MWAMBĨLĨLYO 32
32
Yakovo ayĩyũmban’ya kũkomana na Esau
1Na Yakovo eeyĩendea, na alaĩka ma Ngai makomana nake. 2Na Yakovo amona asya, Nguthu ya Ngai nĩ ĩno: na aveta vandũ vau syĩtwa yavo Maanaimu. #Yos 5.14; Sav 103.21; Lk 2.13.
3Na Yakovo atũma atũmwa mbee wake kwa Esau mwana‐a‐inyia kũvika nthĩ ya Seili, ũiĩnĩ wa Etomu. #Mwa 36.8,9; Kũt 2.4,5. 4Na ameaĩa, akĩmea, Mũtavyei mwĩaĩi wakwa Esau ũũ: Mũthũkũmi waku Yakovo easya atĩĩ, Nĩnekalĩte nĩ mũeni kwa Lavani, na nĩtwĩe kw’o kũvika o na yu: 5nakwa nĩ na ng’ombe, na mang’oi, na ndĩthya sya mbũi na malondu na athũkũmi aũme na eĩtu: nakwa nĩnatũmana nĩmũtavye mwĩaĩi wakwa, nĩ kana none ũseo methonĩ maku. #Mwa 33.8,15. 6Na atũmwa mamũsyokea Yakovo, makĩmwĩa, Nĩtũvikie kwa mwana‐a‐mwenyu Esau, nake nĩwũkĩte akũthaũe, e na andũ maana ana vamwe nake. #Mwa 33.1. 7Nĩvo Yakovo wakĩie mũno na aũũya: na aan’ya nguthu ilĩ andũ ala maĩ nake, na ndĩthya sya mbũi na malondu, na sya ng’ombe, na ngamĩle; 8na asya, Ethĩwa Esau akooka kwa nguthu ya mbee, na kũmĩkũna, nguthu ĩla yĩtiala ĩkavonoka. 9Na Yakovo asya, Ame Ngai wa asa wakwa Avalaamu, na Ngai wa asa wakwa Isaka, ame Yeova, ũla wambĩie, Syoka nthĩ yaku, na kwa ũko waku, nakwa ngakwĩka nesa: #Mwa 28.13; 31.3. 10ndyaĩlwe nyie nĩ kanini mbee ka moseo maku me wendo, na w’o w’onthe ũla wamwonisye mũthũkũmi waku; nĩkwĩthĩwa nĩnaingie Yolotani ũũ na ndata yakwa; na yu nĩnĩtw’ĩkĩte nguthu ilĩ. #2 Sam 7.18. 11Nĩngũkwĩsũva, ndangĩĩa kuma kw’okonĩ kwa mwana‐a‐ia, kw’okonĩ kwa Esau: nũndũ nyie nĩngũmũkĩa, ndakese kũka na kũngũna, o na inyia vamwe na syana. #Nth 18.19. 12Naku waisye, Nditĩa kũkwĩka nesa, na kũtw’ĩkĩthya ũsyao waku ta kĩthangathĩ kya ũkanga, kĩla kĩtatalĩka nĩ kwingĩva. #Mwa 28.13–15.
13Na akoma vo ũtukũ ũsu, na kuma katĩ wa ila waĩ nasyo oosa mũthĩnzĩo kwondũ wa Esau, mwana‐a‐inyia: #Mwa 43.11. 14mbũi nga maana elĩ na nthenge mĩongo ĩlĩ, na malondu maka maana elĩ na ndũũme mĩongo ĩlĩ, 15na ngamĩle ikwongya mĩongo ĩtatũ na tũtena twasyo, na ng’ombe nga mĩongo ĩna na nzaũ ĩkũmi, na mang’oi maka mĩongo ĩlĩ na tũtena twamo ĩkũmi. 16Na anengane mokonĩ ma athũkũmi make, kĩla ĩĩthya yĩ yoka, na amea athũkũmi make, Ingai mbee wakwa, na tiai ũthei katĩ wa ĩĩthya na ĩĩthya. 17Na amwĩaĩa wa mbee, akĩmwĩa, Mwana‐a‐ia Esau akomana naku, na akũkũlya, akyasya, Wĩ waũ? Na wĩthi kũ? Na nĩ syaũ ii syĩ mbee wakũ? 18Nĩvo wĩasya, Nĩ sya mũthũkũmi waku Yakovo: nĩsyo mũthĩnzĩo waetwe kwa mwĩaĩi wakwa Esau: na, sisya, nake mwene e ĩtina waitũ. 19Na eaĩa wa kelĩ nake, na wa katatũ, na onthe ala maatĩĩe maĩthya, akĩmea, Mũkaneene na Esau o ta ũu, mwoonana nake; 20na mũkasya, Na ĩngĩ, sisya, mũthũkũmi waku Yakovo e ĩtina waitũ. Nũndũ nĩwaisye, Ngamũvoovya na mũthĩnzĩo ũla ũendete mbee wakwa, na ĩtina ngoona ũthyũ wake; nokwĩthĩwa embĩtĩkĩla nyie. 21Na ĩndĩ ũla mũthĩnzĩo wainga mbee wake: nake mwene akoma ũtukũ ũsu vamwe na nguthu.
Mũndũ akĩthian’ya na Yakovo Venieli
22Na ookĩla ũtukũ ũsu, na oosa aka make elĩ, na athũkũmi make elĩ, eĩtu, na ana make ĩkũmi na ũmwe, ainga ĩsyũko ya Yavoki. 23Na amatwaa, amaingya ũsĩ, na aingya ila waĩ nasyo. 24Na Yakovo atiwa e weka; na kweethĩwa mũndũ akĩthĩan’ya nake mũvaka kũikya. 25Na oona ndamũtonya, amũkiita kĩna kya waswa; na kĩna kya waswa wa Yakovo kyakitũka, akĩthĩan’ya nake. 26Nake amwĩa, Ndeka nĩthi, nũndũ nĩkũũkya. Na asũngĩa, Ndikũeka, ũtangathimĩte. #Lk 18.1. 27Nake amũkũlya, Syĩtwa yaku nata? Na asũngĩa, Yakovo. 28Nake amwĩa, Syĩtwa yaku ndũketwa Yakovo ĩngĩ, ĩndĩ Isilaeli: nũndũ nĩwakĩlan’ya vinya na Ngai na ĩngĩ na andũ, na wakĩlya vinya. #Mwa 35.10; Osea 12.3,4. 29Na Yakovo amũkũlya na asya, Nĩngũũvoya, ndavya syĩtwa yaku. Nake asũngĩa, Wĩngũlya syĩtwa yakwa nĩkĩ? Na amũathimĩa o vau. #Asi 13.18. 30Na Yakovo aveta syĩtwa ya vandũ vau Venieli: asya, Nũndũ nĩnamwona Ngai ũthyũ kwa ũthyũ, na nĩnatangĩĩwa thayũ wakwa. #Mwa 16.13; Kuma 24.10,11; Asi 6.22; 13.22; Isa 6.5. 31Na syũa yamumĩa akĩinga Venueli, nake nĩwathuaa waswa. 32Kwondũ wa ũu ana ma Isilaeli matiĩsaa kaliilii ka nthũnũ kala ke kĩnanĩ kya waswa, kũvika mũnthĩ ũũ: nũndũ nĩwakiitie kĩna kya waswa wa Yakovo vala ve kaliilii ka nthũnũ.
Currently Selected:
MWAMBĨLĨLYO 32: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
