĩ, ngalĩ ya ĩũlũ na ngalĩ ya ĩtheo na wumĩlonĩ wa syũa na ũthũĩlonĩ wa syũa: #Mwa 28.14. 15nũndũ nthĩ yonthe ĩla ũkwona, ngakũnenga we, na ũsyao waku tene na tene. #Mwa 12.7; 2 Mav 20.7; Meko 7.5. 16Na ũsyao waku ngootw’ĩkĩthya ta kĩtoo kya nthĩ: nũndũ ethĩwa mũndũ nũtonya kũtala kĩtoo kya nthĩ, nĩvo ĩndĩ ũsyao waku ũtonya kũtalĩka. #Mwa 22.17; 28.14; 32.12; Mot 23.10; Aevl 11.12. 17Ukĩla, ũtambũke katĩ wa nthĩ ũasanĩ wayo na ũthanthaunĩ wayo, nũndũ ngakũnenga yo. 18Na Avalamu athamya ĩeema yake, ooka ekala mĩtĩnĩ ya myaloni yĩ Mamile, ĩla yĩ Evilonĩ, na vau aakĩa Yeova kĩthembeo. #Mwa 35.27.
Currently Selected:
MWAMBĨLĨLYO 13: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
