MWAMBĨLĨLYO 28
28
1Na Isaka amwĩta Yakovo, na amũathima, na amwĩaĩa, na amwĩa, Ndũkaatwae mũka wa eĩtu ma Kanaani. #Mwa 24.3–6. 2Ũkĩla, ũende Vatani‐alamu, nyũmbanĩ ya Mbethueli ĩthe wa mwenyu; na ũketwaĩe mũka kuma kũu eĩtunĩ ma Lavani mwana‐a‐inyia wa mwenyu. #Mwa 25.20. 3Na Ngai Mwene Vinya W’onthe akũathime, na akwongeleele, na akwingĩvye, wĩthĩwe wĩ nguthu sya ngo sya andũ; #Mwa 17.1,6. 4na akũnenge ũathimo wa Avalaamu, we, na ũsyao waku vamwe naku; nĩ kana ũtiĩwe nthĩ ya kwĩkala ũeni kwaku, ĩla Ngai wamũnengie Avalaamu. #Mwa 12.2,3; 17.8. 5Na Isaka amwĩa Yakovo athi: nake aenda Vatani‐alamu kwa Lavani, mwana wa Mbethueli, Mũsilia, mwana‐a‐ĩthe wa Leveka, inyia wa Yakovo na Esau. #Osea 12.12.
Esau aitwaa mũka ũngĩ
6Na ĩndĩ Esau oona kana Isaka nĩwamũathima Yakovo na amũtũma Vatani‐alamu, akatwae mũka kuma kũu; nake akĩmũathima, amwĩaĩa, akĩmwĩa, Ndũkaatwae mũka wa eĩtu ma Kanaani; 7na kana Yakovo nĩwew’a ĩthe na nyinyia, nake athi Vatani‐alamu: 8na Esau oona kana Isaka ĩthe wake ndaaendeew’a nĩ eĩtu ma Kanaani; #Mwa 26.35. 9na ĩndĩ Esau athi kwa Isumaeli, atwaa Maalathi mwĩĩtu wa Isumaeli mwana wa Avalaamu, mwĩĩtu‐a‐inyia wa Nevaiothi, ethĩwe mũka wake vamwe na aka ala waĩ nao. #Mwa 25.13; 36.3.
Ndoto ya Yakovo e Mbethi‐eli
10Na Yakovo auma Mbeeli‐sieva, na athi elekele Aalani. #Mwa 26.33; 27.43. 11Na avika vandũ vamwe, na ekala vo ũtukũ mũima, nũndũ syũa yaĩ yĩnathũa; na oosa ĩvia yĩmwe ya vandũ vau, aia ungu wa mũtwe, na akoma o vo. 12Na aota; na, sisya, mbasya ĩũngamĩtw’e ĩũlũ wa nthĩ, na mũthya wayo wavikĩte ĩtunĩ; na, sisya, alaĩka ma Ngai makyambata na makĩtheea nayo. #Yovu 33.15,16; Yoa 1.51. 13Na, sisya, Yeova aũngamĩte ĩũlangũ wayo, na amwĩa, Ninyie Yeova, Ngai wa Avalaamu ĩthe waku, na Ngai wa Isaka: nthĩ ĩla ũkomete, ngakũnenga we, na ũsyao waku; #Mwa 13.15; 26.24; 35.1; 48.3. 14na ũsyao waku ũkeethĩwa ta kĩtoo kya nthĩ, naku ũkanyaĩĩka ngalĩ ya ũthũĩlonĩ wa syũa, na wumĩlonĩ wa syũa, na ngalĩ ya ĩũlũ, na ngalĩ ya ĩtheo: na nthĩnĩ wakũ, we, na ũsyaonĩ waku mĩvĩa yonthe ya nthĩ ĩkaathimwa. #Mwa 12.3; 13.16. 15Na, sisya, nyie nĩ vamwe naku, na ngakũsũvĩa o kũla wĩendaa, na ngakũtũnga ĩngĩ nthĩ ĩno; nũndũ ndikakũtia, mũvaka neeka ũla nakũtavisye. #Mwa 26.24; 31.3; 35.6; Mot 23.19. 16Na Yakovo aamũka kuma toonĩ, na asya, Nĩ w’o, Yeova nĩ voĩ vaa; nakwa ndyĩĩsĩ. 17Na akĩa, na asya, Vandũ va ũtĩsya nĩ vaa! Ti vangĩ vaa ate o nyũmba ya Ngai, na ĩno nĩ mbingĩlo ya ĩtunĩ.
18Na Yakovo ookĩla kĩoko tene, na oosa ĩvia yĩla waiĩte ungu wa mũtwe wake, ayĩũngamya ta kĩtuĩ, na etĩkĩsya mauta mũthyanĩ ĩũlũ. #Mwa 31.13,45; 35.14; 1 Sam 7.12. 19Na eeta syĩtwa ya vandũ vau, Mbethi‐eli: ĩndĩ mbee syĩtwa ya ndũa ĩsu yeetawa Lusu. #Mwa 35.7; Asi 1.23. 20Na Yakovo eevĩta, akyasya, Ethĩwa Ngai akeethĩwa vamwe nakwa, na akĩnzũvĩa nzĩanĩ ĩno ĩla nĩendele, na kũnenga lĩu nĩye, na ngũa sya kwĩkĩa, #Mwa 31.13. 21nĩ kana nĩsyoke ĩngĩ na mũuo nyũmbanĩ ya nau, nĩvo ĩndĩ Yeova ũkethĩwa Ngai wakwa, #Kũt 26.17; Asi 11.31; 2 Sam 15.8. 22nayo ĩvia yĩĩ yĩla naũngamya ta kĩtuĩ, yĩkeethĩwa nyũmba ya Ngai: na ndikatĩa ũkũnengae, we, kĩlungu kya ĩkũmi kya kyonthe kĩla ũkanenga. #Mwa 14.20; 35.7,14; Ali 27.30.
Currently Selected:
MWAMBĨLĨLYO 28: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
