MWAMBĨLĨLYO 33
33
Kwĩw’ana kwa Yakovo na Esau
1Na Yakovo ookĩlya metho, na oona, na, sisya, Esau okĩte, na andũ maana ana vamwe nake. Na amaaĩa syana Lea, na Lakeli, na ala athũkũmi elĩ eĩtu. #Mwa 32.6. 2Na ekalya ala athũkũmi eĩtu, na syana syoo mbee, na Lea na syana syake ĩtina woo, na Lakeli na Yosevu ĩtina. 3Nake mwene ainga mbee woo, na eekunamya nthĩ kũndũ mũonza, mũvaka athengeea mwana‐a‐inyia. #Mwa 18.2; 42.6. 4Na Esau asemba kũmũthaũa, na amwĩvĩtĩĩsya, na amũvalũkĩla ngingo, amũmumunya: na maĩanĩa. #Mwa 32.28; 45.14. 5Na ĩndĩ ookĩlya metho, oona aka na syana; na akũlya, Naaũ aa me naku? Na asũngĩa, Nĩ syana ila Ngai wanengie mũthũkũmi waku kwa ĩnee. #Mwa 48.9; Sav 127.3; Isa 8.18. 6Na ĩndĩ athũkũmi eĩtu, mathengeea, mo na syana syoo, nao meekunamya. 7Na Lea nake na syana syake mathengeea, na meekunamya: na ĩtina Yosevu athengeea e na Lakeli, na meekunamya. 8Na akũlya, Wĩasya ata na nguthu ino nene ĩla nakomana nayo? Na asũngĩa, Nĩ kana none ĩnee methonĩ ma mwĩaĩi wakwa. #Mwa 32.5,16. 9Na Esau amwĩa, Nĩnĩanĩwe, mwana‐a‐ia; syĩthĩwe syaku ila wĩ nasyo. 10Na Yakovo asya, Aiee, nĩngũkwĩsũva, yu ĩndĩ ethĩwa nĩnoona ĩnee methonĩ maku, osa mũthĩnzĩo wakwa kw’okonĩ kwakwa; nĩkwĩthĩwa nĩnoona ũthyũ waku, o ta kwona ũthyũ wa Ngai, naku nĩwendeew’e ninyie. #Mwa 43.3; 2 Sam 14.24. 11Nĩngũkwĩsũva, osa mũthĩnzĩo wakwa ũla ũetewe; nĩkwĩthĩwa Ngai nũmbĩw’ĩĩte ĩnee, nũndũ nĩnĩanĩwe. Na amũthetheesya, na awosa. #1 Sam 25.27; 2 Asu 5.15,23. 12Na asya, Tũkwate kyalo, tũthi, nakwa nĩngũendaa mbee waku. 13Na amwĩa, Mwĩaĩi wakwa nĩwĩsĩ kana syana nĩ masanga, na ndĩthya sya mbũi na malondũ na sya ng’ombe ila nĩ nasyo nikwongya: na ikakalaatwa mũthenya ũmwe, ndĩthya syonthe sya mbũi na malondu no ũkw’a. 14Nĩngũkwĩsũva, mwĩaĩi wakwa nainge mbee wa mũthũkũmi wake: nakwa ngooka mbola, mũendo wĩanĩe indo ila syĩ mbee wakwa na mũendo wĩanĩe syana, mũvaka yĩla ngavika Seili kwa mwĩaĩi wakwa. 15Na Esau asya, Nĩngũtiĩe andũ amwe ala me nakwa. Nake akũlya, Ma kĩ? Nĩnone ũseo methonĩ ma mwĩaĩi wakwa. #Lu 2.13. 16Na ĩndĩ Esau asyoka mũthenya ũsu na nzĩa yake ya kũthi Seili. 17Na Yakovo athi kyalo kũvika Sukothi, na eeyakĩa nyũmba, na aakĩa indo syake malwanda: na kwa ũu syĩtwa ya vandũ vau vetawa Sukothi.
18Na Yakovo ooka na mũuo ndũa ya Sekemu, ĩla yĩ nthĩ ya Kanaani, yĩla waumie Vatani‐alamu; na amba maeema mbee wa ndũa. 19Na vala wambie ĩeema yake, athooa na ilungu ĩana sya vetha, kĩlungu kya nthĩ, kw’okonĩ kwa ana ma Amolu, ĩthe wa Sekemu. #Yos 24.32; Yoa 4.5; Meko 7.16. 20Na vau aakĩa kĩthembeo, na akĩta Eli‐EloeIsilaeli.
Currently Selected:
MWAMBĨLĨLYO 33: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
