MWAMBĨLĨLYO 18
18
Kwathanwa kwa kũsyawa kwa Isaka
1Na Yeova amumĩlĩla mĩtĩnĩ ya myaloni yĩ Mamile, ekalĩte mũomonĩ wa ĩeema mũthenya kwavyũva; #Mwa 13.18. 2na ookĩlya metho na oona, na, sisya andũ atatũ nĩmaũngamĩte mbee wake; na amona, asemba kuma mũomonĩ wa ĩeema amathaũe, na eekunamya kũvika nthĩ, #Mwa 19.1; Aevl 13.2. 3na asya, Mwĩaĩĩ wakwa, yu ethĩwa nĩnonete ũseo mbee waku, nĩngũkwĩsũva, ndũkavĩte kuma kwa mũthũkũmi waku: 4manzĩ manini maetwe yu, na mũithambya maũũ, na kwĩthũmũsya ĩtina wa kĩtĩ: #Mwa 19.2; 43.24; Lk 7.44; Yoa 13.14; 1 Tim 5.10. 5nakwa ngaete lĩu mũnini, mũvuũkye ngoo; ĩtina wa ũu mũkavĩta: nũndũ mwamũkĩa mũthũkũmi wenyu. Na masya, Ĩka, o tondũ wasya. 6Na Avalaamu aenda mĩtũkĩ ĩeemanĩ vala ve Sala, na amwĩa, Seũvya mĩtũkĩ mũtu mũseo wa ithimi itatũ, wũmbe, ũseũvye tũmũtũ. 7Na Avalaamu asemba ndĩthyanĩ, aete kasaũ kololo na kaseo, anenga mũthũkũmi; nake akalaata kũthĩnza. 8Na oosa mauta, na ĩia, na kasaũ kala wathĩnza, na aia mbee woo; na aũngama ũtee woo ĩtina wa kĩtĩ, nao maya.
9Na mamũkũlya, Aĩva Sala mũka waku? Nake asũngĩa, Sisya, e ĩeemanĩ. 10Nake amwĩa, Nĩ w’o ngakũsyokea kyathĩ kyavĩka; na, sisya, Sala mũka waku akeethĩwa na mwana. Na Sala eew’a e mũomonĩ wa ĩeema, yĩla yaĩ ĩtina wa ũsu. #Mwa 21.2; 2 Asu 4.16; Alo 9.9. 11Na ĩndĩ Avalaamu na Sala maĩ akũu, na ma myaka mingĩ; waĩ ũnaeka kwĩthĩwa na Sala mwĩkalĩle wa aka. #Mwa 17.17; Alo 4.19; Aevl 11.11,12. 12Na Sala atheka ngoonĩ yake, akĩkũlya, Nĩ mũtumĩu ngeethĩwa na mũyo, mwĩaĩi wakwa nake e mũtumĩu? #Lk 1.18; 1 Vet 3.6. 13Na Yeova akũlya Avalaamu, Sala atheka nĩkĩ, akĩkũlya, Nĩ w’o ngasyaa mwana, nĩ mũkũu? 14Kwĩ ũndũ ũtatonyeka kwa Yeova? Ĩvinda yĩtw’ĩtwe ngakũsyokea, kyathĩ kyavika, na Sala akeethĩwa na mwana. #Yovu 42.2; Yel 32.17; Nzek 8.6; Mt 19.26; Lk 1.37; Alo 4.21; 9.9. 15Na ĩndĩ Sala akaĩa, akyasya, Ndinatheka; nũndũ aĩ na w’ĩa. Nake asya, Aiee; ĩndĩ nĩwatheka.
Avalaamu aivoyea Sotomo
16Na ala andũ mauma vau, masisya ngalĩ ya Sotomo: na Avalaamu aendan’ya nao amaumaaĩtye. 17Na Yeova eekũlya, Nĩmũvithe Avalaamu ũndũ ngwĩka: #Sav 25.14; Amo 3.7; Yoa 15.15. 18nũndũ vate ndĩi Avalaamu akeethĩwa mbaĩ nene yĩ vinya, na mbaĩ syonthe sya nthĩ ikaathimwa nthĩnĩ wake? #Mwa 12.3. 19Nũndũ nĩnĩmwĩsĩ, nĩ kana eaĩae syana syake na andũ make ĩtina wake, makwate nzĩa ya Yeova, mekae ũlũngalu na ũsili wa katĩ; nĩ kana Yeova amũetee Avalaamu ũndũ ũla waneenie ũndũ wake. #Kũt 4.9; Yos 24.15. 20Na Yeova asya, Nũndũ kĩĩo kya Sotomo na Ngomola nĩ kĩnene, na nũndũ naĩ yoo yongelekete mũno: #Mwa 4.10; 19.13; Yak 5.4. 21nĩngũtheea yu, none kana nĩw’o mekĩte o ũndũ kĩĩo kyayo kĩmbikĩe; na ethĩwa ti w’o ngamanya. #Mwa 11.5; Kuma 3.8.
22Na ala andũ meethyũũa kuma vau, mathi melekele Sotomo: ĩndĩ Avalaamu no waũngyĩ mbee wa Yeova. #Mwa 19.1; Sav 106.23. 23Na Avalaamu athengeea, na akũlya, Ũkamina alũngalu vamwe na ala athũku? #Mwa 20.4; Mot 16.22; 2 Sam 24.17. 24Nokwĩthĩwa kwĩ alũngalu mĩongo ĩtano ndũanĩ: ũkamina o na ndũeka a vandũ kwondũ wa alũngalu mĩongo ĩtano ala me vo nthĩnĩ? 25Ũu wĩthĩwe kũasa naku kwĩka ta ũu, kũaa alũngalu vamwe na ala athũku, nĩ kana alũngalu methĩwe ta athũku; ũu wĩthĩwe kũasa naku: Mũsili wa nthĩ yonthe ndakeka ũlũngalu? #Yovu 8.3,20; 34.10; Sav 58.11; Alo 3.5,6. 26Na Yeova asũngĩa, Noona nthĩnĩ wa Sotomo alũngalu mĩongo ĩtano ndũanĩ, nĩw’o nĩeka vandu vonthe kwondũ woo. #Yel 5.1; Esek 22.30; Mt 24.22. 27Na Avalaamu asũngĩa asya, Na ĩndĩ sisya, nĩnakwata kũneena na Mwĩaĩi, nakwa nĩ o kĩtoo na mũu: #Lk 18.1. 28nokwĩthĩwa maoleka atano kwa ala alũngalu mĩongo ĩtano: ũkaananga ndũa yonthe kwondũ wa ala atano aoleku? Nake amwĩa, Ndikamyananga, noona vo mĩongo ĩna na atano. 29Na aneena nake ĩngĩ, na asya, Nokwĩthĩwa vakoneka vo mĩongo ĩna. Nake asũngĩa, Ndikeka ũu kwondũ wa asu mĩongo ĩna. 30Nake asya, Ame Mwĩaĩi ndakathate, nakwa nĩngũneena: nokwĩthĩwa vakoneka vo mĩongo ĩtatũ. Na asya, Ndikeka ũu, noona vo mĩongo ĩtatũ. 31Na amwĩa, Sisya yu, nĩnakwata kũneena na Mwĩaĩi: nokwĩthĩwa vakoneka vo mĩongo ĩlĩ. Nake asũngĩa, Ndikamyananga kwondũ wa asu mĩongo ĩlĩ. 32Nake asya, Ame Mwĩaĩi ndakathate, nakwa nĩngũneena no ĩvinda yĩĩ yĩmwe yoka: nokwĩthĩwa ĩkũmi makoneka vo. Nake asũngĩa, Ndikamyananga kwondũ wa asu ĩkũmi. #Asi 6.39. 33Na Yeova athi na nzĩa yake, mamina kũneenan’ya e na Avalaamu: na Avalaamu asyoka vandũ vake.
Currently Selected:
MWAMBĨLĨLYO 18: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
